Фрэнсіс Лабак нарадзіўся 16 кастрычніка 1815 года ў горадзе Б’юфарт у Паўднёвай Караліне. У 1836 годзе ён пераехаў у Тэхас. Калі Тэхас быў у статусе рэспублікі, Лабак займаў пасаду кантралёра бюджэту Тэхаса. У 1857 годзе ён быў абраны віцэ-губернатарам Тэхаса ад дэмакратычнай партыі. У 1859 годзе яму не ўдалося пераабрацца. У 1861 годзе, пасля сэцэсіі Канфедэратыўных штатаў, Лабак выйграў губернатарскія выбары. Ён актыўна падтрымліваў прызыў прыдатных да ваеннай службы грамадзян у войска КША. У 1863 годзе, з заканчэннем губернатарскіх паўнамоцтваў, Лабак у рангу падпалкоўніка пайшоў пад камандаванне генерала Джона Магрудэра. У 1864 годзе ён быў прызначаны ад’ютантам Джэферсана Дэвіса. Пасля паражэння канфедэратаў Лабак і Дэвіс паспрабавалі ўцячы з Рычманда, але былі злоўлены ў Джорджыі. Лабак на 8 месяцаў быў заключаны ў форт Дэлавэр. З 1878 па 1891 год ён займаў пасаду скарбніка штата Тэхас. 22 чэрвеня 1905 года ва ўзросце 89 гадоў Лабак памёр.
