Making Your Mind Up

«Making Your Mind Up»
Song av Bucks Fizz
Land Storbritannia
Språk Engelsk
Utgjeve 12. mars 1981
Sjanger Pop, rock 'n' roll
Lengd 02:39
Selskap RCA[1]
Låtskrivar(ar) Andy Hill og John Danter
Produsent Andy Hill

«Making Your Mind Up» ('å bestemme deg') er ein britisk poplåt som vann Eurovision Song Contest 1981 for Storbritannia. Songen blei fremført av popgruppa Bucks Fizz som blei skipa berre månader før tevlinga. Songen var komponert av Andy Hill, mens John Danter skreiv teksta. Dei hadde henta inspirasjon frå 1950-åras swing og rock 'n' roll, og songen vekte oppsikt fordi dei to mannlege gruppemedlemmane reiv av skjørta på kvinnene midtvegs i framføringa. «Making Your Mind Up» blei ein stor hit etter Eurovision Song Contest og gjekk til topps på ei rekkje europeiske hitlister. I Noreg nådde songen ein andreplass på VG-lista.[2]

Bakgrunn

[endre | endre wikiteksten]

På slutten av 1980 samarbeidet låtskrivaren Andy Hill med John Danter og skreiv «Making Your Mind Up» spesielt for den britiske finalen i forkant av Eurovision Song Contest 1981. Songen blei plukka ut til å delta i den britiske finalen, og låtskrivarane starta med å setje saman ei gruppe til å framføre songen. Resultatet blei kvartetten Bucks Fizz, beståande av Bobby G., Cheryl Baker, Mike Nolan og Jay Aston.[3]

Gruppa sikra seg ein plateavtale med RCA Records, og songen blei publisert av Paper Music. Dansenummeret til gruppa blei laga av koreografen Chrissie Whickham, eit tidlegare medlem av dansetroppen Hot Gossip.[4]

Teksta

[endre | endre wikiteksten]

«Making Your Mind Up» handlar om at du må sjå å bestemme deg og ikkje vingle, for det kan treffe deg hardt. Du må stole på ditt indre syn og samtidig køyre på. Det er nemleg på tide å bestemme seg.[5]

Eurovision Song Contest

[endre | endre wikiteksten]

11. mars 1981 deltok Bucks Fizz med «Making Your Mind Up» i den britiske finalen Song for Europe. I sterk konkurranse med fleire kjente artistar og musikarar, vann kvartetten den britiske finalen klårt med 97 poeng. Dei blei dimed det britiske bidraget til Eurovision Song Contest i Dublin laurdag 4. april.[6]

Dagen etter finalen blei singelen sloppen for sal, og gruppa reiste rundt i Storbritannia for å promotere songen. Blant anna opptredde dei i BBC-programmet Top of the Pops, noko som førte til at singelen entra den britiske singellista som nummer 24. Veka etter klatra han til femteplass.[7] BBC spela også inn ein promoteringsvideo med songen og gruppa. I videoen vandrar Bucks Fizz rundt i varehuset Harrods i London.

Eurovision-finalen

[endre | endre wikiteksten]

4. april gjekk Eurovision Song Contest 1981 av stabelen i Dublin. Der var «Making Your Mind Up» det 14. bidraget på scena av 20 bidrag, rett etter Noregs Finn Kalvik med «Aldri i livet». Den livlege swing-inspirerte framføringa skilde seg ut i mengda, og midtvegs i songen reiv dei mannlege gruppemedlemmane av swingskjørta på kvinnene. Under hadde dei enda kortare skjørt. Like minnerik var også songprestasjonen til gruppa, der nokon tilsynelatande song i eit høgare toneleie enn dei skulle.[8] I eit intervju i 1986 fortalde Cheryl Baker at ho song i eit høgare røysteleie enn resten av gruppa på grunn av nervar.[9] Mike Nolan forklara på si side at mikrofonane deira blei bytta om like før framføringa. Det medførte at Baker og Jay Aston song inn i hovudmikrofonane, som hadde eit høgare volum.[4] Men jurygruppene baserte poenga sine på generalprøve-framføringa kvelden før.

