Nastassja Burnett
|
C'l artìcul chè 'l è scrit in
Miranduléś |
La Nastassja Burnett (Róma, 20 ad Favràr dal 1992, a s lèś [na'stassja 'barnɛt] in Itagliàn) l'è na tenìsta itagliàna, vinsidōra ad quàtar tìtui dal sircùit ITF in dal 2011. Al sò scutmàj 'l è Nasty[1] o anc Asia.
L'è élta 178 cm e la péśa 64 chilo. La dróa al bras dèstar e la tira 'l arvèrs a dū maṅ. Al sò stîl ad śōg l'è qvél dla sparabucìni ma la fà fadìga a mōv'r-as da fónd camp. L'è la fiōla 'd un dentìsta itagliàṅ e dna màdar pulàca ch'la gh'à dâ al sò cugnóm (che però al daśvèṅ da 'l Ingléś e minga da 'l Pulàc).
L'è rivàda a èsar la nùmar sènt-trént'òṅ dal mónd al 20 ad Maǵ dal 2013. La sò alenadōra l'è la Tathiana Garbin.
Caréra
La Burnett la taca a pistàr i camp dal sircùit ITF in Spaggna in dal 2006. In dal 2007 la riva in semifinàl in qvél ad Tortosa.
In dal 2009 la pèrd in tri sét a 'l secónd tùran a Belfort e a Biarritz da la Vesna Dolonc e da la Julia Görges. In Setémbar la bat la Camila Giorgi a Sant Malo par pò pèrdar da la Stéphanie Cohen-Aloro. La sèra 'l an da nùmar 367 dal mónd.
In dal 2010 la śōga al qualificasiòṅ in dal turnèo WTA ad Róma ma la pèrd a 'l prim tùran da la Chanelle Scheepers par 0-6 5-7. In d'l ITF ad Nantes l'incróśa la Julija Putinceva pardénd sèg par 3-6 4-6. La finìs l'an pasànd un tùran in d'l ITF 'd Opole (Pulògna), tulénd-as la sudisfasiòṅ ad bàtar là la nùmar 85 dal mónd, la spagnōla Lourdes Domínguez Lino par 6-0 6-3.
In dal 2011 la ś mét in bisàca quàtar tìtui ITF: in Mars qvél 'd Amiens, in Agóst qvéi 'd Olomouc e ad Munteròṅ (baténd anc la Kiki Bertens) e in Utóbar qvél ad Madrid (al nùmar nóṿ) baténd in finàl la Paula Ormaechea par 6-2 6-3. A Poitiers la bat a 'l prim tùran la nùmar quarànta-siē dal mónd Lucie Hradecká prima ad cédar a l'Anna Tatišvili.
In dal 2012 la và in di Stat Unî par śugàr al qualificasiòṅ in dal WTA ad Memphis in Favràr ma la fà 'l valìś a 'l secónd tùran pardénd 6-4 4-6 3-6 da la Jamie Hampton. In Avrìl la bat la María Teresa Torró Flor a Tessenderlo par 3-6 7-5 6-3 prima ad pèrdar in di quàrt da l'Elina Svitolina. In Maǵ la próa a qualificàr-'s a Róma. Dòp avér batû la Johanna Larsson però la céd in tri sét a l'Aleksandra Wozniak. In Śugn la riva in semifinàl in d'l ITF ad Marsìglia (3-6 4-6 da la Lourdes Domínguez Lino). A Bjèla la bat incóra la Kiki Bertens e pò la parmśàna Alberta Brianti e la nùmar òṅ dal tablòṅ, la Barbora Záhlavová-Strýcová. In semifinàl la pèrd in tri sét da l'Anna Tatišvili. In Agóst, baténd la Jana Čepelová in d'l ùltim tùran dal qualificasiòṅ, la gh la cava a śugàr la sò prima partìda in dal tablòṅ prinsipàl 'd un turnèo dal sircùit WTA a gl'US Open ma la la pèrd 0-6 3-6 da la rusa Vera Duševina. In Utóbar a Poitiers la fà fóra la śugadōra ad cà, la Kristina Mladenovic, par 6-4 4-6 6-4 ma in di quàrt la cata 'n òs tròp dûr par lē, l'Elena Vesnina, ch'la gh'à la méj par 6-1 6-1.
In dal 2013 la próa dimóndi vòlti a pasàr al qualificasiòṅ in di turnèo WTA ma la n gh'à mia sucès, cuma a Indian Wells in dua la pèrd da la Casey Dellacqua dòp avér far arbasàr la crésta a la Coco Vandeweghe cun un 6-2 6-1. In Avrìl finalmènt la i pasa a Charleston e a Stucàrda (chè dand la paga a la Monica Puig e a la Garbiñe Muguruza Blanco) ma pò la n è briśa bòna ad pasàr al prim tùran (2-6 3-6 da l'Eugenie Bouchard e 3-6 4-6 da la Sabine Lisicki). A Róma la dasfrutà bèṅ la carta salvàdga ch'i gh'ìvan dâ qvéi dla federasiòṅ sćiancànd a 'l prim tùran la francéśa sò amìga Alizé Cornet par 6-2 6-2 ma a 'l secónd tùran la n pōl far gnint cun la Roberta Vinci ch'la vins sèg par 6-1 6-4. In Śugn la riva in semifinàl in d'l ITF ad Nottingham (al nùmar dū) pardénd da l'Elena Baltača 0-6 4-6. A la fiṅ dal méś la n pasa minga al qualificasiòṅ ad Wimbledon: in d'l ùltim tùran la bèca la Galina Voskoboeva (nùmar dū dal seeding) e la gh pèrd par 6-3 2-6 4-6. In Luj la śōga al turnèo ad Palèrum, vinsénd in nuvànta-sinc minùt cun l'ucraìna Maryna Zanevs'ka par 6-0 7-5 e pardénd pò cun la Lourdes Domínguez Lino par 5-7 6-4 3-6 dòp da piò ad dū óri e mèś ad śōg. In Luj la bat l'Anna Tatišvili a Baku par 6-2 6-3 prima ad lasàr strada a l'Elina Svitolina, pò vinsidōra dal turnèo, par 0-6 6-7. In Setémbar la riva par la prima vòlta in di quàrt 'd un turnèo WTA a Taškent baténd prima la Lesja Curenko par 7-6 6-4 e pò la giapunéśa Risa Ozaki par 6-4 3-6 7-6. In sal più bèl la pèrd da la Mandy Minella par 6-7 5-7 (l'éra avànti 4-1 e servìsi in dal prim sét).
Culegamènt estéran
Nòti
- ↑ La stmana ad "Nasty" Burnett Ubitennis.com, 3 'd Agóst dal 2011