Jacuzzi (enpresa)

Jacuzzi (enpresa)
Datuak
Mota	negozioa eta konpainia
Herrialdea	Ameriketako Estatu Batuak
Jarduera
Enplegatuak	4.900
Agintea
Egoitza nagusi	Chino Hills;
Jabea	Apollo Global Management (mul) eta Investindustrial (en)
Historia
Sorrera	1917
Sorlekua	Chino
	webgune ofiziala;

Jacuzzi (jaˈkuttsi ahoskatua) italiar multinazionala da, bainuontziak ekoizten dituena.

Historia

1900an, Pordenonen (Friuli, Italia), Jacuzzi familiak, tartean zazpi anaiek, jaioterritik alde egitea erabaki zuen, Ipar Amerikan bizibidea hobetzeko helburuarekin^[1].

Kaliforniako Berkeleyn ezarri ziren eta anaia zaharrenak makinak maneiatzen hasi ziren lanean. Esperientzia hark lagunduta eta San Frantzisko inguruan egin zuten hegazkin ikuskizun batek inspiratuta, 1915ean Rachel Jacuzzi hegazkinentzako propultsio-helizeak egiten hasi zen. Urte berean Jacuzzi Brothers enpresa sortu zuen anaiekin batera, eta Jacuzzi Toothpick (Jacuzzi txotxa) izeneko helize arrakastatsua merkaturatu zuen. Berehala kabina itxiko lehen hegazkin planobakarra asmatu zuten, eta ale asko ekoiztu behar izan zituzten, AEBetako posta zerbitzuak San Frantziskoko badiatik Yosemitera pertsonak eramateko hegazkin hura aukeratu baitzuen^[1].

Baina 1921ean Giocondo anaia konpainiaren planobakarrean izandako istripu batean hil zen eta, ezbeharra gogoan, enpresak hegazkinak egiteari utzi zion. Hegazkinetako ponpa hidraulikoak egiten pilatutako esperientzia nekazaritzarako ponpak ekoizteko erabili zuten orduan. Jacuzzi ponpa berritzaileak Kaliforniako Estatu Azokako urrezko domina lortu zuen 1931n, negozio lerro berriaren arrakastaren seinale^[1].

1943an, 15 hilabete zituela, Kenneth Jacuzziri erreuma-artritisa eta, beraz, min kronikoa diagnostikatu zioten. Candido Jacuzziren semea hidroterapia saioak hartzen hasi zen inguruko ospitale batean, baina saioek ez zuten oinazea luzaroan arintzen, eta haurra sufritzen ezin ikusita, nekazaritzarako ponpa hidraulikoa etxeko bainuontzian probatzea erabaki zuen aitak. Kennethen osasunak nabarmen egin zuen hobera, eta handik urte batzuetara gaixotasun kronikoak ez zion eragotzi enpresaren gidaritza bere eskuetan hartzea^[1].

Doikuntza batzuk erantsita, Jacuzzik 1955ean merkaturatu zuen ponpa, eta 1968an turrustak integratuta zituen bainuontzia ekoizten hasi zen. Hasieran erabilera terapeutikoarekin lotu arren, Hollywoodeko izarrek luxu bihurtu zuten, eta 1970eko hamarkadan, spa industria modernoarekin batera, ekoizpenak eztanda egin zuen. Jacuzzitarrak 1976 arte izan ziren enpresaren jabe, nahiz eta, hidromasaje bainuontziak ez ziren sekula konpainiaren ekoizpen lerro nagusia izan^[1].

Ikus, gainera

Hidromasajeko bainuontzi

Erreferentziak

↑ ^a ^b ^c ^d ^e Irazustabarrena, Nagore. (2013-03-17). «Jacuzziren semeak burbuilazko bainuak behar ditu» Argia CC-BY-SA lizentzia.

Kanpo estekak

Datuak: Q1122179

[aa-1] Irazustabarrena, Nagore. (2013-03-17). «Jacuzziren semeak burbuilazko bainuak behar ditu» Argia CC-BY-SA lizentzia.

[1]