Florian Schwarthoff

Florian Schwarthoff
Statsborgarskap	Tyskland
Fødd	7. mai 1968 (56 år) Dortmund
Idrett	friidrett
Tok del i	Sommar-OL 2000, Sommar-OL 1996

Florian Schwarthoff (fødd 7. mai 1968) er ein tysk tidlegare hekkeløpar frå Dortmund. Han vann sølvmedaljen i 110 meter hekk under EM 1994 og bronsen i same øvinga under Sommar-OL 1996.

Aktiv

Schwarthoff var bestemann på korthekken i Tyskland over ti år frå 1987. Tre gongar, 1987, 1988 og 1990, vann han den vesttyske meisterskapen, sidan vart han ni gongar tysk meister i øvinga.

Frå 1991 til 2002 tok Schwarthoff seg jamt til finalen i dei internasjonale meisterskapane, med eit par mislukka semifinaleløp som unnatak. Etter femteplassar i OL 1992 og VM 1993, sprang han inn til sølv på tida 13,16 då europameisterskapen 1994 fann stad i Helsinki, einast verdsrekordhaldaren Colin Jackson sprang fortare.

Den 2. juli 1995 i Bremen sette Schwarthoff ny tysk rekord i 110 meter hekk med tida 13,05 sekundar, ein prestasjon på internasjonalt toppnivå. Dermed var han ein av dei store favorittane ved verdsmeisterskapen i Göteborg i august, men snubla i semifinalen i fyrste hekken og rauk ut. Under sommarleikane i 1996 i Atlanta kneip Schwarthoff bronsemedaljen framom Jackson, USA-amerikanarane Allen Johnson og Mark Crear makta han ikkje å fylgje.

Schwarthoff vart fjerdemann i VM 1997 og i EM 1998. I Aten-VM 1997 kom han i mål to hundredels sekund bakom bronsemedaljøren, året etter hadde han tre hundredels sekund opp til bronseplassen i europameisterskapen. I sin siste store finale, EM-finalen 2002 i München, vart han atter nummer fire, fem hundredels sekund bakom vinnaren av bronsen.

Medaljar og plasseringar i internasjonale meisterskap

• VM 1987 i Roma: Utslått i semifinalane (13,98=nr 15)
• OL 1988 i Seoul: Utslått i kvartfinalane (13,67=nr 17)
• EM 1990 i Split: Utslått i semifinalane (13,59=nr 9)
• VM 1991 i Tokyo: Nr 7 – 13,41
• OL 1992 i Barcelona: Nr 5 – 13,29
• VM 1993 i Stuttgart: Nr 5 – 13,27
• EM 1994 i Helsinki: Sølvmedalje – 13,16, bakom Colin Jackson (13,08)
• VM 1995 i Göteborg: Braut semifinalen (=nr 16)
• OL 1996 i Atlanta: Bronsemedalje – 13,17
• VM 1997 i Aten: Nr 4 – 13,20
• EM 1998 i Budapest: Nr 4 – 13,23
• VM 1999 i Sevilla: Nr 7 – 13,39
• OL 2000 i Sydney: Nr 6 – 13,42
• VM 2001 i Edmonton: Braut semifinalen (=nr 15)
• EM 2002 i München: Nr 4 – 13,37

Kjelder

• Denne artikkelen bygger på «Florian Schwarthoff» frå Wikipedia på tysk, den 11. august 2019.

• Denne artikkelen bygger på «Florian Schwarthoff» frå Wikipedia på engelsk, den 11. august 2019.