Nimr al-Nimr

Nimr Baqr al-Nimr (Arabies: نمر باقر النمر‎) (1959 – 2 Januarie 2016) ook gespel as Bakir al-Nimr, al-Nemr, al-Namr, al-Nimer, al-Nemer, al-Namer en deurgaans bekend onder die naam Sjeik Nimr, was 'n Sjiïtiese sjeik in al-Awamiyah, 'n stad in die oostelike provinsie van Saoedi-Arabië.

Biografie

Hy was populêr by die Sjiïtiese jeug in Saoedi-Arabië en het die owerheid van Saoedi-Arabië deurlopend gekritiseer. Hy doen 'n oproep vir vrye verkiesings in Saoedi-Arabië. Hy beweer hy is deur die Saoediese veiligheidsdiens, die Mabahith geslaan is toe hy in 2006 gearresteer was. In 2009 stel hy die afskeiding van die oostelike provinsies voor as die regte van die sjiiete nie beter gerespekteer word nie. Hierna word 'n arrestasiebevel teen hom uitgevaardig en word hy en 35 ander mense gearresteer. Gedurende die Saoedi-Arabiese protes van 2011 en 2012 doen al-Nimr 'n oproep op die protesteerders om die koeëls van die polisie te weerstaan met die gebruik van die "gebrul van die woord" in plaas van met geweld. Hy voorspel die omverwerping van die regering as die onderdrukking in Saoedi-Arabië voortgesit sou word. Die Guardian beskryf al-Nimr as 'n leier van die opstand in Saoedi-Arabië.

Op 8 Julie 2012 word al-Nimr in die been gewond toe die polisie hom arresteer. Die polisie beskryf die voorval as 'n 'uitruil van geweervuur'. Hierop volg verskillende protesaksies waartydens twee mans, Akbar al-Shakhouri en Mohamed al-Felfel, deur die polisie gedood word. Al-Nimr begin met 'n hongerstaking en beweer dat hy gemartel is. Tydens sy hongerstaking het die Asharq Sentrum vir Menseregte op 21 Augustus 2012 hulle besorgdheid uitgespreek oor sy gesondheid en het 'n oproep gedoen vir internasionale steun om toegang tot hom deur familie, sy advokaat en menseregteaktiviste moontlik te maak.

Op 15 Oktober 2014 word al-Nimr ter dood veroordeel deur die Gespesialiseerde Strafhof vir Kriminaliteit vir "die strewe na buitelandse inmenging in Saoedi-Arabië", ongehoorsaamheid aan die regering en die opneem van wapens teen die veiligheidsmagte. Op dieselfde dag word sy broer, Mohammad al-Nimr, gearresteer omdat hy informasie oor die terdoodveroordeling op Twitter plaas. Die doodstraf word op 2 Januarie 2016, of kort daarvoor, op al-Nimr voltrek. Saam met hom sterf nog 45 ander persone. Sy teregstelling word deur Iran en sjiïete in die Midde-Ooste veroordeel, asook deur mense in die Weste en deur soennies wat teen sektariese radikalisme gekant is. Die owerheid van Saoedi-Arabië gee sy liggaam nie aan sy familie terug nie, en maak bekend dat alle liggame van die ter dood veroordeelde persone veras is.

Bronne

Vertaal uit die Engelse Wikipedia Artikel op 4 Januarie 2016