Aulerci

An Aulerci - e latin - pe Aolerked^[1] a oa anv peder fobl c'halian o chom etre ar stêrioù Liger ha Saena.

Gerdarzh

Dont a ra anv an Aulerci eus ur rakger au- , a verk ar pellder, a gaver e meur a yezh indezeuopek, hag ur ger lerco- diwar *LERC- o talvezout "roud", deuet da vout LERC'H e brezhoneg; en iwerzhoneg ez eus un anv LORG (kemm boas e/o) a zo "roud". An Aulerci a vije neuze "tud ar roudoù". N'haller ket sklaeraat ar ster evit poent avat.

Peder fobl

Sed anvioù ar peder fobl, a oa teir anezho er c'hevredad arvorigat:

• an Aulerci Brannovices, suj d'an Aedui^[2], e saonenn ar stêrioù Yonne pe Saône.
• an Aulerci Cenomanes, e proviñs Gallia Lugdunensis, er reter (e lodenn reter Maine) ; ha Vindunum pe Cenomani (Le Mans) a oa o c'hêr-benn,
• an Aulerci Diablintes^[3], etre ar Redones er c'hornôg hag ar Cenomanes er reter (e lodenn gornôg Maine) ; hag e Noviodunum pe Diablintes (Jublains), edo o c'hêr-benn.
• an Aulerci Eburovices^[4], e proviñs Gallia Lugdunensis, etre ar Veliocasses er reter hag al Lexovii er c'hornôg, en-dro d'o c'hêr-benn Mediolanum pe Eburovices (Évreux).

Pennadoù kar

• Pobloù Galia

Notennoù

1. Aulerked en Notennou diwar-benn ar Gelted koz, p. 347
2. Julius Caesar, Commentarii de Bello Gallico, levrenn VII, 75.
3. (Julius Caesar, Commentarii de Bello Gallico, levrenn III, 10.
4. (Julius Caesar, Commentarii de Bello Gallico, levrenn III, 17.