Munṣif Sslawi

Munṣif Sslawi

afgan

Anaw nɣ asrtu	awtm
Tamazirt n tɣlant	Lmɣrib, Bljika
Ism amzwaru	Moncef
Ḍfṛism	Slaoui
Assf n tlalit	22 Yulyu 1959
Ida n tlalit	Agadir
Tutlayin s ar isawal, d s ar ittara	taɛrabt, Tutlayt Tanglizt, Tutlayt Tafransist
Tawuri d mad isala	chercheur ou chercheuse, immunologiste
Scolarité	université libre de Bruxelles, Harvard Medical School, École de médecine de l'Université Tufts, lycée Mohammed-V, International Institute for Management Development
Directeur ou directrice de thèse	Jacques Urbain
Résidence	Tigmmi Tumlilt
Iga yan ugmam ɣ	Operation Warp Speed
Courriel	mailto:[e-mail]

Munṣif Sslawi (s tnglizt Moncef Slawi) zzɣ tarwa n 27 yulyu 1959 Agadir, iga amuzay amṛṛuki amarikani ɣ tmguri n isafarn, iddr ɣ iwankn imarikann imunn d unmhal izwarn n tdala n tgzzayin ɣ tmssurt n Glaksu Smit Klayn (GSK). Iswuri ɣ tmssurt tizi n kṛamraw n usggʷas, yanf ɣ usggʷas n 2017. Ɣ 15 mayu 2020, ittusḍṛeṛ mas d Sslawi rad iswuddu asnfli n tgzzayt n waṭṭan n unfafad n Kuṛuna ɣ iwankn imarikann imunn, ikcm ustay nns g tzzigzt ittusmman 'Warp Speed' i usmmri n immirn n usnfli n tgzzayt zzɣ Wacinṭun^[1].

Umlan udmawann

Talalit : 22 yulyu 1959 ɣ ugadir

Tazduɣt: tigmmi tumlilt

Tamuri: Bljika

Agmam ɣ: tazzigzt n tmmri tanafllat

Uṭṭun n tarwa: 3

Tudrt tawurayt

Tinml taymmat: tasdawit n Bruksil tilellit (aẓlay: tasnudrt tanctiwt d tagaẓt) (tugga: tadukṭuṛt) (1976-1983), tinml n tsnijjit Harfard (tugga: postdoctoral degree), tasdawit n Muḥmmad wiss smmus (tugga: abakk n tussna)

Tazzult: amrzu, amsngaẓ

Amswuri ɣ: Glasyu Smit Klayn (GSK), Mudirna, timrslt n Qaṭaṛ

Tasknudrt nns

Ilul Sslawi ɣ umṛṛuk iɣr gis ar abakk, ɣ wawtay n 17 n usggʷas ifl amṛṛuk immuddu s Fṛanṣa ad iɣr tasnijjit, macc izdɣ ɣ Biljikka lli ɣ iɣra tasnudrt tanctiwt, yamẓ tadukṭuṛt ɣ tagaẓt. Izdɣ ɣ Biljikka tizi n 27 n usggʷas, itahl tasmunt nns lli tt inn ikkan ar tga tamrzut d tamuzayt ɣ infafadn, d nttat ad yufan tagzzayt i yan unfafad d yuggan ɣ isggʷasn n id tamraw lli iẓḍmn f izgarn d irwas anfafad n wassar n tagaẓt dar ufgan. Ifl Munṣif Sslawi Biljikka imun d tmɣart nns s iwankn imunn ilmma ig aslmad ɣ tsdawit n Harfard, ɣ tizi n 15 n usggʷas, idra ɣ tifit n tugtt n tgzzayin n tasngaẓt zun d Lmalaṛya, amanḍas n umggṛḍ n usirw, tikrknnayin n turin d tiyyaḍ ^[2].

Ittustay ad ig amaɣlaf f tdala n urzzu d usnfli ɣ tmssurt n Glaksu Smit Klayn (GSK), ilkm tiyafutin tizalanin, lli ɣ d tffɣ tgrumma lli yuman 24 n usafar d tgzzayt imaynutn gr 2011 d 2016 i infafadn bahra innflin, tmsasa fllasn tmssugurt tamarikant n umtcu d isafarn s talɣa tamaddadt, imurs ula ɣ usizdr n tmsastlt s ugtamur n 40%. Ɣ usggʷas n 2017, d ḍaṛat n twada tussnant iɣzzifn d imursn, iɣts Sslawi ad iggawr ifl adɣar i tasut tamaynut n iɛrrimn imrzutn ^[3].

