Silveria Jacobs

E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Silveria Jacobs
Silveria Jacobs
Di 7 Promé minister di Sint Maarten
Término di ofisina
19 di novèmber 2019–3 di mei 2024
Monarkia Willem-Alexander (2013 - presente)
Antesesor Wycliffe Smith
Susesor Luc Mercelina
Minister di Enseñansa, Hubentut, Deporte i Kultura
Término di ofisina
2012–2013
Término di ofisina
2014–2015
Miembro di Parlamento di Sint Maarten
Término di ofisina
2015–2018
Término di ofisina
2018–2019
Término di ofisina
10 di febrüari 2024–19 di sèptèmber 2024
Informashon personal
Nòmber 
kompleto 		Silveria Elfrieda Jacobs
Nasementu  31 di yüli 1968
 Aruba
Informashon profeshonal
Ofishi politiko
Partido polítiko National Alliance
Imágennan riba Wikimedia Commons Wikimedia Commons
[Editá Wikidata] · [Manual]

Silveria Elfrieda Jacobs (☆ 31 di yüli 1968, Aruba) ta un polítiko di Sint Maarten i tabata promé minister di Sint Maarten di 2019 te 2024.[1] Anteriormente el a fungi komo minister di Enseñansa, Hubentut, Deporte i Kultura, entre otro den e gabinete Wescot-Williams II (2012-2013), i e gabinetenan Marlin I i II (2015-2018). Jacobs tabata miembro di Parlamento di Sint Maarten na tres okashon: 2014 - 2015; 2018 - 2019 i di 10 di febrüari 2024 te ku 19 di sèptèmber 2024.

Bida

[editá | editá fuente]

Silveria Jacobs a terminá HAVO na Milton Peters College (Sint Maarten) na 1986. Despues el a optené e grado di 'Bachelor of Education' na University of the Virgin Islands na U.S. Virgin Islands.

Entre 1992 i 2011 Jacobs tabata traha na e skol básiko Leonald Conner na Philipsburg, promé komo maestro i despues komo koordinadó di studiante.[2]

Politika

[editá | editá fuente]

Na 2010, Jacobs a drenta partido National Alliance (NA, Aliansa Nashonal). Entre 2012 i 2013 e tabata minister di Enseñansa, Hubentut, Deporte i Kultura den e di dos gabinete di Wescot-Williams. El a okupá e funshon aki den e promé i di dos gabinete di Marlin for di 2015 te ku 2018.[2]

Na 2014 el a keda elegí komo miembro di Parlamento di Sint Maarten. Na e elekshonnan di 2014 i 2016 e tabata e 'votegetter' mas grandi di su partido.[3] E tabata parlamentario i lider di frakshon despues di e elekshon riba 16 di febrüari 2018.[2] Den e elekshon aki, Jacobs a terminá komo e di dos 'votegetter' di mas grandi despues di Theo Heyliger pa di tres biaha konsekutivo.[4] Dia 3 di yanüari 2018 el a sigui William Marlin komo lider di partido NA, e promé muhé den e funshon aki.

Despues di e kaida di gabinete Marlin-Romeo II, a firma un akuerdo di koalishon entre e partidonan NA, United St. Maarten Party (USP) i e parlamentarionan independiente Luc Mercelina i Chanel Brownbill. Jacobs a keda nombrá dia 30 di sèptèmber 2019 pa gobernador Eugene Holiday komo formadó di un gabinete interino ku entre otro mester duna prioridat na e finalisashon di e leinan anti-labamentu di plaka; preparashon di elekshon pa Parlamento di Sint Maarten i reformanan elektoral.[5] E gabinete Jacobs I a huramentá dia 19 di novèmber 2019. Despues di elekshon na yanuari 2020 e di dos gabinete Jacobs a huramentá dia 28 di mart 2020 i Silveria a fungi komo promé minister te ku 3 di mei 2024. Durante su término el a maneha e pandemia di coronavirus na Sint Maarten, entre otro imponiendo medidanan di restrikshon di biahe i otro restrikshonnan.

Den elekshon na yanüari 2024 National Alliance ta pèrdè dos asiento pero ta mantené su posishon komo partido mas grandi ku kuater asiento den parlamento. Sinembargo, ora partidonan URSM, Partido Demokrat (DP), PFP i NOW kada uno ku dos asiento, a sera un akuerdo pa formashon di un gobièrnu di koalishon nobo, partido NA mester a bai den oposishon. Silveria su susesor komo promé minister ta Luc Mercelina. Den un di dos elekshon na ougùstùs 2024, despues di e kaida repentino di gabinete Mercelina, NA ta bolbe pèrdè un asiento; el a keda e partido ku mas voto ku tres asiento. Komo lider polítiko Jacobs ta optené 283 voto, sinembargo ta pèrdè su asiento komo parlamentario komo el a wòrdu surpasá den voto dor di tres otro kandidato riba lista.[6] Un siman despues el a anunsiá su retiro komo lider di partido entrante 19 di sèptèmber 2024.[7] Su susesor ta Egbert J. Doran.