Camembert
| Camembert | |
.jpg) | |
| Herkoms | Normandië |
| Vetgehalte | 35-52 % |
| Vorm | Silindries, deursnee 10-11 cm |
| Hoogte | 3 cm |
| Gewig | 250 g |
| Tipe | Sagtekaas |
| Oorsprong | Koeimelk |
Die Camembert (wat in Normandië soms ook fermier genoem word) is een van die gewildste kaassoorte in Frankryk. Marie Harel van die Normandiese dorpie Camembert het hierdie kaas vir die eerste keer in 1791 vervaardig. Hoewel fynproewers hom nie noodsaaklik as die beste van die Normandiese kaassoorte beskou nie, is hy die eerste streekkaas wat rondom 1870 in groot hoeveelhede in kaasmakerye vervaardig en na die markte van Parys vervoer is. Een van sy voordele is dat hy baie min melk nodig het en in 'n taamlik kort tyd plaaslik verfyn kan word. Teen die einde van die 19de eeu word die Camembert in sy huidige vorm – en in klein houtdose verpak – aangebied. Daar is talle namaaksels van die beroemde kaas wat egter nie met sy smaak kan meeding nie. Die Musée du Camembert in die Franse stad Vimoutiers vertoon 'n versameling van hierdie nagemaakte Camemberts.
Die huidige outentieke soorte Camembert is die
- Camembert de Normandie (sedert 1986 'n kaas van oorsprong, Appellation d'origine contrôlée (AOC))
- Camembert fermier ('n kaas wat volgens die Normandiese metode in die Île-de-France vervaardig word)
- Camembert au Calvados van Normandië wat met vrugte verfyn word
- Camembert de Madame Clément van Québec, Kanada
Smaak
[wysig | wysig bron]Die Normandiese Camembert het aanvanklik 'n effense suur smaak. 'n Ryp Camembert word vrugtig en smaak 'n bietjie na sampioene. In Frankryk word die Camembert veral met wit- of volkoringbrood bedien.
