Johanna Larsson
|
C'l artìcul chè 'l è scrit in
Miranduléś |
La Johanna Larsson (Boden, 17 'd Agóst dal 1988, a s lèś /ˈjoɦɑnːɑ ˈlɑːʂɔn/ in śvedéś [1]) l'è na tenìsta śvedéśa prufesiunìsta da 'l 2006. La dróa al bras dèstar e la tira 'l arvèrs a dū maṅ. L'è élta 174 cm e la péśa 66 chilo.
In dla sò caréra l'à vins un tìtul WTA (dòp avér pardû tri finàli) e dódas ad qvéi ITF. L'è stata bòna ad rivàr a èsar la nùmar quarànta-siē dal mónd al 13 ad Luj dal 2011.
Caréra
Cun na carta salvàdga la śōga a quatórd'ś an al sò prim incónt'r in dal sircùit WTA in dal 2003 a Båstad e la pèrd par 2-6 3-6 cun l'Yvonne Meusburger. In dal 2004 la in śōga àtar quàtar ma la i pèrd tut. In dal 2005 la pèrd dū vòlti cun la Monica Niculescu in Egìt in dū ITF da déś-mila dòlar, pò la vins qvél ad Falkenberg in Śvèsia in finàl cun la Sofia Arvidsson. Da 'd lè a la fiṅ d'l an la fà sù àtri dū finàli ITF e acsè la sèra 'l an a la puśisiòṅ 491 dal mónd. 'L an dòp la vins incóra a Falkenberg, pò la pasa 'n tùr'n a Båstad in dua la céd a la Sofia Arvidsson in tri sét. In dal 2007 la s mét in bisàca àtar dū tìtui ITF e la sèra 'l an a 'l 314śum pòst.
In dal 2008 la śōga tri finàli ITF ad fila, vinsénd qvéli da vintsìnc-mila dòlar ad Sutton (7-5 6-0 a l'Andrea Hlaváčková) e ad Stucólma (0-6 6-1 7-6 a la Barbora Strýcová). In Luj lo bat 3-6 7-6 6-4 la Julia Görges in dal WTA ad Stucólma par pò pèrdar subìt dòp da la francéśa Camille Pin. La finìs la stagiòṅ da nùmar 169 dal mónd.
In dal 2009 la próa a qualificàr-as p'r i turnèo dgl'Australian Open, ad Bugutà e 'd Acapûlc. La gh la cava sōl in Culómbia ma la pèrd subìt cun la Carla Suárez Navarro par 6-7 4-6. In Agóst la pèrd la finàl d'l ITF 'd Hechingen in Germâgna cun l'Yvonne Meusburger ch'la la bat par 5-7 7-5 6-2, pò la śōga atri quàtar finàli vinsénd-an dū.
.jpg)
La śvedéśa la vèra la stagiòṅ 2010 vinsénd cóntar l'Ajla Tomljanović 'n ITF da vintsìnc-mila dòlar in di Stat Unî pò tra Favràr e Mars la s in mét in bisàca àtar dū baténd śugadōri cuma la Simona Halep, la Romina Oprandi, la Laura Siegemund e la Shuai Zhang. La Larsson la vins in Mars anc in sal cimènt ad Jersey in dal Régn Unî e 'l è 'l quàrt tìtui ITF in tri méś par lē. Dòp avér pasâ 'n tùr'n a 'l Roland Garros, in Śugn, baténd la Petra Martić 6-2 2-6 6-4 e la Varvara Lepchenko 3-6 7-5 6-3, la riva in finàl in d'l ITF da sènt-mila dòlar ad Marsìglia ma la la pèrd 3-6 3-6 cun la Klára Koukalová. In sla tèra batùda la riva par la prima vòlta in di quàrt 'd un turnèo WTA a Praga ma la céd par 2-6 6-4 5-7 a la Barbora Strýcová. In Luj la fà incóra méj rivànd in finàl a Pòrtrōś ma 'l tìtul la s al pòrta a cà la rusa Anna Čakvetadze par 6-1 6-2. A gl'US Open la s férma subìt (6-7 2-6 da l'Alisa Klejbanova) mént'r a Quebec City la riva giùst in di utàṿ (4-6 2-6 da la Lucie Šafářová). La Johanna la sèra 'l an cun na finàl in d'l ITF ad Barnstaple (2-6 0-6 cun l'Alison Riske) e 'n prim tùr'n in Lussembûrgh (3-6 0-6 da l'Ana Ivanović).
