Clarisse Agbégnénou

Clarisse Agbégnénou

den

Reizh pe jener	plac'h
Bro ar geodedouriezh	Togo, Frañs
Bro sport	Frañs
Anv e yezh-vamm an den	Clarisse Agbégnénou
Anv ganedigezh	Clarisse Bogdanna Agbegnenou
Anv-bihan	Clarisse
Anv-familh	Agbégnénou
Deiziad ganedigezh	25 Her 1992
Lec'h ganedigezh	Roazhon
Yezhoù komzet pe skrivet	galleg
Micher	judoka
Bet war ar studi e	HEC Pariz
Sport	judo
Perzhiad e	judo at the 2016 Summer Olympics – women's 63 kg, judo at the 2020 Summer Olympics – women's 63 kg, judo at the 2020 Summer Olympics – mixed team event
Ezel eus	HEC Alumni
Prizioù resevet	marc’heg an ordre national du Mérite, Champion des champions français de L'Équipe, Champion des champions français de L'Équipe, Marc'heg al Lejion a Enor

Clarisse Agbégnénou, anvet ivez Gnougnou, pe ar Bulldozer, pe c’hoazh Clacla, a zo ganet d’ar 25 a viz Here 1992 e kêr Roazhon e Breizh. Ur judoka eo, gant ar vroadelezh togoat a-berzh he zud hag ar vroadelezh c’hall^[1].

Buhez prevez

Ur babig gant diaesterioù yec'hed

Start-tre eo bet penn-kentañ buhez Clarisse Agbégnénou peogwir he deus kroget he buhez gant meur a gudenn yec’hed. E gwirionez e oa ganet daou viz a-raok an termen gant he breur gevell anvet Aurélien. Abalamour da se eo bet lakaet e-barzh ur glouarell e-pad 4 sizhun. Ouzhpenn se he doa ranket bezañ oberataet abalamour da zroukstummadur ul lounezh 2 sizhun nemetken goude bezañ ganet^[2]. Hag ouzhpenn se c’hoazh e oa kouezhet e koma e-pad 7 devezh pa oa c’hoazh ur babig abalamour d’he c’hudennoù yec’hed. Abaoe ma oa babig, Clarisse Agbégnénou zo bet gwelet evel ur stourmerez ‘blam m’he deus digoret he daoulagad daoust ma lâre ar vedisined ne oa netra ken d’ober eviti ; "lâret o deus da'm zud : Ret eo dilugañ anezhi, luziet eo”^[3].

Bugaleaj

Kresket he deus e-barzh kêr Gennevilliers e departamant an Hauts-de-Seine, e-barzh rannvro Ile de France, gant he 3 breur hag he zud anvet Victor ha Pauline Agbégnénou. D’an oad a 9 bloaz e oa bet degemeret e kleub an AMA ( Arzoù-emgann Asnières)^[4] ha da 14 vloaz eo bet degemeret e « pol Frañs Orleañs », ul lec'h evit an dud varrek n'o deus ket al live c'hoazh evit mont e-barzh an INSEP. Met ouzhpenn se, Clarisse zo ivez adjudant (penn rann pe  skoazell ul letanant)  e-barzh Archeriezh Vroadel Frañs

Mamm

Hirie, gant he gwaz Thomas Grava, he deus ur bugel anvet Athéna, ganet d’ar 15 a viz Even 2022.

Judo

Kroget he deus gant ar judo a-drugarez da startijenn he yaouankiz. E gwirionez he deus kroget da ober judo hep muioc'h a gred met just evit ober ur sport emgannañ, hag esaeet he deus ar judo. Ur gwir c’halvidigezh eo bet eviti. Goude se eo bet degemeret e «pol Frañs» Orleañs ha kroget he deus da c’hounit krogadoù, betek bezañ kampionez europat ar yaouankizoù, beskampionez bro Frañs ar re dindan 57 kg e 2008 ha kampionez Frañs junior ar re dindan 63kg e 2009. Diwar se eo bet degemeret en INSEP e 2009. Ar memes bloavezh eo bet enskrivet e "judo kleub Escales Argenteuil" da 16 vloaz hanter. Goude se e c’hounezas Clarisse Agbégnénou he medalenn aour etrebroadel kentañ e kampionad Europa, e 2013, an hini gentañ eus un toullad mat.  

