Sepur Listrik Komuter
Sepur listrik Komuter utawa KRL Commuter Line ya iku tata tetumpakan rikat mubeng kanthi ril listrik sing dioperasikaké déning PT Kereta Commuter Indonesia (KAI Commuter), [1] anak parusahan saka PT Kereta Api Indonesia (Persero) (PT KAI). KRL wis ana ing tlatah Jakarta wiwit taun 1925, nganti saiki nglayani jalur mubeng ing tlatah Jabodetabek uga jalur Yogyakarta-Solo.
Layanan iki biyen karan KRL Jabotabek wiwit taun 1970-an, banjur sawisé ana pamekaran Kutha Depok taun 1999, layanan ini diarani KRL Jabodetabek . Biyèn layanan iki dikelola déning Divisi Angkutan Perkotaan Jabotabek, bebadan kang dibentuk déning PT KAI (Persero) Nalika taun 2008, layanan KRL dioperasikaké déning parusahan anyar karan PT KAI Commuter Jabodetabek sing banjur owah manèh dadi Kereta Commuter Indonesia (KCI, saiki KAI Commuter).
KRL duwé sajarah kang lumayan dawa saha ora mulus. KRL kawanuhaké dening Hindia Walanda wiwit taun 1925 kanggo mengeti 50 taun Staatsspoorwegen operasi ing Jawa. Wiwit taun 1960-an, tetumpakan listrik ing Jakarta ana ing mangsa angèl dhéwé amarga dicap njalari macet saéngga Tram Batavia ditutup lan KRL diwatesi. Ing taun 1970-an, KRL banjur ngalami regenerasi kanthi anane KRL Rheostatik sing ditekaaké saka Jepang. Saiki KRL paling akeh nggawé armada KRL bekasé Jepang, lan sisané nggawé sepur yasan PT INKA, Madiun.