Maria van der Hoeven
- Dit artikel is gesjreve in 't Valkebergs. Ómdat 't plaatsgebónge is, maogs doe 't ómzètte nao 't Meersjes, es te dit dialek sjpriks.
Maria Josephina Arnoldina (Maria) van der Hoeven (Meersje, 13 september 1949) ies 'n Nederlandse CDA-politica. Zie waor minister van Ónderwies, Cultuur en Weitensjap. In 't kabinet-Balkenende IV is ze minister van Economische Zake.
Van der Hoeven doorleep de MULO en deeg vervolges de kweeksjoal (mèt hoofakte) in Mestreech. Zie volgde de opleijing MO-A Ingelsj en de opleijing bedriefskunde KHBO aan de Ope Universiteit in Heerle.
Van 1974 tot 1991 waor zie names 't CDA lid van de gemeinteraod van Mestreech. Daoneve waor zie achtereinvolges docent, sjoaldecaan en directeur van 2 opleijingsinstitute. In 1991 woort ze lid van de Twiède Kamer. Ze bleef kamerlid bies 2002; de lètste veer jaor waor zie fractieveurzietter van 't CDA.
Op 22 juli 2002 woort Van der Hoeven minister van Ónderwies in 't Kabinet-Balkenende I. Ze ies de ièrsjte vrouw die dees functie vervölde. Vanaaf 27 mei 2003 haet zie dezelfde functie in 't Kabinet-Balkenende II.
Van der Hoeven houw reigelmaotig aanvaringe mèt Annette Nijs, sjtaatssecretaris van Ónderwies in de kabinette Balkenende I en II. In juni 2004 uutde Nijs in 'n interview kritiek op häör relatie mèt de minister, woanao Nijs nao 'n sjpoeddebat häör óntsjlaag indeende.
In 2007 woort zie óngersjeije mèt de Orde van de Gulden Humor, 'ne pries van de gezamelike Limburgse carnavalsvereiniginge.