C'hloris
_-_Flora_And_Zephyr_(1875).jpg)
C'hloris (χλωρις / Khlôris e gregach) zo anv meur a blac'h e mojennoù Hellaz kozh.
E mojennoù zo e oa un nimfenn eus Inizi ar Wenvidien (a vije Inizi Kanariez hiriv, gouez da lod), liammet hec'h anv ouzh an natur, an nevezamzer, ar bleunioù, hag an eginañ.
C'hloris ha Zefyros
[kemmañ | kemmañ ar vammenn]Zefyros, doue an avel gornôk, a garas anezhi, he skrapas, a zimezas ganti hag a viras anezhi e barr he yaouankiz, ma roas dezhi rouantelezh ar bleuñv. E miz Mae eo e voe o c'harantez en he bleuñv ha n'ankounac'ha ket ar varzhed, pa reont anv eus tro ar bloaz hag e goulzoù-amzer, da reiñ lec'h d'an daou bried-se e lidambroug an Nevezamzer. Ur mab o doe, Karpos, un anv hag a dalv kement ha "frouezh" e gregach.
Gwelout a c'haller ar vetaforenn naturel-mañ: "Zefyros... paotr an avel gornôg a zegas freskijenn ha glav e-kerzh an nevezamzer. En em unaniñ a ra gant C'hloris, doueez an diwanañ, a zeu anezhi frouezh fresk an douar."[1]
E latin
[kemmañ | kemmañ ar vammenn]Flora e oa hec'h anv e latin. Azeulet e veze gant ar Sabined ha ganto e voe degaset da Roma, ma veze graet lidoù dezhi da-geñver C'hoarioù Flora, pe ar Floralia, a veze lidet eus an 28 a viz Ebrel betek ar 1añ a viz Mae, kent mont da goll er IVe kantved.
C'hloris (Meliboia)
[kemmañ | kemmañ ar vammenn]Meliboia a oa unan eus pevarzek bugel Niobe hag Amfion (anvet ivez Niobided), hag an hini nemeti eus ar vugale (pe unan eus ar re nemeto) a voe laosket e vuhez gantañ pa voe lazhet ar re all gant Artemis hag he breur gevell Apollon, evel dic'haou eus an dismeg graet gant Niobe d'o mamm Leto, pa oa bet o fougeal he doa bet bugale a-leizh, e-keit ma ne oa bet nemet daou d'an doueez.
Ken spontet e voe Meliboia gant al lazhadeg ma oa aet glaslivet he dremm, ha ma kemmas hec'h anv da vezañ C'hloris ("an hini glaslivet"). Honnezh eo an hini a zo meneget gant Homeros en Odysseia (levr 11, linennoù 281-296).
Goude e timezas da Neleüs hag e voe rouanez e Pylos. Meur a vab o doe, en o zouez:
Ur mab he doe C'hloris ivez, Periklymenos e anv, pa oa dimezet gant Neleüs, met hervez doareoù all eus ar vojenn eo Poseidon an hini a oa tad da Periklymenos (ha tad da Neleüs ivez). Poseidon a roas da b-Periklymenos ar galloud da dreiñ e kement loen a gare. Bugale all he doe, anaout a reer: Tauros, Asterios, Pylaon, Deimac'hos, Eurybios, Frasios, Eurymenes, Evagoras hag Epilaos.
Odysseüs a oa en em gavet gant C'hloris pa oa aet d'ober e dro d'an Hades (hervez Odysseia Homeros, 11, 281ff).
C'hloris (mamm Mopsos)
[kemmañ | kemmañ ar vammenn]Dimeziñ a eure C'hloris d'an diouganer Ampyks (mab da Elatos), ha digantañ he doe ur mab, Mopsos, a voe un diouganer brudet ivez, hag a yeas da-heul an Argonaoted.
Gerdarzh
[kemmañ | kemmañ ar vammenn]Donet a ra anv Chloris eus ar gregach Khloros a dalv kement ha "melen-glas," "glas-sklaer," "gwenn-glas" pe "fresk".
Anezhañ ez eus deuet un toullad gerioù anavezet er yezhoù europat bras (saozneg, galleg, ha yezhoù latin) :
- an anv plac'h Chloe - a dalv "egin glas"; un anv all roet da z-Demeter, doueez al labour-douar en Hellaz.
- Klorofil - ur pigmant glas a c'hoari e-barzh fotosintezenn ar plant.
- Klorin - un elfenn gimikel, un aezhenn etre melen ha glas he liv.
Liammoù diavaez
[kemmañ | kemmañ ar vammenn]
Notennoù ha daveennoù
[kemmañ | kemmañ ar vammenn]- ↑ Kyriazis, Constantine D. Eternal Greece.