Solombra orográfica

Diagrama que representa'l funcionamientu de la solombra orográfica y les sos consecuencies.

Llamaste fastera de solombra orográfica a una zona con precipitación escasa asitiada tres d'una cordelera, na vertiente contraria a los vientos predominantes, nomada sotaventu.

La humedá evaporao de les mases d'agua (mares, océanos, llagos grandes) ye tresportada poles brises terrestres dominantes hacia les árees interiores, más seques y caldies. Cuando se topen con estructures montañoses altes l'aire húmedu xube pela lladera hacia'l picu, onde condensa formando nimbos y entama a precipitar. Si les cordeleres son anches y altes abondo como pa bloquiar, o polo menos retardar el tiempu suficiente l'ascensu d'estes mases d'aire húmedu, la mayoría, sinón toda la humedá, descargarase en forma de lluvia sobre la lladera de barloventu anantes de llegar al so cumal. Amás, l'aire, per aciu del efeutu Foehn, forma vientos "Foehn", caldios y secos, na lladera de sotaventu, qu'absorben humedá del terrenu; de resultes, fórmase una amplia rexón de "solombra", con clima secu, pela otra vertiente de la cordillera, con un paisaxe que puede ser una estepa arbustiva, un matorral xerófilu (o semidesiertu) o inclusive un desiertu.

Descripción

La solombra orográfica esiste porque l'aire húmedu templáu asciende, por ascensu orográficu, hasta'l cumal d'una cadena montañosa. Según la presión atmosférica va menguando col aumentu d'altitú l'aire va espandiéndose y enfriándose por un procesu adiabáticu hasta'l puntu nel qu'algama'l so puntu de rosada. Nesi momentu la humedá condénsase sobre la montaña, forma lo que se conoz como nube orográfica y precipita sobre'l so cumal y sobre la so lladera de barloventu. L'aire, muncho menos húmedu, baxa pola lladera de sotaventu. Al facelo va caleciéndose progresivamente per aciu de la compresión adiabática o efeutu Foehn, aumentando asina la cantidá d'humedá que puede absorber y creando, al facelo, una rexón árida^[1].

Rexones del mundu con solombra orográfica importante

Los vientos predominantes distribúinse, en bandes llatitudinales, de forma regular alredor de la zona ecuatorial de la Tierra. La zona de los vientos alisios estiéndese ente los 30ºN y los 30ºS; nella'l aire sopla predominantemente del noreste nel Hemisferiu Norte y del sureste nel Hemisferiu Sur^[2]. Los vientos del oeste son los predominantes nes llatitúes medies, ente los 30º y los 60º de llatitú, y soplen predominantemente del suroeste nel Hemisferiu Norte y del noroeste nel Hemisferiu Sur^[3].

Ente les rexones del mundu con mayor solombra orográfica tenemos:

Vista de la cordelera del Atlas, que la so solombra orográfica ye en parte responsable de l'aridez del desiertu del Sahara.

África

África del Norte

• La secura del Sáḥara acentúase por dos fuertes efectos de solombra orográfica provocaos por dos grandes cadenes montañoses, con picos de más de 4.000 m d'altor: al noroeste, la cordelera del Atlas, paralela a la costa mediterránea de Marruecos, Arxelia y Tunicia; y al sureste'l Macizu Etíope, allugáu n'Etiopía, na redolada del Cuernu d'África. Na fachada de barlloventu de la cordelera del Atlas los vientos húmedos y templaos que soplen del noroeste y vienen del océanu Atlánticu, ricos en vapor d'agua, vense obligaos a xubir lladera arriba. L'altitú creciente enfríalos, lo que provoca que l'escesu d'humedá condénsese en nubes altes que descarguen la so precipitación sobre esa cara de la cordelera. Tres d'esto, l'aire secu y fríu entama'l so descensu pela otra cara, la de sotaventu, y entama a calecer. Esti calecimientu evapora la humedá, y fai desaparecer les nubes, impidiendo la formación de lluvia y creando condiciones climátiques desértiques nel Sáḥara. El mesmu fenómenu obsérvase nel Macizu Etíope; aquí l'efectu de solombra orográfica ye mayor, una y bones esta cordelera ye más llarga. El vientu qu'aporta a ella ye'l monzón d'Asia del sur, qu'aporta a la fachada occidental del macizu dende l'océanu Índicu ya'l mar Arábigu. Esta fastera ye la que recibe la lluvia, mentantu que la oriental, la de sotaventu, ye estremadamente seca, y contribúi a que l'aridez del estremu oriental del Sáḥara, que ye'l llugar más soleáu y secu del mundu, seya estrema. Namái nel desiertu d'Atacama, en Chile y Perú, alcuéntrase un nivel d'aridez igual.
• Les rexones desértiques del Cuernu d'África (n'Etiopía, Eritrea, Somalia y Xibuti), como'l desiertu de Danakil, sonlo tamién pola influyencia nel calecimientu y secura del aire del efectu de solombra orográfica del Macizu Etiíope.

