Malus angustifolia — дрэва, від роду яблыня (Malus) сямейства Ружавыя (Rosaceae), якое расце на паўночным усходзе ЗША[1].
Па сучасных уяўленнях, назва Malus angustifolia з'яўляецца сінонімам сапраўднай назвы Malus coronaria var. angustifolia (Aiton) Ponomar.[2].
Дрэва вышынёй да 10 метраў, лістападнае часам паўлістападнае[3]. Галіны карычневыя, пупышкі злёгку апушаныя.
Лісце вузкае, ад ланцэтнай да даўгавата-яйкападобнай формы, даўжынёй да 7,5 см, шырынёй да 3,5 см, скурыстае, цёмна-зялёнага колеру, голае (маладое злёгку апушанае). Край ліставай пласцінкі зубчата-пільчаты, часам лісце бывае злёгку лопасцевае або фестончатае.
Кветкі белыя або ружовыя, духмяныя, дыяметрам да 2,5 см, сабраны ў малакветкавыя суквецці. Кветаножкі голыя або апушаныя, даўжынёй да 3,5 см. Гіпантый голы або слабаапушаны. Слупкі густа апушаны ля аснавання. Час цвіцення — чэрвень.
Плады зелянява-жоўтыя, шарападобныя, часам злёгку сціснутыя з бакоў, дыяметрам да 2,5 см. Кіслыя на смак, вельмі духмяныя.
Асаблівага гаспадарчага значэння не мае. Плады даўкія і кіслыя, у сырым выглядзе, неядомыя, аднак з іх можна прыгатаваць джэм, жэле і г. д. Часам вырошчваюць у якасці дэкаратыўнай расліны.
Зноскі
- ↑ Жуковский П. М. Культурные растения и их сородичи. — Изд. 3-е, перераб. и доп. — Л.: Колос, 1971. — С. 447.
- ↑ Malus angustifolia на сайце The Plant List Архівавана 23 мая 2019.
- ↑ Деревья и кустарники СССР. Дикорастущие, культивируемые и перспективные для интродукции / под ред. д-ра биол. наук, проф. С. Н. Соколова. — М.-Л.: Изд-во академии наук СССР, 1954. — Т. 3. — С. 456—457.
_(8435943414).jpg)
