Eleni Daniilidou
|
C'l artìcul chè 'l è scrit in
Miranduléś |
L’Eleni Daniilidou (La Canea, ìśula ad Créta, 19 ad Setémbar dal 1982, a sa scriv Ελένη Δανιηλίδου in Grèc), fiōla dla Sissi (raśdōra) e ad Vasileios (dentìsta), l'è na tenìsta gréca ch'l'è stada bòna ad rivàr a èsar la nùmar quatórdas dal mónd, al 12 ad Maǵ dal 2003. L'è prufesiunìsta da 'l 1996.
L'è élta 182 cm e la péśa 72 chilo. La dróa al bras dèstar e la tira 'l arvèrs cun na maṅ sōla.
In dla sò caréra l'à vins sinc tìtul WTA in singulàr e tri in dópi e pò anc ùndas ad qvéi ITF (trédas in dópi).
In di turnèo dal Gran Slam, da 'l 2002 a 'l 2004, l'è stada bòna ad rivàr a 'l quàrt tùran dapartùt a part a 'l Roland Garros in dua la s è farmàda a 'l tèrs.
Caréra
Dòp avér śugâ par soquànt an in dal sircùit ITF, la pasa par la prima vòlta al qualificasiòṅ in un turnèo WTA a Birmingham in dal 2001 pardénd pò a 'l secónd tùran da la Daniela Hantuchová par 2-6 3-6. Stés riśultâ anc a Wimbledon ma chè la pèrd da l'Amélie Mauresmo cun al puntéǵ ad 3-6 2-6. A gl'US Open la riva a 'l tèrs tùran, batùda par la Monica Seles 2-6 3-6. A Bratiślàva la pèrd da la mudnéśa Adriana Serra Zanetti dòp avér batû in dal prim incóntar l'Elena Bovina.
In dal 2002 la riva in semifinàl a Bùdapest (4-6 6-2 5-7 da la śvisra Myriam Casanova) e in di quàrt a Birmingham (4-6 6-4 4-6 da la Jelena Dokić). In Luj la s pòrta a cà al tìtul ad 'S-Hertogenbosch baténd a la fiṅ tri Top quìndas cuma l'Amélie Mauresmo, la Justine Henin e l'Elena Dement'eva in finàl par 3-6 6-2 6-3. A Wimbledon la riva a 'l quàrt tùran ma lè la gh'à da lasàr strada a la nùmar tri dal mónd Jennifer Capriati par 1-6 6-3 1-6. Dòp i quàrt a Los Angeles (6-7 2-6 da la Lindsay Davenport), la và fóra subìt a Montreal p'r òpra dla Francesca Schiavone, pardénta dasfurtunàda. In Brasil a Bahia la fà fóra la Monica Seles in semifinàl 6-1 7-5 ma pò la pèrd da la rusa Anastasija Myskina par 3-6 6-0 2-6.
In dal 2003 la s pòrta a cà al turnèo 'd Auckland baténd in finàl la Yoon Jeong Cho par 6-4 4-6 7-6. A gl'Australian Open la la férma sōl la Serena Williams a 'l quàrt tùran par 6-4 6-1. La gréca la la pésca anc a Parì a 'l quèrt e la gh pèrd incóra in semifinàl par 6-2 6-0. In séguit la riva in semifinàl a Birmingham in dua la pèrd da la Magdalena Maleeva par 3-6 7-5 4-6.
L'ardópia al tìtul 'd Auckland anc in dal 2004 (6-3 6-2 a l'americàna Ashley Harkleroad). A gl'Australian Open però la và fóra prèst pardénd par 4-6 7-5 3-6 da la Mara Santangelo. A Miami la riva in semifinàl in dua la céd a la Serena Williams par 4-6 4-6 dòp avér però mandâ a cà la Jennifer Capriati. A gl'US Open la s férma a 'l quàrt tùran ad òpra dla giapunéśa Shinobu Asagoe.
In dal 2005 la pèrd sèmpar a 'l prim o a 'l secónd tùran, a part Birmingham in dua la riva in di quàrt (5-7 6-2 1-6 da la Marija Šarapova) e a Wimbledon in dua la bat la Justine Henin 7-6 2-6 7-5 e la Laura Granville prima ad cédar a la Flavia Pennetta par 4-6 3-6. La tórna a far dascórar ad lē a Los Angeles in dua la bat la Svetlana Kuznecova ma pò la gh'à da bandunàr in di utàṿ cóntar la Conchita Martínez.
In dal 2006, avénd tacâ 'l an da nùmar ssanta, l'è custréta a śugàr da spés al qualificasiòṅ. A Miami la i pasa par pò pèrdar in di utàṿ da la Nadia Petrova par 2-6 0-6. A Esturìl la riva in di quàrt baténd la Bethanie Mattek-Sands e la Mariana Díaz-Oliva ma lè la céd a la Flavia Pennetta par 2-6 7-5 3-6. In Śugn la riva in semifinàl a 'S-Hertogenbosch e la s la śōga cun la Dinara Safina alvànd bandéra biànca sōl a 'l tèrs sét. In Setémbar la vins al tìtul ad Seùl dand la paga a la Marion Bartoli in semifinàl 6-1 6-0 e baténd pò la Ai Sugiyama in finàl par 6-3 2-6 7-6. La vins pò al sò quìnt tìtul dū an dòp a Hobart baténd in d'l at cuncluśìṿ la Vera Zvonarëva par bandòṅ.