Julia de Burgos

Julia de Burgos

(2019)
Biografía
Nacemento	17 de febreiro de 1914 Carolina, Estados Unidos de América ^(pt)
Morte	6 de xullo de 1953 (39 anos) Nova York, Estados Unidos de América
Causa da morte	pneumonía
Educación	Universidade de Porto Rico University High School ^(en)
Actividade
Campo de traballo	Poesía, acción política, xornalismo e engajamento cívico ^(pt)
Lugar de traballo	Porto Rico
Ocupación	poetisa, xornalista, mestre de educación primaria, activista política, dramaturga, escritora, xornalista radiofónica
Partido político	Partido Nacionalista de Porto Rico ^(pt)
Descrito pola fonte	Latinas in the United States: A Historical Encyclopedia American Women Writers Dictionary of Caribbean and Afro–Latin American Biography

Julia Constancia Burgos García, nada en Carolina, Porto Rico o 17 de febreiro de 1914 e finada o 6 de xullo de 1953, coñecida como Julia de Burgos é considerada por moitos críticos como a máis excelsa poeta nada en Porto Rico. Foi tamén partidaria da independencia da illa. Os seus pais foron Consuelo García e Juan de Burgos.^[1]

Traxectoria

Julia de Burgos criouse en Santa Cruz, aldeíña humilde da localidade de Carolina. Isto non a privaría de desenvolver o seu amor pola natureza e polo seu país. Sendo a maior de todos, foi a primeira -de trece irmás e irmáns- en cursar estudos universitarios.

Obtivo o seu título de mestra na Universidade de Porto Rico aos 19 anos de idade, pero o seu amor pola literatura levouna a escribir poesía. Posibles influencias na súa obra serían Luís Llorens Torres, Luís Pales Matos, Clara Lair, Rafael Alberti e Pablo Neruda. Tamén foi mestra na escola elemental Rosa Luz Zayas Cruz, no Sector Feijoo, do Barrio Cedro Arriba en Naranjito.^[2]

En 1936 uniuse a "Hijas de la libertad", rama feminina do Partido Nacionalista de Porto Rico.^[3] Este grupo político, liderado por Pedro Albizu Campos, promovía o ideal de independencia.^[4]

Burgos publicou tres coleccións de poemas. Para os seus dous primeiros libros viaxou pola illa, dándose a coñecer e organizando os seus propios recitais. O seu terceiro libro foi publicado postumamente en 1954.

Casou con Rubén Rodríguez Beauchamp, e novamente —en 1944, en Nova York— con Armando Marín, pero o seu grande amor foi o historiador, médico e político dominicano Juan Isidro Jimenes Grullón, neto do extinto presidente dominicano Juan Isidro Jimenes. Este amor inspiraríalle moitos dos seus poemas. Pero o seu ánimo foi baixando e caeu no alcoholismo. O 6 de xullo de 1953 esvarouse sobre unha beirarrúa neoiorquina e morreu de pulmonía, nun hospital do barrio de Harlem, Nova York, á idade de 39 anos. Debido a que ninguén reclamou o seu corpo, e a que non levaba ningunha identificación, a cidade enterrouna baixo o nome de "Jane Doe". Algúns dos seus amigos, que foron capaces de rastrexala e atopar a súa tumba, reclamaron o seu corpo. Os seus restos foron enviados a Porto Rico. Foi solemnemente enterrada en Carolina e elevouse un monumento no lugar do enterro.^[4]

Entre os traballos destacados de Julia de Burgos atópanse: "Río Grande de Loíza", "Poema para mi muerte", "Yo misma fui mi ruta", "Alba de mi silencio" e "Alta mar y gaviota".^[5]

Viviu dous anos en Cuba, que quedan rexistrados na correspondencia da poeta coa súa irmá.^[6] Na Habana estudou grego, latín e francés.

Feminista

Julia de Burgos, ademais de mostrar o sentimento de amor nos seus poemas, tamén estimulou nas mulleres a liberación feminina. Julia de Burgos fomentou no seu tempo a verdadeira muller portorriqueña a través dos seus poemas, onde plasmou os problemas das mulleres do seu país. Cunha voz de rebeldía e feminista, escribiu obras que ían en contra da norma da sociedade e os convencionalismos da súa época. Obras moi estudadas por Julia de Burgos foron destacadas polo gran contido feminista que trae nos seus versos. Un exemplo dunha obra moi estudada: "Yo misma fui mi ruta", que trata sobre a liberación feminina. Neste poema De Burgos móstrase decidida a ser ela quen manexe a súa vida. Aquí exprésase en desacordo cos mandatos da sociedade. Este poema exhortou ás mulleres da xeración do 30 -quen se achaban nunha loita de poder polos seus dereitos- que tivesen conciencia de tres factores moi importantes: o seu potencial como muller, o manexo das súas propias vidas e non sentirse inferiores.^[4]

Homenaxes

O 19 de febreiro de 1987, o Departamento de Español do Recinto de Humacao da Universidade de Porto Rico homenaxeouna concedéndolle un póstumo doutoramento Honoris Causa en Letras e Humanidades. A proclamación foi presentada á súa sobriña, María Consuelo Sáez Burgos.^[7]

A cidade de San Juan homenaxeou a súa memoria nomeando escolas e avenidas no seu nome. Existe tamén en San Juan a "Casa Protectora Julia de Burgos", que protexe a mulleres sobreviventes de violencia doméstica, e o Museo de Artes y Ciencias Julia de Burgos.

A cidade de Nova York homenaxeouna tamén cun "Centro Latino Julia de Burgos" en Manhattan e un "Centro de Arte Julia de Burgos" en Harlem, próximo ao lugar da súa morte. A poeta neoiorquina Giannina Braschi homenaxeou a Julia de Burgos na súa celebrada novela bilingüe Yo-Yo Boing! e Tomas Batista esculpiu un busto dela, que adorna o Parque Julia de Burgos en Carolina.^[7]

Notas

1. "Julia de Burgos (1914-1953)". www.literatura.us. Consultado o 2019-10-22. 
2. Aguilar, Andrea (2014-10-17). "Poesía en femenino y Julia de Burgos". El País (en castelán). ISSN 1134-6582. Consultado o 2019-10-22. 
3. Pizarro, Yolanda Arroyo (jueves, enero 16, 2014). "Boreales...: Julia de Burgos, guerillera de 'Las Hijas de la libertad'". Boreales... Consultado o 2019-10-22. 
4. "Julia de Burgos. PorCamila Diaz". Historia-Biografía.com. Consultado o 2019-10-22. 
5. "10 Mejores Obras De Julia De Burgos - 2019". yourtripagent.com (en castelán). Consultado o 2019-10-22. 
6. Burgos. Cartas a Consuelo. Ediciones Folium. ISBN 978-0-9826317-8-2. 
7. Per229 (2009-11-27). "Julia de Burgos: Homenajes, Reconocimientos, y Dedicaciones". Julia de Burgos. Consultado o 2019-10-22. 

Véxase tamén

Outros artigos

• Partido Independentista Portorriqueño

Bibliografía

• Gladys Vila Barnés, Hilda E. Quintana, María Cristina Rodríguez. Personalidad y literatura puertorriqueñas. (p.364) ISBN: 978-1-56328-102-0

Ligazóns externas

• Julia de Burgos. Día de las escritoras