L'Universitât dal Friûl e à la sêt inte citât di Udin, cun distacaments a Gurize, Pordenon, Glemone, Cormons. Ai 31 di Lui dal 2006 i students regjistrâts a jerin 16.636.
Chê de universitât e je stade une vecje richieste dai furlans, che par studiâ a jerin costrets a spostâsi in altris bandis (Triest, Vignesie, Padue o plui lontan), cul risultât che dome chei che a vevin un pôcs di bêçs si la podevin permeti, e che i plui meritevui par solit no tornavin plui in Friûl. Di cors universitariis a Udin si scomence a fevelâ daspò de Seconde Vuere Mondiâl, cun particolâr riferiment a une facoltât di magistero, leade al studi de lenghe furlane. La lote pe universitât e scomence plui o mancul tai agns Sessante, daspò de istituzion de regjon. Une des primis richiestis e jere chê di vê une facoltât di midisine, stant il numar basson di miedis furlans, puartade indevant tal 1964; ma tal 1965 e fo assegnade ae Universitât di Triest, cul risultât di provocâ manifestazions in place in Friûl. Ma l'unic risultât al fo chel de creazion tal 1968 di un cors di lenghis distacât a Udin de Universitât di Triest, ma simpri in pericul di jessi sierât. Par chest tal 1971 il professôr Tarcisio Petracco, ch'al insegnave grêc e latin al Liceu Stellini di Udin, al decidè di inmaneâ une racuelte di firmis par domandâ une ateneu autonom e complet, tirant dongje ancje int di Pordenon e Gurize, par otignî une Universitât dal Friûl. Subit i politics si declararin cuasi ducj contraris, judicant inutile une altre universitât inte regjon, come une pierdite di sols. Par tignî bogns i furlans a ufrissin cualchi facoltât distacade, ma cence une vere autonomie. Par cheste il Comitât par l'universitât furlane, fondât tal 1972 e di cui Petracco al jere president, al decît di metisi in contat cun l'universitât di Padue. Di chescj contats a vegnin fûr diviersis propuestis, ma in regjon i consilîrs furlan no aprovin, par no "danegjâ l'unitât de regjon". Si decît duncje di fâ une propueste di leç popolâr, cul jutori ancje di personalitâts impuartantis come chê di Ardito Desio, par passâ parsore de opinion contrarie de regjon. Ancje chest al falìs e si scomence tal 1976 a tirâ su firmis par une grande petizion, cul jutori dal clericât furlan, che si veve inschiariât compat dongje dal Comitât. Ai 6 di Mai di chel an al rive l'orcolat a distruzi il Friûl, ma di chê tragjedie e torne fûr plui fuarte di prime la domande par une Universitât dal Friûl, libare e autonome, cun dutis lis facoltâts e no dome chês (pocjis) che no jerin a Triest (difat la regjon a veve simpri sostignût il principi di no vê concorence inte regjon: Udin podeve vê dome chei cors che no jerin za Triest). Ancje chest nol è vonde, ancje pe oposizion de stampe, leade ai partîts. Finalmentri, ai 8 di Avost dal 1977, inte leç pe ricostruzion, a ven includude la universitât, dongje a fuarts contribûts pe universitât di Triest, pûr no tocjade dal taramot. Ancjemò no jere previodude la facoltât di Midisine; tal 1979, a partìs une universitât fantasme, cun dubis sui lûcs e lis stanzis di doprâ pai cors, cun insegnants che a mancjin e cun finanziaments che no jerin vonde pes esigjencis di cui che al veve di scomençâ di nuie. Dopo altris agns di lote, tal 1982 e si rive finalmentri ancje ae istituzion de facoltât di Midisine, ancje se pe aplicazion de leç a si scugnarà spietâ fin al 1986 pe oposizion fuarte dal Ordin dai miedis. Ai 7 di Fevrâr di chel an e ven ancje metude ju la prime piere dal pôl sientific de Universitât, ai Riçs, a nord di Udin, lassant invezit tal centri de citât lis facoltâts umanistichis.
La universitât e jere organizade in dîs facoltâts:
Dopo de riforme Gelmini dal 2010, lìs facòltàs a son stadìs cambìadìs in dipartiments: