Stéphane Bern

Stéphane Bern
Gebuer	14. November 1963 Lyon
Nationalitéit	Frankräich, Lëtzebuerg
Educatioun	Emlyon Business School
Aktivitéit	Radiosspeaker, Televisiounsmoderateur, Schauspiller, Journalist, Kolumnist

De Stéphane Bern kommentéiert d'Prënzenhochzäit zu Lëtzebuerg, Oktober 2012.

De Stéphane Bern, gebuer de 14. November 1963 zu Lyon, ass e franséisch-lëtzebuergesche^[1] Journalist, Radio- an Tëlevisiouns-Animateur a Schrëftsteller. Hien ass bekannt als Spezialist vun de Kinnekshaiser an dem Adel am Allgemengen an och senger Emissiounssérie Secrets d'histoire op France 2.

De Stéphane Bern huet franséisch (vu sengem Papp hier) a lëtzebuergesch (vu senger Mamm hier) Originnen. Als Kand huet hie seng Schoulvakanzen zum Deel bei senge Grousselteren zu Lëtzebuerg verbruecht. Hie seet vu sech hie wir (och) Lëtzebuerger.^[2] Hien huet ufanks 2017 déi lëtzebuergesch Nationalitéit ugefrot déi fir den 1. Abrëll soll accordéiert ginn.^[3]

Seng Publikatiounen, an deenen d'Lëtzebuerger Land mat vill Sympathie thematiséiert gëtt (Mon royaume à moi, Mon Luxembourg, asw.), gi jiddefalls an d'Richtung vum Nation branding, onofhängeg vun deem, wat d'Regierung versicht z'erreechen.

Biographie

No sengem Bac am Lycée Carnot zu Paräis huet de Stéphane Bern op der École supérieure de commerce zu Lyon studéiert (Promotioun 1985).

Hien huet sech ëffentlech zu senger Homosexualitéit bekannt.^[4]

Journalistesch Karriär

De Stéphane Bern als Animateur an der Emissioun Le Fou du roi op France Inter am Joer 2003.

Geschriwwe Press

Vun 1985 bis 1987 huet de Stéphane Bern fir d'Zäitschrëften Dynastie, Voici a Jours de France geschriwwen. Zanter 1999 ass hie Rédacteur en chef adjoint vun der Zäitschrëft Le Figaro Madame

Radio

De Stéphane Bern huet Emissiounen op Europe 1 (vun 1992 bis 1997) a France Inter (Le Fou du roi, 2000 bis 2011) animéiert a produzéiert. Zanter 2011 presentéiert hien d'Emissioun A la bonne heure op RTL (Paräis).

Televisioun

1994 huet hie säin Debut op der Televisioun ginn, wou hien Emissiounen op TF1, Canal+, France 2 a France 3 animéiert huet.

Artistesch Karriär

Kino

Vun 2001 un ass de Stéphane Bern an enger Rëtsch Filmer als Schauspiller opgetrueden.

Theater

2006 huet de Stéphane Bern am Stéck Numéro complémentaire vum Jean-Marie Chevret matgespillt.

Publikatiounen (Auswiel)

• L'Europe des rois (mat enger Preface vum Otto von Habsburg), éd. Lieu commun, Paris, 1988.
• « God Save the Queen » ! Cinquante ans de tempête chez les Windsor, éd. Michel Lafon, Paris, 1998.
• Lady Di, éditions Flammarion, Paris, 1998.
• Rainier de Monaco et les Grimaldi, éd. L'Archipel, Paris, 1999.
• Mon royaume à moi; Paräis (Albin Michel), 2000.
• Un si joli monde, roman, éd. Flammarion, Paris, 2006.
• Plus belle sera la vie, roman, éd. Plon, Paris, 2007.
• Oubliez-moi, éd. Flammarion, Paris, 2009.
• Une vie de chien. Les animaux chéris des grands de ce monde, éd. Albin Michel, Paris, 2009.
• Secrets d'histoire, éd. Albin Michel, Paris, 2010.
• Le Destin d'une reine, éd. Flammarion, Paris, 2012.
• Mon Luxembourg; Paräis (Flammarion), 2016.
• Un amour souverain; zesumme mat der Groussherzogin Maria-Teresa, (Albin Michel), 2021. - E Billerbuch mat Kommentaren zum 40. Anniversaire vum Bestietnes mam deemolegen Ierfgroussherzog Henri.
• La vie retrouvée d'un Collège Royal; Paräis (Albin Michel), [Sept.] 2022. - De Stéphane Bern erzielt an engem flott illustréierte Band d'Geschicht vun enger fréierer Militärschoul, dem Collège royal et militaire de Thiron-Gardais, déi hien opkaaft, restauréiert an zu sengem Wunnsëtz gemaacht huet.

Gielercher^[5]

• Commandeur avec couronne vum Ordre de Mérite civil et militaire d'Adolphe de Nassau (Promotioun 2013)
• Officier vum Ordre de Léopold (Promotioun 2012)^[6]
• Chevalier vum Ordre de Grimaldi (Promotioun 2011)
• Officier vum Ordre des Arts et des Lettres (Promotioun 2010)

Um Spaweck

Commons: Stéphane Bern – Biller, Videoen oder Audiodateien

• Websäit vum Stéphane Bern
• De Stéphane Bern op der Websäit vun der Zäitschrëft VSD
• Gotha-Websäit vum Stéphane Bern

Referenzen an Notten

1. Télé Star vum 26. Oktober 2017. « Stéphane Bern est devenu Franco-luxembourgeois mais ce n'est pas une question d'impôts ! »
2. Interview mam Stéphane Bern am Luxemburger Wort vum 19. Oktober 2012, S. 6.
3. Stéphane Bern wird Luxemburger op wort.lu vum 12. Februar 2017
4. An der Zäitschrëft Tëtu vum Oktober 2009 an och an der Emissioun Vie privée, vie publique vun der Mireille Dumas vum 6. November 2003 op France 3.
5. Biographie vum Stéphane Bern op www.voici.fr
6. Stéphane Bern devient Officier de l'Ordre de Léopold op www.7sur7.bel