Dòp un brut inìsi ad 2011, in Favràr la riva in semifinàl a Acapûlc in dua l'è però spasàda via par 2-6 0-6 da l'Arantxa Parra Santonja. I rìvan pò tri prim tùr'n a Monterrey (2-6 4-6 da la Sara Errani), a Indian Wells (2-6 6-3 3-6 da la Sybille Bammer) e in d'l ITF ad Nassu (7-6 4-6 4-6 da l'Heather Watson). A Miami l'è bòna 'd bàtar la nùmar siē dal mónd, la Na Li, par 7-5 6-7 7-6 ma minga l'Alexandra Dulgheru. Dòp na semifinàl a Esturìl, la fà fóra l'Ana Ivanović a 'l Roland Garros ma pò la pèrd a 'l secónd tùran da la rusa Ekaterina Makarova par 3-6 6-7. A Cupenàghen la céd in di utàṿ a la Bethanie Mattek-Sands mént'r a 'S-Hertogenbosch la s férma in di quàrt cun la Jelena Dokić. A Wimbledon e a Båstad la cata sèmpar la Polona Hercog, a 'l prim tùr'n e in finàl, e la gh pèrd 7-6 3-6 4-6 in Inghiltèra e 4-6 5-7 in Śvèsia. In Agóst a Dallas la bat la Simona Halep e la Shahar Peer par pò lasàr strada in di quàrt a l'Angelique Kerber.
La Larsson l'incróśa subìt la Sara Errani a 'l inìsi dal 2012 pardénd-ag par 1-6 1-6 a Auckland e par 3-6 3-6 a Hobart pò a gl'Australian Open àtar prim tùran cun la Kaia Kanepi. La stagiòṅ la cuntìnua dimóndi mâł e la Johanna la perd anc cun di atri itagliàni, la Nastassja Burnett in dal qualificasiòṅ ad Róma e la Francesca Schiavone a Straśbûrg ma chè almànc la riva in di quàrt acsè cuma a Bad Gastein in Śugn in dua la patìs un 6-1 2-6 2-6 da la Mandy Minella. In Luj la fà sù di punt bòṅ par la clasìfica vinsénd cun l'Anna Tatishvili 'l ITF ad sènt-mila dòlar ad Bjèla e rivànd in semifinàl a Båstad. A Cincinnati, tacànd da 'l qualificasiòṅ, la riva in di utàṿ baténd prima la Casey Dellacqua par 6-1 6-3 e pò la Marion Bartoli prima 'd céd'r a la Na Li par 2-6 2-6. A Tòkyo la pèrd incóra da la Sara Errani a 'l secónd tùran c'n al puntéǵ ad 3-6 6-7 mént'r a Pechîṅ e a Uśàka la n s qualìfica gnanc srand acsè la stagiòṅ a la puśisiòṅ stanta-tri dal ranking.
In dal 2013 a Auckland la bat la Julia Görges ma pò la pèrd in di quàrt da cl'atra tedésca, la Mona Barthel, par 2-6 1-6. A gl'Australian Open la bèca subìt la Jelena Janković ch'la vins sèg 6-2 6-2 pò la và fóra a 'l prim tùr'n anc a Acapûlc cun la Karin Knapp. A Indian Wells la pèrd incóra cun la Sara Errani 3-6 1-6 a 'l tèrs tùran dòp avér batû la Tímea Babos e l'Anastasija Pavljučenkova. A Miami la maledisiòṅ dgl'itagliàni la cuntìnua: 6-4 6-1 par la Flavia Pennetta a 'l prim tùran ma la śvedéśa la s tōś l'arvìnsida sèg baténd-la par 2-6 6-3 6-4 in semifinàl a Båstad, pcâ ch'in finàl a gh sia pò la Serena Williams ch'la s pòrta a cà al tìtul vinsénd 6-4 6-1. A gl'US Open la n pasa minga 'l prim tùran cun la Mona Barthel, invéci a Ningbo la riva in semifinàl cun la Bojana Jovanovski. A Uśàka la và a cà subìt cun la Samantha Stosur finénd 'l an a 'l 83śum pòst.
