Serena Grandi
|
C'l artìcul chè 'l è scrit in
Miranduléś |
.png)
La Serena Faggioli, cgnusùda méj c'n al nóm 'd art ad Serena Grandi (Bulógna, 23 ad Mars dal 1958), l'è n'atōra e 'n persunàǵ televiśìṿ emigliàṅ, dvintàda famóśa dòp avér fat al film Miranda ad Tinto Brass.
Da 'l 1987 a 'l 1993 l'è stada spuśàda c'n al playboy Beppe Ercole avénd-ag sèg un fiōl masć nâ in dal Dicémbar dal 1989, Edoardo.
Biugrafìa
C'n un diplòma da prugramadōra in bisàca la Serena la taca a lauràr in un laburatòri 'd anàliśi ma 'l sò sógn 'l è qvél ad far l'atōra e dònca la partìs par Róma par far di cōrs ad disiòṅ e 'd recitasiòṅ. In dal 1980 la tōś part a soquànti pelìculi cuma Tranquille donne di campagna ad Claudio Giorgi, La cicala 'd Alberto Lattuada, Mia moglie è una strega ad Castellano e Pipolo cun l'Eleonora Giorgi e Renato Pozzetto e Sono fotogenico ad Dino Risi.
Sèmp'r in c'l an lè, druànd al nóm ad Vanessa Steiger, la recìta par Joe D'Amato in dal film cult ad scarésa Antropophagus in dua un móst'r al gh śgranfgna via da la pansa 'l putèṅ ch'la gh'iva dèntar. In dal 1982 la gira dū film ad Pierino, Pierino colpisce ancora (c'n Alvaro Vitali) e Pierino la peste alla riscossa (cun Giorgio Ariani). In dal 1983 la lavóra in dū cumèdi, Tu mi turbi ad Roberto Benigni e Acapulco, prima spiaggia... a sinistra ad Sergio Martino insém a di àtar bulgnéś sò para cuma Gigi Sammarchi e Andrea Roncato. A 'l inìsi di an Utànta la lavóra anc in na televiśiòṅ dl'Emìglia-Rumàgna, Telesanterno.
Al sucès par lē a riva dabòṅ c'n al film eròtic ad Tinto Bras Miranda in dua la fà finalmènt la prutagunìsta. In dal 1987 la gira soquànti cumèdi: Teresa insém a Luca Barbareschi, lè a 'l sò debùt, Rimini Rimini, Roba da ricchi e Abbronzatissima. Insém a la Sabrina Salerno e a la Daria Nicolodi la gira anc al thriller eròtic 'd Lamberto Bava Le foto di Gioia in dua la s cava śò da spés e la fà sès malnét cun George Eastman, pròpria 'l móstar 'd Antropophagus.
La sò caréra la cuntìnua anc in di an Nuànta (a 'rcurdém, fra i àtar, In nome del popolo sovrano ad Luigi Magni e Radiofreccia ad Luciano Ligabue) ma la patìs un brut cōlp in dal 2003 quànd la vèṅ arestàda parchè i gh'ìvan catâ dla cucàina anc se pò la n và mia a prucès parchè la dròga la l'iva tòlta par lē. 'L an dòp la tōś part a 'l reality show ad Raiuno Il Ristorante cundót par l'Antonella Clerici.
La tórna a recìtar a 'l cìnema in dal 2008 c'n un film ad Pupi Avati, Il papà di Giovanna. In dal 2013 la fà la part dla Lorena in dal film Prèmi Òscar La grande bellezza ad Paolo Sorrentino.
Filmugrafìa
- 1980 - Tranquille donne di campagna, regìa ad Claudio Giorgi
- 1980 - La compagna di viaggio, regìa ad Ferdinando Baldi
- 1980 - La cicala, regìa 'd Alberto Lattuada
- 1980 - Mia moglie è una strega, regìa ad Castellano e Pipolo
- 1980 - Sono fotogenico, regìa ad Dino Risi
- 1980 - Antropophagus, regìa ad Joe D'Amato
- 1981 - Teste di quoio, regìa ad Giorgio Capitani
- 1982 - Pierino colpisce ancora, regìa ad Marino Girolami
- 1982 - Pierino la Peste alla riscossa, regìa 'd Umberto Lenzi
- 1982 - Malamore, regìa 'd Eriprando Visconti
- 1982 - Sturmtruppen 2 - Tutti al fronte, regìa ad Salvatore Samperi
- 1983 - Tu mi turbi, regìa ad Roberto Benigni
- 1983 - Acapulco, prima spiaggia... a sinistra, regìa ad Sergio Martino
- 1985 - Miranda, regìa ad Tinto Brass
- 1985 - Le avventure dell'incredibile Ercole, regìa ad Luigi Cozzi
- 1986 - Desiderando Giulia, regìa 'd Andrea Barzini
- 1986 - La signora della notte, regìa ad Piero Schivazappa
- 1987 - Teresa, regìa ad Dino Risi
- 1987 - Rimini Rimini, regìa ad Sergio Corbucci
- 1987 - L'iniziazione, regìa ad Gianfranco Mingozzi
- 1987 - Le foto di Gioia, regìa ad Lamberto Bava
- 1987 - Roba da ricchi, regìa ad Sergio Corbucci
- 1987 - Abbronzatissima, regìa ad Lorenzo Onorati
- 1989 - L'insegnante di violoncello, regìa ad Lorenzo Onorati
- 1990 - In nome del popolo sovrano, regìa ad Luigi Magni
- 1991 - Per odio per amore, regìa ad Nelo Risi
- 1992 - Donne sottotetto, regìa ad Roberto Giannarelli
- 1992 - Saint Tropez - Saint Tropez, regìa ad Castellano e Pipolo
- 1993 - Graffiante desiderio, regìa ad Sergio Martino
- 1994 - Delitto passionale, regìa ad Flavio Mogherini
- 1995 - La strana storia di Olga O, regìa 'd Antonio Bonifacio
- 1997 - Gli inaffidabili, regìa ad Jerry Calà
- 1998 - Monella, regìa ad Tinto Brass
- 1998 - Radiofreccia, regìa ad Luciano Ligabue
- 2008 - Il papà di Giovanna, regìa ad Pupi Avati
- 2008 - Zoè, regìa ad Giuseppe Varlotta
- 2010 - Una sconfinata giovinezza, regìa ad Pupi Avati
- 2013 - La grande bellezza, regìa ad Paolo Sorrentino