I forkant av Eurovision var Storbritannia den store favoritten, men avrøystinga blei svært jamn. Både Frankrike, Irland, Sveits, Tyskland og Storbritannia kjempa lenge om sigeren, men heilt til slutt tok Storbritannia ei avgjerande leiing og vann med 136 poeng, berre 4 poeng føre Tyskland. Den norske jurygruppa gav berre 3 poeng til «Making Your Mind Up».[10]

Etter sigeren

[endre | endre wikiteksten]

«Making Your Mind Up» blei ein stor europeisk hit etter Eurovision Song Contest og gjekk til topps på den britiske singellista. Der låg han i tre veker. Songen selde dessutan til gull i Storbritannia, og blei ein av årets mestseljande singlar.[11][12] Songen tok seg også inn på hitlister verda over og toppa hitlistene i ei rekkje land. I Noreg låg han sju veker på VG-lista, derav fire veker som nummer 2, berre slått av Gry Jannicke Jarlum med «Svake mennesker».[13]

Singelen var den fyrste av rundt 20 britiske singlar for Bucks Fizz. Singelen blei raskt etterfølgd av «Piece of the Action» og debutalbumet Bucks Fizz.[14] «Making Your Mind Up» blei også den 47. mest selde singelen i Storbritannia i 1980-åra.[15] Trass i suksessen til «Making Your Mind Up», er han ikkje den mest populære hos fansen til gruppa, og gruppemedlem Cheryl Baker rangerer han heller ikkje blant deira beste songar.[16][17]

«Making Your Mind Up» fekk også stor popularitet i Australia og på New Zealand, der han nådde topp ti på singellistene i begge landa. I Australia selte singelen til gull, og gruppa blei svært populær «Down Under». Albumet til gruppa, Bucks Fizz, selte også nesten til platina.[18]

Den mykje omtalte skjørte-episoden under dansenummeret har blitt gjenteken ei rekkje gongar i Eurovision Song Contest sidan. Den mest kjende er kanskje vinnarbidraget til Latvia i 2002, «I Wanna» med Marie N.[19]

«Making Your Mind Up» blei parodiert av mange artistar etter dens suksess, med alternative titlar: «Me vas a volver loco», sungen av den spanske gruppa Parchís; «Rock and Roll Cowboy», framført av den tyske songaren Maggie Mae; og «It's Only a Wind Up», framført av den britiske humorgruppa Brown Sauce.

BBC brukte også tittelen på songen på sin britiske nasjonale finale frå 2004 til 2007. Showet, det britiske svaret på Melodi Grand Prix, heitte då Making Your Mind Up.

Listeplasseringar

[endre | endre wikiteksten]
Liste Høgaste
plassering 		Veker
på lista 		Dato for
inntreden
 Austerrike (Ö3 Austria Top 40)[20] 1 14 1. mai 1981
 Australia (Kent Music Report)[21] 6 – 1981
 Belgia, Flandern (Ultratop)[22] 1 12 25. april 1981
 Danmark (Top 20)[23] 1 – 1981
 Finland (Suomen virallinen lista)[24] 5 – –
 Frankrike (IFOP)[25] 58 5 17. april 1981
 Irland (Irish Singles Chart)[26] 1 10 29. mars 1981
 Island (Vísir)[27] 3 – –
 Israel (israelsk singelliste)[23] 1 – 1981
 Nederland (Single Top 100)[28] 1 11 25. april 1981
 New Zealand (Listener)[29] 3 18 20. september 1981
 Noreg (VG-lista)[2] 2 7 Veke 19 1981
 Spania (SER/PROMUSICAE)[30] 5 14 9. mai 1981
 Storbritannia (UK Singles Chart)[7] 1 12 28. mars 1981
 Sveits (Schweizer Hitparade)[31] 3 10 19. april 1981
 Sverige (Sverigetopplistan)[32] 2 6 24. april 1981
 Sør-Afrika (Springbok Radio/Radio Orion)[33] 7 7 15. mai 1981
 Vest-Tyskland (Offizielle Deutsche Charts)[34] 5 21 20. april 1981

