Henny Eman

E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
Wak Eman (pagina di referencia) pa un otro nificacion di topico.
Henny Eman
Henny Eman
1° Prome minister di Aruba
Termino di oficina
1986-1989
1994–2001
Monarkia Beatrix (1980-2013)
Antecesor funcion crea
Sucesor Nel Oduber
Miembro di Parlamento di Antias Hulandes
Termino di oficina
1979–1983
Miembro di Parlamento di Aruba
Termino di oficina
1989–1994
Informacion personal
Nomber 
completo 		Jan Hendrik Albert Eman
Nacemento  20 di maart 1948
 Aruba
Fayecimento  6 di januari 2025
Horacio Oduber Hospital
Informacion profesional
Ofishi polítiko, hurista
Partido politico AVP
Imagennan riba Wikimedia Commons Wikimedia Commons
[Edita Wikidata] · [Manual]

Jan Hendrik Albert (Henny) Eman (☆ 20 di maart 1948 na Aruba - † 6 di januari 2025 na Aruba) tabata un politico Arubiano di e partido cristian democrata Partido di Pueblo Arubano (AVP). E tabata e prome premier di pais Aruba di prome di januari 1986 te 9 di februari 1989 y despues a encabesa dos gabinete mas entre 1 di september 1994 y 30 di oktober 2001.

Bida

[editá | editá fuente]

Henny Eman tabata e di dos yiu di Blanche Hartogh y Cornelis Albert Eman. E tabatin un ruman muhe y cinco ruman homber, entre nan su ruman mas jong Mike Eman. Su tata, miho conoci como Shon A Eman, tabata lider di AVP y un defensor prominente di e Status aparte di Aruba dentro di Reino Hulandes. Su welo, tambe cu nomber Henny Eman, tabata e fundado di partido AVP y ta considera pionero di politica moderno na Aruba.

Eman a bay Hulanda na un edad jong pa studia ley na Leiden. Despues di e morto repentino di su tata na 1967, e mes mester a percura pa e entrada di su famia. Entre otro, el a opera e café ‘het Keizertje’ na Leiden y a lanta hunto cu algun amigo, ‘Emco Productions’ (Eman & Co), un compania di serigrafia cu tawata produci T-shirts.

Na 1977 el a interumpi su estudio pa scapa AVP di morto sigur. Esaki a determiná su destino politico mas aleu. Na aña 1978 el a obtene su master na Universidad di Leiden cu un tesis riba aspectonan historico y huridico di Status Aparte pa Aruba.

Despues di retira di politica activo, Eman y varios ruman di dje tabata maneha Emco Productions.[1] Durante su ultimo añanan di bida el a enfrenta varios contratiempo cu su salud. El a fayece dia 6 di januari 2025 na edad di 76 aña, despues di a wordo interna den Horacio Oduber Hospital algun dia prome pa motibo di complicacionnan,.[2]

Henny Eman tabata casa cu Iris Eman-Arends.

Politica

[editá | editá fuente]

Entre 28 di juli 1979 y 22 di augustus 1983 e tabata miembro di Parlamento di Antias Hulandes.[3] Desde 1979 te 1999 e tabata lider di partido y lijsttrekker di AVP.

Henny Eman a bira un informado y despues formado despues di e eleccionnan di 1985, 1993 y 1994. Esaki a resulta den e gabinetenan Henny Eman I, Henny Eman II y Henny Eman III. Den su prome gabinete el a enfrenta e reto di recuperacion economico despues di cierre di refineria Lago door di percura pa un crecemento fuerte di e industria turistico. El a atrae cadenanan hotelero manera: Sonesta, Marriott Hotels, Marriott Vacation Club, Radisson y Hyatt Hotels pa bin establece nan mes na Aruba pa asina yena e bashi cu Lago a laga atras den economia, mercado laboral y entradanan fiscal di gobierno.[1] Den su ultimo periodo di gobernacion, el a lidera exitosamente e introduccion di Algemene Ziektekostenverzekering (AZV), haciendo Aruba e prome pais den Caribe cu un seguro medico general pa su ciudadania a base di igualdad den acceso.

For di 2002 en adelante, Eman tabata bao di investigacion hudicial na Aruba pa fraude extenso den e asina yama caso di corupcion di Fondo Desaroyo Nobo (FDN). Persecucion penal a sigui, pero el a keda absolve na mart 2008. Ministerio Publico a apela na prome instante pero na final a dicidi di retira esaki.[4]

Honor

[editá | editá fuente]

Henny Eman a wordo condecora den Orden di Francisco de Miranda y Orden del Libertador door di gobierno di Venezuela. Na 1990 el a ricibi e condecoracion como Cabayero (ridder) den Orden di Leon Hulandes door di gobierno di Hulanda.[5]