Michel Pignolet de Montéclair (döfft an'n 4. Dezember 1667 as Michel Pignolet in Andelot, Haute-Marne; † 22. September 1737 in Domont) is en franzööschen Komponist ut de Tied vun dat Barock ween.
An'n 27. Januar 1676 is he as Chorjungen an de Kathedraal vun Langres upnahmen wurrn. Baas weer dormols Jean-Baptiste Moreau.
1687 hett he sik in Paris daallaten. Dormols hett he den Binaam „de Montéclair“ annahmen, na eene bekannte Festung, de nich wiet af vun siene Vaderstadt liggen dö.
Vun 1699 af an hett he in de „Académie Royale de Musique“ den „Basse de Violon“ speelt. Dat is en Instrument, liek as dat Cello, man bi 10 cm länger. 1709 hett he siene „Nouvelle méthode pour apprendre la musique“ (Ne'e Methode, um de Musik to lehren) rutbröcht. Up dat Titelblatt nömmt he sik den „Kapellmeester vun den Prinzen vun Vaudrément“. Mit em weer he up Reisen in Italien ween. Dat warrt annahmen, datt he dor lehrt hett, den Kontrabass to speelen. Montéclair weer en ganz wunnerboren Lehrer, unner annern hett he een vun François Couperin siene beiden Döchter Unnerricht geven. Siene neemodsche Methode schall de Schölers mit Freid un Spaaß an de Musik ranbröcht hebben un nich mit Strenge, so, as dat in't Protokoll vörsehn weer. 1721 grünn he mit sien Brodersöhn François Boivin en Musikhannel an de Rue St. Honoré in Paris. Dor weer ok de Verlag "à la règle d’or" unnerbrocht, de de meisten vun siene Kompositschonen un ok Warke vun annere Komponisten rutbröcht hett. 1728 hett Montéclair sien Andeel an Boivin verköfft. Vunwegen, datt he mehr Tied hebben woll för dat Orchester un för de Kompositschoon, hett he vun 1735 af an keen Unnerricht mehr geven. Vun Juli 1737 af an kreeg he en Rente vun'n König. Dree Maande later weer he al dood.
Montéclair warrt, tohopen mit André Campra, as de Musiker ankeken, de an'n meisten up Jean-Philippe Rameau inwarkt hett. In siene Orchesterstücke fallt up, datt se een dramaatsche Farv hefft, sunnerlich in sien Flötenkunzert La Guerre (de Krieg) kümmt de na vörn. För dat Vöranbringen vun de franzöösche Kantate hett he en ganzen Barg bidragen.