Iyo Pimentel

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Iyo Pimentel
Pais di nashonalidatVenezuela Editá
Nòmber di dilantiIsaías Editá
FamPimentel Editá
Fecha di nasementu16 febrüari 1933 Editá
Lugá di nasementuKòrsou Editá
Fecha di fayesimentu26 yüni 2017 Editá
Okupashontenista Editá
Deportetennis Editá
Singles record19–17 Editá
Doubles record0–0 Editá

Isaías Samuel (Iyo) Pimentel (☆ 16 di febrüari 1933 na Willemstad - † 26 di yüni 2017 na Kòrsou) tabata un tenista internashonalista kurasoleño-venezolano. E tabata aktivo di 1952 te 1974, partisipando den torneonan internashonal ront mundu. El a gana seis título profeshonal den single i na 1961 a alkansa e kuarto final single den e kampeonato mundial di Wimbledon.[1]

Biografia

[editá | editá fuente]

Iyo Pimentel a nase i lanta den bario di Skaló. Su mayornan tabata venezolano; su ruman Ramon tabata hunga tènis. Den añanan sesenta i setenta su sobrinonan, Humphrey Hosé, tabata tenista profeshonal i Robert Hosé tabata hungadó di pinpòn internashonal. Iyo tabata hunga beisbòl i tabata picher pa Los Tigres.[2] Aunke futbòl tabata su deporte favorito tènis tambe tabata atraé. Ku dies aña el a kuminsa praktika tènis i tabata frekuentá Curaçao Sport Club (CSC), ku e tempu ei tabata situá den Skaló.[3] Ku diestres aña el a titulá kampeon hubenil di Kòrsou i ku diesseis aña kampeon klase A. Despues el a representá e isla, entre otro na Mexico, Sürnam i den torneonan sentroamerikano.

Hungando na Venezuela desde 1951 Pimentel a gana varios torneo i a titulá kampeon nashonal na 13 okashon.[4] El a forma parti di e selekshon venezolano partisipando na diferente kampeonato internashonal i regional. Na e edat di bintisinku aña Pimentel tabata number diesseis riba e tabla di rango mundial.[5] Entre 1955 i 1965 el a hunga na Roland Garros, US Open i Wimbledon i tabata alkansa por lo menos e di tres buelta. Den 1961 el a alkansa e kuarto final di Wimbledon. Ku esaki el a bira miembro di “The last 8 Club” di Wimbledon. Den Kopa Davis el a hunga diesdos wega pa Venezuela, kual tur el a pèrdè.

Despues di su karera deportivo el a regresa Kòrsou i durante 25 aña a duna les na hubentut di CSC, awendia situá na Damacor.[1] Despues di un kaida el a stop di hunga na 1999.

Iyo Pimentel a fayesé na su isla natal dia 26 di yüni 2017 na edat di 84 aña.

Honor

[editá | editá fuente]

Na su honor a duna su nòmber na un di e kanchanan di CSC i un kaya den bario di Zapateer a keda batisá "Kaya Isaias Iyo Pimentel". Desde dékada 1980 ta organisá na Kòrsou e torneo di tènis: "Kopa Iyo Pimentel".

Torneonan internashonal

[editá | editá fuente]
  • Roland Garros
    • partisipashon na 1955, 1956, 1958, 1960, 1962, 1964, 1965,
    • mihó resultado: R32 na 1958 i 1961
  • Wimbledon
    • partisipashon na 1955, 1956, 1957, 1958, 1961, 1962, 1964, 1965
    • mihó resultado: kuarto final na 1961
  • US Open
    • partisipashon na 1959, 1960, 1964
    • beste resultaat: R32 na 1960
  • Conde de Godo, partisipashon na 1956
  • Caribbean Hilton championships, partisipashon na 1958
  • Kampeonato internashonal di Kennemerland (Hulanda), partisipashon na 1965
[editá | editá fuente]