Berit var eit varsla ekstremvêr utstedt 25. november 2011 for Møre og Romsdal, Sør-Trøndelag, Nord-Trøndelag, Helgeland, Salten, Ofoten og Lofoten. Varselet gjaldt ein kombinasjon av kraftig vind, høge bølgjer og særs høg vasstand fredag den 25. og laurdag den 26. november. Skadane etter ekstremvêret vart estimert til 50 millionar kroner.
Uvêret vart etterfølgd den 27. november av eit nytt kraftig uvêr som råka Vestlandet. Dette førte òg til store øydeleggingar og fleire ras. Ein mann i Bergen miste livet då eit tre blåste over han, medan to personar truleg mista livet i Rogaland då dei vart skylt på havet av store bølgjer medan dei gjorde filmopptak. Dette uvêret hadde derimot ikkje status som ekstremvêr.
Dette var det første ekstremvêret sidan januar 2010.
Eit særs ustabilt område i Atlanterhavet, som kunne minna om starten på ein tropisk syklon, slo seg saman med eit ekstratropisk lågtrykk i Norskehavet. Dei sørvestlege vindane frå Atlanterhavet og heile vegen til Norskehavet gjorde at bølgjene fekk særs gode tilhøve til å byggje seg opp, samt at vatnet vart stuva opp mot kysten og medførte den høge vasstanden.
I Nordland, og særleg i Lofoten, vart fleire rorbuer og kaiar knust av stormen, medan det vart heller få skadar i Møre og Romsdal.
Fleire av sendarane til Netcom vart råka av uvêret og 20-30 av sendarane frå Sogn og Fjordane til Nordland hadde problem.
Det vart i tillegg til vind og sjø, registrert kring 2500 lynnedslag i nesten heile landet. Dei fleste lynnedslaga råka derimot Vestlandet og Trøndelag.
Fleire oljeplattformar i Norskehavet måtte stenge produksjonen då det var varsla maksimale bølgjehøgder opp mot 30 meter, noko det òg vart. Heidrun målte mellom anna signifikant bølgjehøgd opp i overkant av 14 meter.
Fleire stader i Nord-Noreg sette nye rekord for høg vasstand.
| Stad | Ny rekord (cm) | Gammal rekord (cm) |
|---|---|---|
| Bodø | 413 | 404 (1979) |
| Kabelvåg | 428 | 422 (1949) |
| Harstad | 334 | 309 (1983) |
| Andenes | 329 | 320 (1973) |
| Harstad | 335 | 309 (1983) |
| Tromsø | 383 | 367 (1967, 1978 og 1993) |
| Hammerfest | 380 | 376 (1993) |
| Honningsvåg | 379 | 369 (1993) |
| Vardø | 431 | 414 (1993) |
To stader, Nordøyan fyr og Kråkenes fyr målte vind opp i orkan styrke, medan fem stader hadde sterk storm.
| Stasjon | Middelvind (m/s) |
Vindkast (m/s) |
|---|---|---|
| Nordøyan fyr | 34,4 | 42,8 |
| Kråkenes fyr | 34,1 | 41,5 |
| Ona | 31,5 | 45,8 |
| Sklinna fyr | 30,1 | 37,5 |
| Halten fyr | 29,9 | 37,9 |
| Sula | 29,6 | 37,2 |
| Veiholmen | 28,6 | 36,0 |
| Myken | 27,6 | 34,8 |
| Ørland | 26,8 | 35,1 |
| Rørvik | 26,3 | 34,0 |
| Vigra | 24,2 | 32,3 |
| Helligvær | 24,1 | 32,0 |
| Værøy | 23,2 | 28,8 |
| Fedje | 22,5 | 28,5 |
| Slåtterøy fyr | 21,9 | 32,1 |
| Andøya - Trolltindan | 21,7 | 27,3 |
| Røst | 21,5 | 28,5 |
| Molde | 21,5 | 28,0 |
| Sandnessjøen | 21,3 | 26,6 |
| Kvamsøy | 21,1 | 28,0 |
| Solvær | 21,0 | 29,5 |
| Skrova fyr | 21,0 | 29,3 |
| Ytterøyane fyr | 21,0 | 27,3 |
| Reipå | 20,9 | 26,0 |