Finansdepartementet i Noreg
- For finansdepartement i andre land, sjå Finansdepartement
| Finansdepartementet (FIN) | |||
 | |||
| Offisielt namn | Finansdepartementet, Finans- og tolldepartementet, Finans-, handels- og tolldepartementet | ||
|---|---|---|---|
| Type | Departement | ||
| Virkefelt | Noreg | ||
| Skipa | 1814[1] | ||
| Org.nummer | 972417807 | ||
| Statsråd | Trygve Slagsvold Vedum (Sp) | ||
| Hovudkontor | Akersgata 40, Oslo | ||
| Undergrupper | Regjeringa i Noreg | ||
| Tilsette | 314 (2014)[2] | ||
| Jurisdiksjon | Noreg | ||
| Nettside | https://www.regjeringen.no/no/dep/fin/ | ||
Finansdepartement i Noreg skal planlegge og setje i verk den økonomiske politikken, samordne arbeidet med statsbudsjettet, syte for at det offentlege får inn skattar og avgifter, og overvake og utarbeide reglar for tilsyn og verksemd i finansmarknadane.
Finansdepartementet blei oppretta i 1814, etter at Noreg erklærte seg som ein sjølvstendig stat. Departementet skulle vareta viktige oppgåver for den nye nasjonen knytt til økonomien og finansane i staten.
Finansdepartementet er rekna som det mektigaste departementet i Noreg, fordi dei fleste forslag frå andre departement har økonomiske konsekvensar som blir analysert og vurdert av Finansdepartementet.
Departement held til i den gamle regjeringsbygningen («G-blokka») i Akersgaten 40 i Oslo.
Organisasjon
[endre | endre wikiteksten]Departementet er delt inn i seks fagavdelingar, i tillegg til administrasjonsavdelinga og informasjonseininga. Det har i alt om lag 300 tilsette, der dei fleste er samfunnsøkonomar, juristar eller siviløkonomar.
- Økonomiavdelinga samordnar den økonomiske politikken, og trekkjer blant anna opp rammer for bruken av oljepengar over statsbudsjettet. Denne avdelinga har ansvar for å lage prognosar for den økonomiske utviklinga i Noreg, og lagar Nasjonalbudsjettet blant anna på bakgrunn av desse. Avdelinga står også for dei fleste analysane i Langtidsprogrammet. Økonomiavdelinga vedlikeheld og forvaltar dei fleste av dei makroøkonomiske modellane som departementet rår over. Avdelinga har også ansvaret for å lage regelverket for pengepolitikken. Økonomiavdelinga har etatsansvar for Statistisk sentralbyrå.
- Finansavdelinga har ansvaret for å utarbeide Statsbudsjettet kvar haust og Revidert nasjonalbudsjett kvar vinter, og har etatsstyringsansvar for Senter for statleg økonomistyring. Avdelinga forhandlar bilateralt med kvart departement gjennom budsjettprosessen.
- Skattelovavdelinga har ansvaret for skatte- og avgiftslovgjevinga og har etatsstyringsansvar for Skatteetaten og Toll- og avgiftsetaten. Skattelovavdelinga utarbeider også forskrifter og rundskriv som presiserer skattelovgjevinga, og har hovudansvaret for arbeid med endring av denne.
- Skatteøkonomisk avdeling analyserer konsekvensar av skattesystemet, og har hovudansvaret for provenyutrekningar knytte til både regjeringa sin skatte- og finanspolitikk, og dei forslaga som opposisjonen i Stortinget kvar haust sender departementet for å få utarbeidd konsekvensanslag for forslaga. Avdelinga rår over makroøkonomiske modellar som analyserer realverknaden av ulike skattereglar.
- Finansmarknadsavdelinga har ansvaret for finansmarknadslovgjevinga og etatsstyringa for Kredittilsynet. Inntil 2007 forvalta også avdelinga Regjeringen sin eigarpost i banken DnB NOR, men forvaltinga av denne eigarposten er sidan flytta til NHD.
- Avdeling for formuesforvalting utformar investeringsstrategien for Statens pensjonsfond - Noreg, («Folketrygdfondet») og Statens pensjonsfond - Utland («Oljefondet»). Avdelinga har oppfølgingsansvar for Noregs Bank, som forvaltar Statens pensjonsfond - Utland på vegner av departementet, og for Folketrygdfondet som er blitt delegert oppgåva med forvaltinga av Statens pensjonsfond - Norge.
Departementet sine underordna etatar er:
- Statistisk sentralbyrå
- Kredittilsynet
- Toll- og avgiftsetaten
- Skatteetaten
- Senter for statleg økonomistyring
I tillegg forvaltar departementet staten sine eigarinteresser i særlovselskapet Folketrygdfondet.
Departementet har fagansvaret for lov om Norges Bank og pengevesenet, men Noregs Bank har ei sjølvstendig stilling i høve departementet. Banken kan berre instruerast av Kongen i statsråd, jf. sentralbankloven § 2.
Leiinga i departementet
[endre | endre wikiteksten]Politisk leiing
[endre | endre wikiteksten]Statsråd og sjef for Finansdepartementet (finansminister) er sidan 20. oktober 2021 Trygve Slagsvold Vedum frå Senterpartiet. Han blir bistått av fleire statssekretærar og politiske rådgjevarar.[3]
Administrativ leiing
[endre | endre wikiteksten]Øvste administrative leiar er finansråd Hans Henrik Scheel frå 1. februar 2015.[4] Kvar av avdelingane blir leia av ein ekspedisjonssjef, som i dei aller fleste tilfelle har rykt opp som interne kandidatar frå departementet sitt eige embetsverk.
Sjå òg
[endre | endre wikiteksten]Kjelder
[endre | endre wikiteksten]- ↑ Om Finansdepartementet
- ↑ Talet på tilsette i følge Norsk samfunnsvitenskapelig datatjenestes forvaltningsdatabase
- ↑ «Erna Solbergs regjering 2013 -», regjeringen.no
- ↑ Finansdepartementet (1. februar 2015), «Finansråd Hans Henrik Scheel», Regjeringen.no (på norsk), henta 21. juni 2022
- Finansdepartementet
- NSDs forvaltningsdatabase Finansdepartementets organisasjonshistorikk Arkivert 2014-05-17 ved Wayback Machine.