Laurent Witz

Laurent Witz
Gebuer	21. November 1975 Haguenau
Nationalitéit	Frankräich
Aktivitéit	Filmproduzent, Animateur, Filmregisseur

De Laurent Witz, gebuer den 21. November 1975 zu Haguenau, ass e franséischen Animateur a Filmproduzent.

Hien huet op der École supérieure d'art de Lorraine zu Metz studéiert a scho wärend sengem Studium tëscht 1997 an 1998 4 Animatiounsfilmer realiséiert. Wéi een 3D-Animatioun mécht, huet hie sech selwer bäibruecht.^[1] Zanter 2002 lieft hien zu Lëtzebuerg wou en als Animateur vun ë. a. dem éischte Lëtzebuerger Animatiouns-Laangfilm Roman de Renart matgeschafft huet.

2007 huet hien d'Produktiounsfirma ZEILT Productions gegrënnt, an 2010 d'Firma WATT Frame. Nieft Animatiouns-Reklammsfilmer hunn déi zwou Produktionsfirmen och 2012-2013 de Kuerzanimatiounsfilm Mr Hublot ausgeschafft, fir deen de Witz zesumme mam Co-Regisseur Alexandre Espigares 2014 den Oscar an der Kategorie Beschten animéierte Kuerzfilm krut.

Filmographie (Auswiel)

• 2007: Roman de Renart
• 2013: Mr Hublot

Gielercher

• Officier vum Ordre de Mérite du Grand-Duché de Luxembourg (Promotioun 2014)^[2]

Um Spaweck

• IMDb
• Biographie vum Laurent Witz am Presseheft fir Mr Hublot, S. 7.
• Kuerzbiographie vum Laurent Witz op arte.tv
• Websäit vun ZEILT Productions

Referenzen

1. Kuerzbiographie op der Websäit vum Warsaw Film Festival 2014.
2. Eng Première op engem 23. Juni Fir nozedenken, fir e Gesamtbild, fir Eenegkeet... op rtl.lu