Yiws s udraw d tmssurt Firili (Verily) iẓlin s tsnudrt d igan ifittu n Gugl (Google), ɣ usnfar n tkni n ingrawn ilikṭṛuniyn mẓẓyn igan i wuẓu lli rad ittusmras ɣ ussɣti n inttawn izlmann irmagnutn d ur ittussudsn, ttusmman s isafarn imẓẓaṛuṛn ^[4].

Iɣalafn nns

- Amawas ɣ tsngaẓt dar Glasyu Smit Klayn (GSK)

- Anssiɣf n usqqamu n tmssugurt n tgzzayin ɣ tmssurt n Glasyu Smit Klayn (GSK)

- Amaɣlaf f tɣlift n usnfli n tgzzayt n Kufid-19 ɣ tsqqimt tamassant ɣ Marikan.

- Agmam ɣ usqqamu n inflas n tsdawit Ḥamd bn Xalifa.

Abayyuṛ n Kufid-19

Ɣ 15 mayyu, issuḍṛeṛ unssiɣf Ḍunalḍ Tṛamp f tzzigzt n Warp Speed s talɣa tamaddadt, lli igan asnfar n usnfli d tikki n 300 n umlyun n tugmimt n tgzzayt n waṭṭan n unfafad n Kuṛuna ɣ usggʷas n 2019 s ulkam n yanayr 2021. Tettuswudda tzzigzt n Warp Speed zzɣ unmɣur imawasn n taddart tumlilt Garid Kucnr s usnal zzɣ tmawast tamarikant n umzaɣ d tmawast n tdusi d tnafutin tinfganin ɣ iwankn imunn. Ittustay Sslawi lli innan mas d tizi n 12 ar 18 n wayyur rad tmru macc nẓḍar ad nlkm, iswuri d imaɣlafn inmɣurn n tzzigzin d ujiniṛal Gustaf Birna. Afad ad yanf i unnzri n tnafutin, iffɣ Sslawi zzɣ udɣar nns ɣ usqqamu n tmssugurt n tmssurt n tadruknulujit Mudiṛna d usɣim nns Masatcustis, lli tt inn ikkan ar tsnfliy tagzzayt n unfafad n Kuṛuna. Yuma Sslawi ɣ isqquma n tmssugurt n tmssurt n Stṛufaks, d tmaddast n usnflul ɣ yigr n tdruknulujit, d twisi tamaḍlant n tgzzayt n Idz, d tmrslt n Firma (PhRMA).

Assikz

Tfka tɣiwant n Jitisbirg i Sslawi taskʷflt n tadukṭuṛt n uburz ɣ tussnawin ɣ Mayyu 2017. Ɣ usggʷas n 2012, ittustay Sslawi d 25 n mddn yaḍn s mas gan id bu tzrirt mqqurn ɣ yigr n tdrusafart zzɣ Firsbyutik. Ɣ usggʷas 2016, tssisml t tsɣunt Furtcn ɣ 50 n imzwarn ikswatn ɣ umaḍal. Ikcm umskn n isafarn Sslawi ɣ tlgamt n 100 n umskn amufay n isafarn ɣ umaḍal ɣ usggʷas 2018.

Isaɣuln

1. (Taɛrabt) ترامب يعوّل على خبرة السلاوي لإيجاد لقاح ضد فيروس "كورونا". Hispriss. Ɛabdṛṛaḥim Lɛsri. 15 Mayyu 2020.
2. (Taɛrabt) منصف السلاوي. بروفيسور مغربي ضمن لجنة طبية أمريكية لإيجاد لقاح لفيروس كورونا Ṛacid Zzburi. Le12. 28 Maṛṣ 2020. Ittuẓṛa ɣ 4 Mayyu 2023.
3. (Taɛrabt) أمريكا تستعين ببروفيسور مغربي لإيجاد لقاح كورونا و الأخير يقترب من الهدف Yasin Dḍmiṛi. Hibapriss. 27 Maṛṣ 2020. Ittuẓṛa ɣ 4 Mayyu 2023.
4. (Taɛrabt) جلاكسو و فيرلي يوحدون قواهم لقرصنة جهازك العصبي . Scientificsaudi. 11-09-2016. Ittuẓṛa ɣ 4 Mayyu 2023.