Moises Frumencio da Costa Gomez

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Moises Frumencio da Costa Gomez
Pais di nashonalidatReino Hulandes Editá
Nòmber di dilantiMoises Editá
Fecha di nasementu27 òktober 1907 Editá
Lugá di nasementuOtrobanda Editá
Fecha di fayesimentu22 novèmber 1966 Editá
KasáLucina da Costa Gomez-Matheeuws Editá
Okupashonpolitiko Editá
Funshonpromé minister di Antias Hulandes Editá
Partido polítikoPartido Nashonal di Pueblo Editá

Moises Frumencio da Costa Gomez (☆ 27 di òktober 1907 na Otrobanda – † 22 di novèmber 1966 na Willemstad) tabata un polítiko i estadista kurasoleño, miho konosi komo "dòktoor". E tabata presidente di Konseho di Gobièrnu (Regeringsraad) di 1951 pa 1954 i ta komunmente konsiderá komo e promé premier di Antias Hulandes.[1]

Biografia

[editá | editá fuente]

Da Costa Gomez a nase na Otrobanda dia 27 di òktober 1907 komo yu di Pedro da Costa Gomez i Braulia Bikker. Ku 15 aña e ta muda pa Hulanda, unda e ta kaba gymnasium na Nijmegen.[2] E ta sigui pa studia ley na Universidat di Nijmegen i ta promové na 1935 na Universidat di Amsterdam ku e disertashon titulá Het wetgevend orgaan van Curaçao, bezien in het kader van de Nederlandse koloniale politiek.[3][4]

Na 1935 da Costa Gomez ta drenta servisio di gobièrnu sentral. Gran parti di su karera komo empleado públiko e tabata fungi komo griffier na Korte di Hustisia. Na 1936 e tabata enbolbí ku fundashon di un sindikato pa empleado públiko.

Na 1937 e ta bira miembro di Partido Katóliko Kòrsou (KVP) i dia 5 di aprel 1938 miembro di parlamento di Teritorio Kòrsou (Gebiedsdeel Curaçao). Aki e tabata hunga un papel importante den realisa mas demokrasia i mas outonomia den gobernashon pa e seis islanan, ku desde 1949 tabata yama Antia Hulandes.

Na 1947 e tabata e promé persona pa okupá e puesto di representante ofisial di Antia Hulandes na Den Haag; promé ku esei e kontakto ofisial entre gobièrnunan di Hulanda i Antia tabata kore via e gobernador. E funshon di representante ofisial a evolushoná despues den esun di minister plenipotensiario. Da Costa Gomez ta tuma su retiro na 1948 i ta bolbe Kòrsou pa okupá su mes ku e reformanan estatal.[5] Den mesun aña e tabata un di e fundadónan di Partido Nashonal di Pueblo (PNP of NVP), kual partido e ta liderá te dia di su morto, apesar di tres atento interno pa ekspulsa su persona di e puesto.[6] Di 1946 te 1954 e tabata presidente di e delegacion antiano na e Konferensianan di Mesa Rondo (RTC) ku Hulanda i Sürnam tokante e futuro di Reino Hulandes. Aki el a negosiá e reforma estatal i introdukshon di e Statuut pa Reino Hulandes.

College van Algemeen Bestuur (1949)
Monumento di da Costa Gomez na e santana di Bottelier.

Da Costa Gomez tabata presidente di Kolegio General Ehekutivo (College van Algemeen Bestuur, abreviá CAB) na 10 di mei t 4 di yüli 1949 i di Konseho di Gobièrnu (Regeringsraad) di 1951 pa 1954. Tur dos órgano tabata prekursor di e gabinete di Antia Hulandes i den práktika su funshon komo presidente tabata komparabel ku esun di un promé minister.[7] Motibu pa kual e ta wòrdu konsiderá e promé premier di Antia Hulandes.

Da Costa Gomez tabata miembro di e komishon di redakshon di Statuut pa Reino Hulandes. Dia 15 di desèmber 1954 e no a pone su firma komo representante di Antia Hulandes bou di e Statuut pa motibu di e derota elektoral di su partido net un luna promé. Esaki e mester a laga pa su susesor i rival polítiko Efraïn Jonckheer.[8]

Te su morto da Costa Gomez a keda hunga un papel aktivo den polítika antiano. Su fayesimentu inesperá dia 22 di novèmber 1966 tabata un shòk. Programanan di radio a wòrdu adapta inmediatamente i a hisa bandera halfstèngel.[9] Su restunan ta reposá na Morada Santa na Bottelier den un monumento ku un teksto grabá: No hasi ku otro loke bo no ke pa otro hasi ku bo.

El a kasa dos bes i tabata tata di dos yu. Na 1977 su viuda, Lucina da Costa Gomez-Matheeuws, tabata brevemente promé minister di Antia Hulandes.

Estatua di M.F. da Costa Gomez riba Plasa Gomez na Willemstad

Honor

[editá | editá fuente]
  • Da Costa Gomez a risibí kondekorashon komo Kabayero (Ridder) den Orden di Leon Hulandes (1955) i Ofisial (Officier) den Orden di Oranje-Nassau.
  • Na 1972 Servisio Postal di Antia Hulandes a saka un stampia ku su imagen.
  • Na 1973 riba Plasa Gomez na Punda a develá na su honor un estatua di brons, trahá pa e eskultor Carlo Pizi i finansiá ku fondonan rekoudá pa fundashon "Standbeeld mr.dr. M.F. da Costa Gomez".
  • Desde 2020 e ta inkluí den e sinkuenta bentana di e Kanon di Kòrsou komo estadista di gran mérito pa Kòrsou, Antia Hulandes i Reino Hulandes.[10]
  • Riba petishon di fundashon "Standbeeld mr.dr. M.F. da Costa Gomez" el a wòrdu proklamá "Heroe di Kòrsou" dia 15 di desèmber 2023. Ku e título aki e lo wòrdu homenaheá anualmente riba 15 di desèmber, fecha tambe di Dia di Statuut.[11]

Galeria

[editá | editá fuente]
  • Resepshon na Palasio Soestdijk pa e delegashon di Ronde Tafel Conferentie (1954)
    Resepshon na Palasio Soestdijk pa e delegashon di Ronde Tafel Conferentie (1954)
  • Diskursonan na klousura di Ronde Tafel Conferentie
  • M.F. Da Costa Gomez durante bishita real di Reina Juliana i Prins Bernhard na òktober 1955
    M.F. Da Costa Gomez durante bishita real di Reina Juliana i Prins Bernhard na òktober 1955
Mira tambe e kategoria Moises Frumencio da Costa Gomez di Wikimedia Commons pa mas dato mediatiko tokante di e tema aki.