África del Sur

• La fastera de barloventu de la islla de Madagascar, que recibe vientos del este, tien un clima tropical húmedu, mentanto que'l sur y l'oeste de la islla sufren l'efectu de solombra orográfica de les tierres altes del centru de Madagascar, y son desértiques o con cubiertes vexetales perprobes, de matorral espinosu. Lo mismo asocede na islla de Reunión. Na de Tristan da Cunha Sandy Point, el puntu más estremu de la so costa oriental, ye más caldiu y secu que l'asentamientu d'Edimburgu de los Siete Mares, de clima lluviosu y ventosu, na costa occidental.
• Na provincia del cabu Occidental (Sudáfrica), el valle del ríu Breede y la meseta semidesértica de Karoo sufren la solombra orográfica del Cinturón de Pliegues del Cabu, y son peráridos. Asina, mentantu que les partes más húmedes de la cordelera tienen hasta 1.500 mm de lluvia añal, Worcester recibe namái unos 200, y la so única vexetación ye herbácea.

El territoriu d'Irán ta embaxu la influyencia de la solombra orográfica de los montes Elburz, asitiaos al norte del país (xustu al sur del mar Caspiu), y por culpa d'ella predomina'l clima semiáridu en bona parte de la so estensión.

Asia

Asia central y del norte

• L'Himalaya, y les cordeleres conectaes con elli, contribúin a l'aridez del Asia Central, incluyendo'l desiertu de Gobi, en Mongolia, y les estepes semiárides de Mongolia y la fastera centru-septentrional y noroccidental de China.
• La Cordal Verjoyansk, en Siberia oriental, ye'l sitiu más fríu del Hemisferiu Norte por culpa de que los vientos húmedos del sureste que vienen del océanu Pacíficu pierden la so humedá nos montes costeros, muncho primero de llegar al valle del ríu Lena. Allí, alredor del aire continental, secu y perfríu, fórmase demientres l'iviernu l'anticiclón de Siberia, responsable de que la temperatura media del mes más fríu del añu en ciudaes de Sajá como Yakutsk, Verjoyansk y Oimiakón seya de −38°C.

Asia oriental

• El desiertu d'Ordos sufre la solombra orográfica de cadenes montañoses como'l Kara-naryn-ula, el Sheitenula y los montes Yin, qu'enllacen col estremu meridional del Gran Khingan.
• La rexón central de Myanmar ta na solombra orográfica de la cordelera d'Arakan, y ye cuasi semiárida: tien namái 750 mm de precipitación añal, que contrasten colos 5.500 mm de la costa del estáu de Rakáin, que mira a la badea de Bengala.
• La llanada alredor de Tokiu, conocida como llanada de Kantō, ye significativamente más seca n'iviernu que'l restu del país pola solombra orográfica de los cordales que l'arrodien, como los Alpes xaponeses, que bloqueen los vientos del noroeste que vienen de Siberia.

Asia meridional

• La fastera oriental de los Ghats occidentales produz solombra orográfica na meseta del Decán, nún territoriu qu'inclúi Karnakata septentrional, Beed, Osmanabad, la meseta de Vidharba, la fastera oriental del estáu de Kerala y la occidental del de Tamil Nadu, too ello en India.
• El desiertu de Thar ta na solombra orográfica de los montes Aravalli al sureste, l'Himalaya al noreste y les cordales de Kirthar y Sulaiman al oeste.

