Дрыжалка (Tremella) — род грыбоў сямейства Tremellaceae. Назва ўпершыню апублікавана ў 1794 годзе[1].
Род аб’ядноўвае грыбы, якія маюць пладовыя целы такой жа будовы, што і ў родзе Exidia. Але, як правіла, дрыжалкі бываюць больш яркія, жоўтыя, аранжавыя, часта маюць кустова-лапаткавую форму. Гэтыя два роды адрозніваюцца і формай спор, якія ў Exidia алантоідныя, а ў дрыжалак шарападобныя або яйцападобныя.
Найпросты грыб роду дрыжалка — Tremella mesenterica, мае лопасцевыя ярка-жоўтыя пладовыя целы, якія з’яўляюцца на сухіх галінках лісцевых парод позняй восенню. Ён расце як сапрафіт і адносіцца да зімовых грыбоў.
Акрамя сапрафітаў, сярод дрыжалак ёсць нямала і мікафілаў, якія паразітуюць на іншых грыбах. На гіменіі афілафоравага грыба Aleurodiscus amorphus расце Tremella mycetophiloides. Яго пладовыя целы маленькія, грудкавыя, амаль бясколерныя або бледна-карычневыя. Такія ж маленькія пладовыя целы мае Tremella tubercularia, развіваецца на стромах вялікіх прадстаўнікоў класу Sordariomycetes. Як правіла, грыбы гэтых двух відаў не аказваюць прыкметнага ўплыву на развіццё тых грыбоў, на якіх яны паразітуюць, але некаторыя мікапаразіты з роду Tremella усё ж такі выклікаюць дэфармацыю пладовых тэл сваіх гаспадароў.
Від Tremella encephala паразітуе на грыбах віду стэрэум пачырванелы (Stereum sanguinolentum) і іншых відаў гэтага роду, якія растуць на іглічных пародах. Пладовыя целы гэтага віду амаль шарападобныя, звіліста-маршчыністыя, дыяметрам да 1,5 см, вохрыстыя. У разрэзе відаць, што яны маюць белую, параўнальна цвёрды, мясіста-скурысты асяродак, пакрыты тонкім вохрыстым халадцападобным пластом. Белы асяродак — гэта змененае пад уздзеяннем паразіта пладовае цела роду стэрэум (Stereum), а сам паразіт мае выгляд халадцападобнай плёнкі[2].
Віды Tremella fuciformis і Tremella mesenterica выкарыстоўваюцца ў кітайскай кухні.
Зноскі
- Persoon, C.H. 1794. Dispositio methodica fungorum. Neues Magazin für die Botanik. 1:81-128 — P.111
Tremella encephala, якая паразітуе на Stereum sanguinolentum
