Anton Staus (* 5. September 1872 in Heidelbarg-Handschuhsheim; † 21. Juli 1955 in Pullach bi München) weer en düütschen Maschienboer un Astronom.
Staus hett Maschienbo an de Technische Hoochschool in Karlsruhe studeert, woneem he 1904 sien Dr.-Ing. maakt hett. Dorna hett he as Dozent arbeit. 1914 kregg he en Roop an de Staatliche Ingenieursschool in Esslingen an’n Necker. Eerst künn he de Steed nich wohrnemen, vunwegen dat de Eerste Weltkrieg losbreken de. He hett in de Tiet in’n Rang vun en Leutnant as Ballonbeobachter an de Westfront deent. Eerst in’n November 1918 künn he sien Professur in Esslingen opnehmen. Dor hett he sik ünner annern mit Warmskraftmaschienen befaat. Al 1930 is he in’n Rohstand versett worrn, wegen en lieden, dat he sik in’n Krieg totogen harr. Dat glieke Johr is he na Pullach ümtogen.
Blangen den Machienbo hett sik Staus intensiv mit de Astronomie ut’nannersett un sik üm’t Verbetern vun Teleskopen un jemehr Monteren bemöht. As Schöler an’t Gymnasium hett he dör en Fründschop twüschen Familien den Astronom Max Wolf drapen, de in Heidelbarg en egene Steernwacht inricht harr un sik mit dat fotograafsche Opdecken vun Asteroiden befaat hett. An’n 1. September 1892 hett Staus op en fotograafsche Plaat den Asteroid (335) Roberta opdeckt. Dat weer de twölfte Asteroid, de över de Fotografie opdeckt worrn is.
In Karlsruhe-Rüppurr hett sik Staus 1905 en private Steernwacht inricht mit en Feernrohr as Hööftinstrument, dat en Apen vun 20 cm harr. He hett Max Wolf bi de Konstrukschoon vun dat „Bruce-Teleskop“ ünnerstütt. Wegen sien ümfangriek Weten bi de Konstrukschoon vun Teleskopen is he faken vun professchonelle as ok Amateurastronomen opsöcht worrn, de em üm Raat fraagt hebbt. So hett Staus to’n Bispeel Anton Kutter sien Entwickeln vun’n Scheefspegler anstött. Sien Insichten hett he in dat Book Fernrohrmontierungen und ihre Schutzbauten für Sternfreunde publiek maakt, dat 1952 rutkamen is un bit hüüt tallrieke Amateurastronomen to’n Sülvstbo anleidt hett.