A 'l inìsi dal 2014 la śvedéśa la mét in fila dū prim tùran (a Melbourne e a Parì a 'l quèrt) e 'n secónd tùran (a Auckland) ma la gh'iva da śugàr cóntar di pès grôs cuma la Viktoryja Azaranka, la Carla Suárez Navarro e l'Ana Ivanović. In Braśìl invéci la n è minga bòna 'd bàt'r al qualificàdi Alison Van Uytvanck a Rio de Janeiro e Alizé Lim a Flurianòpulis, s'a gh śuntém pò ch'a Indian Wells e a Miami la n pasa minga 'l qualificasiòṅ, la fritàda l'è fata. Al perìud négar par lē al cuntìnua anc a Charleston e a Straśbûrg in dua la và fóra subìt cun la Lucie Šafářová e cun la Mónica Puig. A 'l Roland Garros invéci la riva a 'l tèrs tùran cun di bèi sucès su la Marija Kirilenko e la Flavia Pennetta, la la férma sōl l'Eugenie Bouchard. A Marsìglia la śōga 'n ITF da sènt-mila dòlar e la riva in finàl pardénd però cun l'Alexandra Dulgheru par 3-6 5-7. La tórna a pistàr i camp dla WTA a Eastbourne ma la n s qualìfica minga pò a Wimbledon àtar prim tùran cun la Bojana Jovanovski. In Luj la próva a védar se pasàr da l'èrba a la tèra rósa la gh pòrta bòṅ ma a n è minga acsè parchè la và a cà subìt a Bad Gastein (3-6 3-6 da la qualificàda Irina Falconi) e a Båstad (2-6 6-4 5-7 da la Kaia Kanepi). La Johanna la cróda śò in clasìfica e la và fóra da 'l primi sènt. In Agóst la riva in finàl in d'l ITF ad Bugutà ma la pèrd par 1-6 3-6 cun la Lara Arruabarrena Vecino. A gl'US Open la bat la Sloane Stephens a 'l secónd tùran prima ad patìr na stablìda da la Jelena Janković ch'la gh lasa sōl un śōg. In Lussembûrgh in Utóbar la riva in di quàrt ma anca chè la vèṅ spasàda via da la Barbora Strýcová par 0-6 2-6.
In dal 2015 la pèrd par 0-6 1-6 da l'Agnieszka Radwańska a 'l secónd tùran dgl'Australin Open ma pò la s tira sù cun na semifinàl a Rio de Janeiro in dua la céd però par 5-7 3-6 a la sò bistiàsa négra Sara Errani esénd che cun la rumagnōla l'è sóta par 0-6 in di scóntar dirèt e la n à mai vins un sét sèg. A Acapûlc la sćiànca la Sloane Stephens par 6-3 6-2 e pò anc l'Aleksandra Krunić par 6-1 6-2 prima 'd lasàr strada in di quàrt a na Timea Bacsinszky sù 'd gir. A Monterrey e a Indian Wells la pèrd cun l'Anastasija Pavljučenkova mént'r a Miami la và fóra a 'l tèrs tùran cun la Sloane Stephens dòp avér batû la Jaroslava Švedova e la Lucie Šafářová. In sal più bèl la Larsson la gh'à 'n pasàǵ a vōd cun quàtar prim tùr'n ad fila, gl'ùltim tri in sl'èrba. In Luj la tórna a śugàr in sla tèra rósa in 'n ITF tedésc da sinquànta-mila dòlar e la riva in finàl pardénd da l'amburghéśa Carina Witthöft. La stmana dòp la tórna a Båstad, al sò turnèo 'd cà in dua l'à bèla śugâ dū finàli, e finalmènt la vins al sò prim tìtul WTA baténd lung la via la Richel Hogenkamp par 6-1 6-3, l'Anna-Lena Friedsam par 6-3 7-5, la Barbora Strýcová par 6-2 6-3, la Julija Putinceva par 6-4 6-2 e la Mona Barthel, vinsidōra 'l an prima ma da spés tèsta buga, par 6-3 7-6.