Vernon Harrison Courtenay

Vernon Harrison „Harry“ Courtenay (* 1932; † 15. August 2009 in Ladyville) weer en Avkaat un Politiker ut Brietsch-Honduras/Belize (PUP).

Tohoop mit Assad Shoman, Said Musa un C. L. B. Rogers warrt he as een von de Vaders von de Verfaten von Belize ansehn, de 1981 beslaten worrn is.[1]

Leven

[ännern | Bornkood ännern]

Courtenay is 1932 as Söhn von Woldrich Harrison Courtenay boren un hett Juristeree studeert.[2] 1960 is he as Avkaat in England un Belize tolaten worrn un weer Maat von Lincoln’s Inn.[2] He hett in Belize-Stadt as Avkaat in de Kanzlie W. H. Courtenay & Co. praktizeert, de sien Vader grünnt harr.[3] Later hett he de Kanzlie övernahmen.

He weer verheiraadt mit Audrey Courtenay (1931/1932–2012).[4] De beiden harrn fiev Kinner, ünner annern Eamon Courtenay, de ok as Politiker in Belize aktiv weer.[4]

Courtenay is na längere Krankheit an’n 15. August 2009 in sien Huus in Ladyville doodbleven.[5][3] Sien Truurfier weer an’n 19. August in de St Mary’s Church in Belize-Stadt.[3]

Politik

[ännern | Bornkood ännern]

Bi de Parlamentswahl in Belize 1969 weer he Kannedaat för de PUP in’n Wahlkreis Collet un hett de Wahl mit 50,5 % von de Stimmen gegen Edward Flowers von de NIP wunnen. Ok bi de Wahlen 1974 (46,8 % von de Stimmen gegen Kenneth Tillett, UDP, un Evan X Hyde, UBAD) un 1979 (52,0 % gegen Kenneth Tillett, UDP) hett he sik in’n sülven Wahlkreis wedder dörsett.

Dormit weer he von 1969 bet 1984 Afornten von dat Repräsentantenhuus von Belize.

Ünner Premier George Cadle Price is he 1969 Generaalstaatsanwalt von Belize worrn. Tosätzlich hett he för en Tied ok dat Amt as Minister för Apentliche Arbeiden övernahmen.

1974 hett Assad Shoman em as Generaalstaatsanwalt aflööst. Courtenay is aver as Minister ahn Portfolio in dat Kabinett bleven.

1979 is he in dat Kabinett Price I Butenminister worrn. Dat Butenministerium hett he aver 1981 mit de Unafhängigkeit von Belize an George Cadle Price afgeven. Courtenay weer denn Staatsminister in dat Büro von’n Premierminister.

Von 1983 bet 1984 weer he denn wedder Butenminister. Nadem C. L. B. Rogers an’n 6. Januar 1984 ut dat Kabinett utscheden is, hett Courtenay von em dat Amt as Binnenminister övernahmen. Von’n 17. Januar 1984 bet 17. Dezember 1984 weer Courtenay tosätzlich ok wedder Generaalstaatsanwalt.

Twüschen 1984 un 1989 weer he denn för de PUP as Oppositschoonspartei Maat von’n Senaat von Belize.

Footnoten

[ännern | Bornkood ännern]
  1. ↑ Chronological History of Belize Constitution
  2. ↑ a b The International Law List. L. Corper-Mordaunt & Company, 1998, Sied 108
  3. ↑ a b c Former minister V.H. Courtenay passes away, Channel 5 Belize an’n 17. August 2009
  4. ↑ a b Rochelle Gillett: Funeral services for the late Audrey Courtenay Amandala an’n 27. März 2012
  5. ↑ Harry Courtenay, Dead at 77, 7 News Belize an’n 17. August 2009
Butenministers von Belize

1981–1983: George Cadle Price | 1983–1984: Vernon Harrison Courtenay | 1984–1989: Dean Barrow | 1989–1993: Said Musa | 1993–1998: Dean Barrow | 1998–2002: Said Musa | 2002–2003: Assad Shoman | 2003–2006: Godfrey Smith | 2006–2007: Eamon Courtenay | 2007–2008: Lisa Shoman | 2008–2020: Wilfred Elrington | 2020–: Eamon Courtenay

 
Generaalstaatsanwält von Belize

1981–1984: Said Musa | 1984: Vernon Harrison Courtenay | 1984–1986: Hubert Elrington | 1986–1989: Dean Barrow | 1989–1993: Glenn Godfrey | 1993–1998: Dean Barrow | 1998–1999: Richard Bradley | 1999–2003: Godfrey Smith | 2003–2004: Eamon Courtenay | 2004–2008: Francis Fonseca | 2008–2010: Wilfred Elrington | 2010–2012: Bernard Q. Pitts | 2012–2015: Wilfred Elrington | 2015–2017: Vanessa Retreage | 2017–2020: Michael Peyrefitte | 2020–: Magali Marin-Young