Robert Louis Stevenson

Robert Louis Stevenson
Robert Louis Stevenson in 1893
Gebore	13 November 1850 Edinburgh, Skotland
Sterf	3 Desember 1894 Samoa
Nasionaliteit	Skotland
Beroep	Skrywer

Robert Louis Stevenson (13 November 1850 – 3 Desember 1894) was 'n Skotse romansier en reisskrywer, wat veral bekend is om sy boeke Treasure Island, Kidnapped, Die Vreemde Geval van Dr Jekyll en Mnr Hyde en A Child's Garden of Verses.

Stevenson is in Edinburgh gebore en ook daar opgevoed. Hy het vir die grootste deel van sy lewe aan ernstige brongiale kwale gely, maar het ten spyte daarvan voortgegaan om beide wyd te skryf en te reis.

As 'n jong man was hy gereeld in Londen se literêre kringe te sien, en persone soos Andrew Lang, Edmund Gosse, Leslie Stephen en W. E. Henley het hom aangemoedig. Daar word bespiegel dat laasgenoemde dalk die model voorsien het vir die karakter Long John Silver in sy boek Treasure Island. Sy reise het hom na Frankryk, Amerika en Australië geneem, voordat hy hom uiteindelik in Samoa gevestig het, waar hy oorlede is.

Hy was in sy dae 'n glanspersoonlikheid, en het beduidend negatiewe kritiek gedurende die 20ste eeu ontvang vir sy werk, alhoewel sy reputasie grootliks herstel is. Hy word tans as die 26ste mees vertaalde skrywer in die wêreld gereken.

Lewe

Stevenson is in Edinburgh, Skotland gebore, die seun van die ingenieur Thomas Stevenson en Margaret Balfour. Sy ouers was baie godsdienstig, maar gedurende sy kollegejare het hy die geloof laat vaar, hoewel dit 'n invloed op hom sou uitoefen. Sy relatief kort lewe was egter vol ondernemings en avonture. Hy het as ingenieur begin, net soos sy pa (hy het die vuurtoringontwerp gemoderniseer). As gevolg van sy gebrekkige gesondheid, het hy oorgegaan na die regsskool, maar het nie 'n praktiserende advokaat geword nie. Aan die einde van sy lewe was hy 'n plantasie-eienaar en stamleier in Samoa.

Hy het verskeie reise na die koninkryk van Hawaii onderneem en was bevriend met koning David Kalakaua, met wie hy baie tyd deurgebring het. Hy het ook vriende geword met laasgenoemde se niggie, prinses Victoria Ka'iulani, soos Stevenson ook van Skotse afkoms. Op die eiland Molokai besoek hy vader Dami wat daar onder die melaatses in ballingskap gewerk het. 'n Ander tydgenoot van hom was die uitvinder, ingenieur en skrywer Fleeming Jenkin, met wie hy baie ooreenkomste gehad het met betrekking tot sy verlede sowel as sy persoonlike en professionele ambisies. Sy vrou, byna elf jaar ouer, was Fanny Osbourne (10 Maart 1840 - 18 Februarie 1914), 'n sterk en sjarmante persoonlikheid, wat hy in 1876 in Frankryk ontmoet en in 1880 mee getroud is. Sy was 'n groot steun vir hom in sy avontuurlustige, maar ook moeilike lewe. Hy sterf op 44-jarige ouderdom aan breinbloeding in sy tuisdorp Vailima in Samoa.

Bronne

• Alex Clunas, R.L. Stevenson, Precursor of the Post-Moderns?, in Murray, Glen (red.), Cencrastus No. 6, Autumn 1981, pp. 9 – 11
• Michael Shaw (ed.), A Friendship in Letters: Robert Louis Stevenson & J.M. Barrie, Sandstone Press, Inverness, 2020, ISBN 978-1-913207-02-1

Notas

Hierdie artikel is in sy geheel of gedeeltelik vanuit die Engelse Wikipedia vertaal.