Choule
Ch't' articl'ye fut c'menchie en Jèrriais
|
La choule est eune vielle gamme Nouormande qu'nou soulait jouer temps pâssé. Y'a un êffort achteu d'ravigoter chutte gamme en Nouormandie. Ch'est ieune d'ches vielles gammes dé balle tchi 'taient l's anchêtres des gammes d'achteu coumme lé football, lé rugby et lé hockey.
Deux împortantes vèrsions d'la gamme sont la grande choule et la choule à la crosse.
La grande choule
[amendaer | modifier le wikicode]La grande choule est jouée entré deux (grandes) êtchipes atout les pids, les mains et sans doute les poings.
La choule à la crosse
[amendaer | modifier le wikicode]La choule à la crosse est jouée atout des badgettes (ou des battes), les pieds, la tête et les mains.
Histouaithe
[amendaer | modifier le wikicode]Ch'fut duthant l'dgiêx-neuvième siècl'ye qu'les gammes modèrnes fûtent standardîsées – tout preunmiéthement en Angliétèrre dans les grandes êcoles et l's unnivèrsités.
Mais tout chenna v'nait d'eune tradition dé gammes dé balle qu'nou jouait dans les villages. Châque village ou pays avait ses règl'yes s'lon tchi qu'nou jouait – et chenna pouôrrait m'ner à d's êtchipes dé difféthentes grandeurs – des grandes êtchipes ou des p'tites. Sans hôlouoges nou jouait s'lon la sonn'nie du cliochi d'l'églyise ou s'lon la mathée ou même s'lon lé solé.
Nou lanchait, portait ou codpîsait la balle – et y'avait étout des vâriâtions auve eune sorte dé badgette tchi r'sembliait sans doute au hurling Irlandais ou au shinty Êcossais. La gamme pouvait êt' bein violente coumme les hoummes littaient pouor la balle dans eune manniéthe dé "dgèrre" – tchiquefais entré deux villages, ou entre les jannes gens et l's hoummes mathiés.
La choule 'tait pratitchie en Nouormandie, Picardie et jusqu'en Brétangne, mais l'întroduction dé sports modèrnes en France auprès la dgèrre Franco-Preusse dé 1870 (sustout coumme pratique militaithe pouor la modèrnîsâtion d'l'armée et l'urbannîsâtion d'la tchultuthe nâtionale) 'tait destinnée à rempliaichi les gammes traditionnelles coumme la choule.
