Pravčická brána na Suíza bohemia.
Suíza bohemia, (en checo: České Švýcarsko; en alemán: Böhmische Schweiz), tamén coñecida como Suíza checa, é unha rexión do noroeste da República Checa. Atópase na parte checa das Montañas de arenita do Elba, ó norte de Děčín e a ámbalas marxes do río Elba. Esténdese cara ao leste en dirección ós Montes Lusacios e cara ao oeste en dirección ós Montes Metálicos. O seu punto máis elevado é o Děčínský Sněžník e é un espazo natural protexido dende o ano 1972.
A parte da rexión que fica á dereita do Elba converteuse en parque nacional o 1 de xaneiro de 2000, pasando a chamarse Parque Nacional České Švýcarsko e contando cuns 790 km² de superficie protexida. O parque nacional é adxacente ó Parque Nacional da Suíza saxoa (Nationalpark Sächsische Schweiz) en Alemaña.
