Прэсбургскі мір

Прэсбургскі мір 1805 года (ням.: Pressburger Frieden; фр.: Traité de Presbourg) — мірны дагавор паміж Францыяй і Аўстрыяй, заключаны 26 снежня 1805 года ў Прэсбургу (Браціслава) пасля разгрому Аўстрыі ў Аўстэрліцкай бітве і яе поўнага паражэння ў вайне Трэцяй кааліцыі.

Паводле Прэсбургскага міру, Аўстрыя саступала Напалеону, як каралю Італіі, Венецыянскую вобласць, Істрыю (акрамя Трыеста) і Далмацыю і прызнавала ўсе французскія захопы ў Італіі. Акрамя таго Аўстрыя пазбаўлялася таксама ўсіх сваіх уладанняў на захад ад Карынтыі, якія пераходзілі пад уладу галоўных саюзнікаў Напалеона ў імперыі:

• Курфюрства Баварыя атрымала Ціроль з Брыксенам і Трэнтам, Форарльберг, правабярэжжа Іна, Бургау і Ліндау, а таксама Пасау і Айхштэт, адарваныя ад Зальцбургскага курфюрства;
• Курфюрства Вюртэмберг набыло былыя аўстрыйскія ўладанні ў Швабіі: Альтдорф, Гогенберг, Неленбург, Эхінген і Бондорф;
• Курфюрства Бадэн атрымала Канстанц, а таксама тэрыторыю герцагства Брэйсгау, уключаючы Фрайбург і Ортэнау.

Больш таго, імператар Франц II прызнаў за манархамі Баварыі і Вюртэмберга тытулы каралёў, што вывела іх з-пад улады інстытутаў Свяшчэннай Рымскай імперыі. Аўстрыя таксама выплачвала Францыі кантрыбуцыю ў суме 40 млн. флорынаў.

У якасці кампенсацыі Аўстрыя атрымлівала адносна невялікую тэрыторыю, якая ўключала Зальцбург і былое абацтва Берхтэсгадэн, а для былога курфюрста Зальцбургскага Фердынанда Габсбурга было створана новае герцагства Вюрцбург.

Змены, прадугледжаныя Прэсбургскім мірам 1805 года, азначалі канец аўстрыйскага панавання ў Свяшчэннай Рымскай імперыі і спрыялі яе роспуску ў 1806 годзе.

Літаратура

• Прэсбургскі мір // Энциклопедический словарь Брокгауза и Ефрона: В 86 томах (82 т. и 4 доп.) (руск.). — СПб., 1890—1907.