Asia occidental

• Los cumales de los montes d'El Cáucasu al oeste y del Hindú Kush y el cordal de Pamir al este proyecten la so solombra orográfica sobro los desiertos de Karakum y Kyzyl Kum, al este del mar Caspiu, y tamién sobre la estepa kazaxa.
• La meseta d'Anatolia, de clima semiáridu, sufre la solombra orográfica de cadenes montañoses como los montes Pónticos al norte y los montes Tauro al sur.
• La cordelera d'El Líbanu proyeuta la so solombra orográfica sobre la parte septentrional del valle de la Becá y la cordelera del Antilíbanu.
• El desiertu de Xudea, el mar Muertu y les lladeres occidentales los montes de Moab sufren la solombra orográfica de los montes de Xudea.
• El desiertu de Lut, n'Irán, una de les zones más inhóspites pa la vida na Tierra, ta na solombra orográfica de los montes Elburz y Zagros.

Europa

Europa central

• Les llanaes de Limagne y Forez, na metá septentrional del Macizu Central francés, sufren la solombra orográfica del macizu. La llanada de Limagne, na que ta la ciudá de Clermont-Ferrand, una de les más seques del país (600 mm de lluvia al añu), sufre la solombra de la Cadena de los Puys, que tienen 2.000 mm de lluvia añal.
• La rexón vinícola d'El Piamonte, n'Italia del norte, soporta la solombra orográfica de los montes que l'arrodien per ende. Asti recibe namái 527 mm de precipitación al añu, que la convierten nún de los sitios más secos de la Italia continental^[4].
• Dellos valles del interior de los Alpes sufren una fuerte solombra orográfica: la rodiada de Gap y Briançon, en Francia, y el distritu suizu de Zernez.
• La rexón polaca de Cuyavia y la metá oriental de la rexón histórica de la Gran Polonia tienen una precipitación media añal d'alredor de 450 mm per aciu de la solombra orográfica del Szwajcaria Kaszubska, que les convierten nún de los sitios más secos de la Llanura nordeuropea^[5].

Europa septentrional

• Los Peninos de la Inglaterra septentrional, los montes de Gales, el Distritu de los Llagos y les Tierres Altes d'Escocia creen, per aciu de los vientos del suroeste predominantes, una solombra orográfica que inclúi la mayoría de la parte oriental del Reinu Xuníu. Manchester y Glasgow, por exemplu, reciben el doble de lluvia que Sheffield y Edimburgu respectivamente (y ello pese a que nun hai montaña denguna ente Edimburgu y Glasgow). El contraste ye entá más acusáu más al norte: Aberdeen recibe al añu la tercera parte de la lluvia que Fort William or Skye. La llanura de Fens, en Anglia oriental, recibe la misma lluvia al añu que Sevilla^[6].
• Los Alpes escandinavos crean una solombra orográfica sobro les tierres baxes asitiaes al este de la cordelera, ya impiden que'l clima oceánicu llegue a eses zones. Asina, Bergen, asitiáu al oeste de los montes, recibe 2250 mm añales de lluvia^[7], mentantu qu'Oslu, asitiáu al este, recibe 760 mm y Skjåk, un conceyu asitiáu nun valle fonderu, recibe namái 280 mm.

