Երկաթե կապ 鉄コミュニケイション | |
---|---|
Ժանր | դրամա, գիտա-ֆանտաստիկ, հակաուտոպիական, մեհա, արկածային |
Երկիր | Ճապոնիա |
Թվական | հունիսի 18, 1996[1] |
Պրեմիերա | 1998 թվականի հոկտեմբերի 5- 1999 թվականի մարտի 29 |
Ռեժիսոր | Տոմոմասա Տակումա |
Սցենարիստ(ներ) | Հիդեո Կատո |
Ընկերություն | WOWOW |
IMDb | ID 0193253 |
Երկաթե կապ (ճապ.՝ 鉄コミュニケイション Կուրոգանե Կոմյունիկեյսյոն), մանգա, որի հեղինակը Հիդեո Կատոն է, իսկ նկարազարդողը՝ Տոմոմասա Տակուման։ Հրատարակվել է MediaWorks հրատարակության Dengeki Daioh ամենամսյա ամսագրում 1997 թվականից։ Ընդհանուր հրատարակվել է 3 հատոր։ 2008 թվականին լիցենզավորվել ու թարգմանվել է անգլիական Go! Comi ընկերության կողմից[2]։
Մանգայի սյուժեի հիման վրա APPP ստուդիան թողարկել է անիմե սերիալ, որը հեռարձակվել է WOWOW հեռուստաալիքով 1998 թվականի հոկտեմբերի 5-ից մինչև 1999 թվականի մարտ 24-ը։
2003 թվականին Միձուհիտո Ակիյաման հրատարակել է 2 հատորանոց նորավեպ, որը հրապարակվել է Ճապոնիայում Dengeki Bunko լեյբլի կողմից։
Գործողություները իրականանում են հեռավոր հետհայտնութենական ապագայում։ Գլխավոր հերոսուհին 13-ամյա Հարուկան է՝ միջուկային պատերազմի ավարտից հետո միակ ողջ մնացած մարդը, որին սառեցրել, իսկ հետո նորից ուշքի են բերել հինգ ռոբոտներ։ Աղջկան հետապնդում են անցյալի հիշողությունները։ Ռազմական ռոբոտների կողմից վտանգ է սպառնում, բայց նրա նոր ընտանիքի անդամները ամեն կերպ պաշտպանում են նրան։ Իսկ ինքը փնտրում է ողջ մնացած այլ մարդկանց։
Պատմության վերջում պարզվում է, որ մարդիկ լքել են Երկիրը ու տեղափոխվել Մարս։ Հարուկային այնտեղ ընդունում են։ Շատ տարիներ անց նա իր աղջկա հետ վերադառնում է Երկիր, որպեսզի տեսնվի իր ընկեր ռոբոտների հետ։
Հարուկա, գլխավոր հերոսուհին, ինչպես նաև Երկրի վրա ողջ մնացած միակ մարդը։ Միջուկային պատերազմի ժամանակ ծնողները նրան սառեցրել են վակուումում։ Նա այնտեղ մնացել է 30 տարի, մինչ նրան նորից ուշքի են բերել ռոբոտները՝ գործողություններից մեկ տարի առաջ։ Նա շատ ուրախ է ու աշխատասեր։ Շատ է սիրում իր նոր ընտանիքի անդամներին։
Սպայկ, սովորական ռոբոտ է, նման է մարդու։ Նրա հիմնական խնդիրն է լինել Հարուկայի կողքին, ինչպես նաև վերանորոգել մեխանիկական սարքերը։
Էնժելա, ռազմական ռոբոտ է, որը արտաքինով նման է 20-ամյա աղջկա։ Ատում է մարդկանց, դրա համար էլ թաքցնում է դեմքը դիմակով։ Ցանկանում էր, որ ռոբոտները սպանեն Հարուկային, ոչ թե արթնացնեին։ Հետագայում նրա ու Հարուկայի հարաբերությունները լավանում են։ Նրա հանձնարարությունն է պաշտպանել Հարուկային ու մյուս ռոբոտներին վտանգներից։
Ռիվզ, կնոջ նման ռոբոտ է, որը հոգում է կենցաղային կարիքները օրինակ՝ կերակուր է պատրաստում։ Երբեմն հանդես է գալիս որպես Հարուկայի հայրը։
Կլերիկ, հավաքում է տեղեկատվական տվյալներ ու վերամշակում դրանք։ Նաև հանդես է գալիս որպես Հարուկայի ու մնացածի ուսուցիչ։ Անց է կացնում ամենօրյա դասընթացներ։
Տրիգեր, գնդանման ռոբոտ է, որը սիրում է հավաքել զենքեր։
Կանատո, Հարուկայի տարիքի մարդ է։ Նրան հետագայում ավերակներից գտնում է Հարուկան։ Ի տարբերություն աղջկա՝ նա ատում է բոլոր ռոբոտներին ու մեքենաներին։ Չնայած ապրում էր իր ռոբոտ մոր հետ, նրա հանդեպ ունի հակասական զգացմունքներ․ և՛ ատում է նրան, և՛ հարգում։ Հարուկային հանդիպելուց հետո սիրահարվում է նրան։
Հորնի, ռոբոտ որը պաշտպանում է Կանատոյին։ Նա ևս ռազմական ռոբոտ է և ծրագրավորված է այնպես, որ ոչնչացնի բոլոր մարդկանց, բացի Կանատոն։
Լիլիթ և Էլիս, Կանատոյի պաշտպանները։ Նրանք արտաքնապես նման են երկվորյակ պատանիների։ Նրանք շատ նվիրված են իրենց տիրոջն ու ցուցաբերում են մարդկային սիրո նշաններ։
|