Tomaž Humar (* 18. Februar 1969 in Ljubljana, Jugoslawien, heute Slowenien; † 10. November 2009 am Langtang Lirung, Nepal) weer en sloweensch Bargstieger.
He is in Kamnik upwussen un in de dicht bi liggend Steiner Alpen fung he ok mit dat Bargstiegen an. Siet Midden vun de 1990er Johren besteeg he Bargen in den Himalaya. In’ Oktober 1997 besteeg he tosommen mit Janez Jeglič den Nuptse; nahdem beid den Gipfel erreicht harrn, wurr Jeglič vun den Storm mitreeten un keem to Dood. Humar wurr ut den Sloweensch Alpenvereen utsloten, wiel man dor sien Neigung, ok bi ungünstig Weerbedingungen, wiedertogahn un dorbi ok dat Leven vun Annern to riskieren, aflehnt hett. Humars latere, privat sponsort Touren wurrn vun sein Mitarbeiters in dat Basiscamp live up sien Homepage dokumenteert, so sien spektakulär Upstieg up de Süüdwand vun de Dhaulagiri. Bi Arbeiten an sien Huus in’ Oktober 2000 is he ut 3 Meter Hööcht fallen un hett sück dorbi swoor Verletzungen totrucken. In dat Johr 2005 bleev he bi den Upstieg an de Nanga Parbat wegen schlecht Weer stecken; up Drängen vun de sloweensch Regeeren ünnernehm denn de pakistaansch Luftwaffe en för de Besatzung levensgefährlich Rettungsaktion per Helikopter.
Bi de Upstieg up den Langtang Lirung hett sück Humar an’ 9. November 2009 en Been braken; he hett denn mit en Satellitentelefon Hülp anfordert un sück to’n letzten Mal an’ 10. November meldt. Sien Liek hebbt se an’ 14. November burgen.