Da gentañ er C'hoarioù Olimpek e 2016 e Rio de Janeiro. Eno eo bet beskampionez olimpek ha tapet he deus ar vedalenn arc'hant e-touez ar re dindan 63 kg. Goude se eo bet degemeret er Red Star Club (RSC) e Champigny-sur-Marne. Un nebeud mizioù war-lerc'h, d'ar 1añ a viz Gwengolo 2017, e oa bet gounezet ganti kampionad ar bed dindan 63 kg e Budapest.

E-pad Kampionad judo Europa 2018 e Tel-Aviv-Jaffa e oa aet ar maout ganti evit titl Europa ar re dindan 63 kg a-enep Slovenia, goude 7 munutenn c'hoari. Evit ar 3e gwech ar memes bloaz e kampionad ar bed e Bakou he doa gounezet ar priz kentañ dindan 63 kg. Er bloaz-se he doa gounezet ur gevezadeg all ha dilennet eo bet Kampionez Kampionad a Skipailhoù e 2018.

D'an 28 a viz Eost 2019 e teuas Clarisse Agbégnénou da vezañ kampionez ar bed evit ar pevare gwech en Nippon Budokan goude un emgann 11 munutenn. Ouzhpenn se e teuas Clarisse da vezañ ar judoka muiañ titlet e bro Frañs goude ar priz-se, a-raok Lucie Décosse, Gevrise Emane ha Brigitte Deydier.

Evit echuiñ, gounit a reas ur pempvet titl europat e kampionad Europa judo e 2020 e Prag, ha mont a reas ar maout ganti evit ar pempvet gwech d'an 9 a viz Mezheven 2021, e kampionad ar bed judo 2021 e Budapest.

Un titl all eus ar re vrasañ a c’hounezas e C'hoarioù Olimpek Tokyo e 2020 e-lec'h ma c’hounezas ur wech ouzhpenn ar priz kentañ, hag e kampionad ar bed e Doha d'an 10 a viz Mae 2023 e-lec'h ma c’hounezas he 6vet titl bedel. En holl, Clarisse Agbégnénou he deus gounezet 7 kampionad ar bed, hag ouzhpenn se eo bet trec’h e 4 c'hampionad Europa^[5].

Prizioù

2012	kampionad Europa	3vet	dindan 63kg
2013	kampionad Europa	1an	dindan 63kg
2013	kampionad ar bed	2vet	dindan 63kg
2014	kampionad Europa	1an	dindan 63kg
2014	kampionad ar bed	1an	dindan 63kg
2015	kampionad ar bed	2vet	dindan 63kg
2016	c'hoarioù olimpek	2vet	dindan 63kg
2017	kampionad ar bed	1an	dindan 63kg
2018	kampionad ar bed	1an	dindan  63kg
2018	kampionad Europa	1an	dindan  63kg
2019	kampionad ar bed	1an	dindan  63kg
2020	kampionad Europa	1an	dindan  63kg
2021	kampionad ar bed	1an	dindan  63kg
2021	c'hoarioù olimpek	1an	dindan  63kg
2023	kampionad ar bed	1an	dindan  63kg

Notennoù ha daveennoù

1. Clarisse Agbegnenou : prématurée, gendarme... Qui est la championne olympique ? L'Internaute, 27 a viz Gouere 2021.
2. Clarisse Agbegnenou : prématurée, gendarme... Qui est la championne olympique ? L'internaute, 27 a viz Gouere 2021.
3. Clarisse Agbehnenou a frôlé la mort dès sa naissance, Eurosport, 19 a viz Gwengolo 2021.
4. Tout ce qu'il faut savoir sur Clarisse Agbegnenou, Blaque.
5. Judo : victorieuse du Grand Slam de Paris, Clarisse Agbégnénou « tape du poing sur la table » à six mois des Jeux, Le Monde, 3 a aviz C'hwevrer 2024.