Gerhard Rüdiger Gundermann (* 21. februara 1955 we Weimarje; † 21. junija 1998 w Sprjewinym Dole) bě němski spěwytwórc, rockowy hudźbnik a tekstowar za skupiny kaž Silly. Wón bu znaty jako „spěwacy bagrownik z Łužicy“.
Do znowazjednoćenja Němskeje płaćeše Gundermann wosebje jako zastupjer ludźi we Łužiskim brunicowym rewěrje. Někotre z jeho tekstow rozestajichu so jara direktnje z mjeńšimi a wjetšimi problemami ludnosće w rewěrje. Po přewróće wěnowaše so wjace přirodoškitej a nowym socialnym problemam we wuchodnej Němskej.
Husto melancholiske spěwy zaběraja so na jara wosobinske wašnje z powšitkownymi towaršnostnymi problemami, podpěrowane přez Gundermannowe wosobinske nazhonjenja we wšědnym dnju, a skutkuja přez to awtentiske. Sam bě Gundermann wot 1975 do 1997 dźěłał w brunicowej jamje Sprjewiny doł, najprjedy jako pomocny dźěłaćer a pozdźišo jako bagrownik.
Gundermann běše wot 1976 někotre lěta inoficielny sobudźěłaćer (IM) statneje bjezstrašnosće NDR, bu pak w lěće 1984 ze stasi kaž tež ze SED wuzamknjeny dla „principielneje swojowólnosće“.
Wón bě wot lěta 1983 zmandźeleny z Conny a měješe štyri dźěći. Bu pochowany na Wojerowskim lěsnym pohrjebnišću.
W awgusće 2018 wuńdźe hrajny film režisera Andreasa Dresena wo žiwjenju Gundermanna z Alexanderom Scheerom we hłownej roli.