Kjelder

[endre | endre wikiteksten]
  1. ↑ «Bucks Fizz ‎– Making Your Mind Up». discogs.com. Henta 21. februar 2017. 
  2. ↑ 2,0 2,1 «VG-lista for 'Making Your Mind Up'». VG Nett. Henta 21. februar 2017. 
  3. ↑ Beauty and brains behind Bucks Fizz, David Wigg, Daily Express, 15. juni 1981
  4. ↑ 4,0 4,1 The Bucks Fizz Story Glassbeach Media - DVD- documentar
  5. ↑ «Making Your Mind Up – lyrics». The Diggiloo Thrush. Henta 21. februar 2017. 
  6. ↑ «UK National Final 1981». National Finals Pages. Henta 21. februar 2017. 
  7. ↑ 7,0 7,1 «Making Your Mind Up – chart history». Official Charts Company. Henta 21. februar 2017. 
  8. ↑ «Video av Eurovision-framføringen». RTÉ/EBU via YouTube. 26. mars 2012. Henta 21. februar 2017. 
  9. ↑ Intervju med Cheryl Baker på Wogan, BBC Television, april 1986
  10. ↑ «Eurovision Song Contest 1981 – Scoreboard». www.eurovision.tv. Henta 21. februar 2017. 
  11. ↑ Chart Stats - Bucks Fizz - Making Your Mind Up
  12. ↑ «Britiske sertifiseringer – Bucks Fizz (skriv inn Bucks Fizz, velg artist og trykk søk)». British Phonographic Industry. Arkivert frå originalen 1. august 2017. Henta 21. februar 2017. 
  13. ↑ «VG-lista uke 20, 1981». VG Nett. Henta 21. februar 2017. 
  14. ↑ Chart Stats - Bucks Fizz
  15. ↑ Forums, BuzzJack Entertainment. «Music forums focusing on chart music with chart and entertainment discussion.». www.buzzjack.com (på engelsk). Henta 21. februar 2017. 
  16. ↑ Nul Points, BBC-dokumentar, 1993
  17. ↑ Chester, Jason (19. mai 2015). «Cheryl Baker reveals unrequited love for Bucks Fizz band-mate Mike Nolan». Mail Online. 
  18. ↑ Glenn Baker (17. oktober 1981). «RCA in Australia Seeing Bit Of ABBA In Bucksfizz». Billboard Magazine: 71. 
  19. ↑ eurovision.tv - Marie Ns fremførelse
  20. ↑ Hung, Steffen. «Bucks Fizz – Making Your Mind Up». austriancharts.at. Henta 21. februar 2017. 
  21. ↑ Kent, David (1993). Australian Chart, Books 1970–1992. Australian Chart Book. ISBN 9780646119175. 
  22. ↑ «Making Your Mind Up – Ultratop». ultratop.be. Henta 21. februar 2017. 
  23. ↑ 23,0 23,1 O'Connor, John Kennedy (2005). The Eurovision Song Contest – The Official History. Carlton Books. ISBN 978-1-84442-994-3. 
  24. ↑ Timo (13 August 2015). «Sisältää hitin: Levyt ja esittäjät Suomen musiikkilistoilla vuodesta 1960: Artistit BRA - BÅG». Sisältää hitin. Henta 20. november 2020. 
  25. ↑ «Oversikt over sanger på fransk singelliste (søk 'Bucks Fizz' ved å trykke ctrl+s ev. cmd+f)». InfoDisc.fr. Henta 21. februar 2017. 
  26. ↑ http://www.fireballmedia.ie. «The Irish Charts (skriv 'Making Your Mind Up' i søkefeltet)». www.irishcharts.ie. Henta 21. februar 2017. 
  27. ↑ «Vísir - 102. Tölublað (08.05.1981) - Tímarit.is». timarit.is. Henta 20. november 2020. 
  28. ↑ Hung, Steffen. «Buck Fizz – Making Your Mind Up». dutchcharts.nl. Henta 21. februar 2017. 
  29. ↑ Hung, Steffen. «charts.org.nz – Bucks Fizz – Making Your Mind Up». charts.org.nz. Arkivert frå originalen 12. oktober 2012. Henta 21. februar 2017. 
  30. ↑ «Bucks Fizz – Superventas 1981». Listas De Superventas. 12. februar 2010. Henta 21. februar 2017. 
  31. ↑ Hung, Steffen. «Bucks Fizz – Making Your Mind Up – hitparade.ch». www.hitparade.ch. Henta 21. februar 2017. 
  32. ↑ «Bucks Fizz – Making Your Mind Up (låt)». hitparad.se. Henta 21. februar 2017. 
  33. ↑ Currin, Brian. «South African Rock Lists Website - SA Charts 1965 - 1989 Acts (B)». www.rock.co.za. Henta 21. februar 2017. 
  34. ↑ «Offisiell tysk singelliste (skriv 'Making Your Mind Up' i søkefeltet)». Deutsche Offizielle Charts. Henta 21. februar 2017.