Europa meridional

• La Cordelera Cantábrica marca una dixebra clara ente la Cordelera Cantábrica al norte y la meseta central de la península Ibérica al sur. Les lladeres que miren al norte reciben gran cantidá de lluvia del golfu de Bizkaia, mentantu que les meridionales sufren la solombra orográfica de la cordelera. L'efectu más evidente de la solombra na península Ibérica, sicasí, vese nes provincies españoles d'Almería, Murcia y Alacant. Toes elles, principalmente como resultáu de la solombra de la cadena montañosa que percorre la so faza occidental y bloquea los vientos del oeste, tienen una precipitación añal media de 300 mm, la menor d'Europa.
• La Rexón del Norte, en Portugal, amuesa un contraste igual ente les lladeres occidentales de los montes que dan pasu a la meseta del centru de la península Ibérica y les orientales. Asina, nel parque nacional Peneda-Gerês hai 3.000 mm añales de precipitación, y menos de 500 nel valle del Douro. Chaves, asitiáu a 28 km de Montalegre, recibe la metá de precipitación al añu qu'esta segunda ciudá^[8].
• La fastera oriental de los Pirineos proyeuta la so solombra sobre la rexón de Cerdanya, nel sur de Francia.
• El valle del ríu Vardar y la faza de tierra que ta ente Skopie (Macedonia) y Atenes (Grecia) tán na solombra orográfica de los montes Prokletije y el Pindu. A barloventu los montes Prokletije tienen la mayor cantidá de lluvia añal d'Europa (5.000 mm) ya inclusive restos de pequeños glaciares pese a que la so temperatura añal media ta bien perriba de 0ºC, pero les tierres asitiaes a sotaventu reciben namái 400 mm añales de precipitación.

América del Norte

Con calter xeneral, toles Llanures Interiores d'América del Norte ven proyectades nelles la solombra orográfica del Cordal norteamericanu, qu'impide qu'aporten a elles los vientos del oeste, cargaos d'humedá del océanu Pacíficu. Los efectos más acusaos d'esta solombra, sicasí, obsérvense'n rexones concretes dientro del cordal, a sotaventu de cadenes montañoses concretes. Les mayores solombres orográfiques del oeste d'Estaos Xuníos son les que proyecten Sierra Nevada y la cordelera de les Cascade^[9].

Caribe

• Nes islles de Cuba, La Española, Xamaica y Puertu Ricu les fasteres meridionales tán na solombra orográfica de los vientos del oeste, y pueden recibir precipitaciones de namái 400 mm al añu, frente a los 2.000 mm de les fasteres nororientales de les islles, asitiaes a barloventu, y los más de 5.000 mm de delles zones de más altor.

América del Norte

• Los desiertos de la provincia xeolóxica de Basin and Range, n'Estaos Xuníos y Méxicu, esto ye, les árees seques asitiaes al este de la cordelera de les Cascade (Oregón y Washington) y la Gran Conca, qu'abarca cuasi tol territoriu de Nevada y la metá del d'Utah, son resultáu de la solombra orográfica. La cordelera de les Cascade proyecta tamién la so solombra sobro la conca del ríu Columbia, al este del estáu de Washington, y sobro dellos valles de la provincia canadiense de Columbia Británica. Especialmente obre los valles de los ríos Nicola y Thompson, que tienen precipitaciones añales perbaxu de los 250 mm, y el valle del ríu Okanagan, que nun pasa de 425 mm añales^[10][11].
• Les lladeres orientales de la cordelera costera de California, nes fasteres central y meridional d'esi estáu, proyecten sobre la metá meridional del valle de San Joaquín abonda solombra orográfica como pa provocar que la zona alredor de Bakersfield tea condiciones climátiques y ecolóxiques asemeyaes a les d'un desiertu.
• San José y la so rodiada avecen a ser más secos que'l resto del área de la badea de San Francisco como resultáu de la solombra orográfica de los montes Santa Cruz.
• El Valle de la Muerte, asitiáu per detrás de la cordelera costera de California y de la cordelera de Sierra Nevada, ye'l sitiu más secu d'América del Norte y ún de los más secos del mundu. Nesti casu, a la solombra orográfica súmase qu'esti valle ta mui perbaxu del nivel del mar, lo que fai que les altes presiones y la sequíe predominen pol gran pesu de l'atmósfera sobro la zona.
• La rodiada d'Ashcroft, na Columbia Británica, ye l'únicu desiertu verdaderu de Canadá, y ta na solombra orográfica de los montes Costeros de Canadá^[12].
• Yellowknife, la capital y ciudá más poblada de los Territorios del Noroeste, en Canadá, ta na solombra orográfica de les cordeleres asitiaes al oeste de la ciudá.

La cordelera de los Andes impide que lleguen la humedá y la lluvia de la conca del Amazones a les tierres asitiaes al oeste d'ella (Bolivia).

América del Sur

• El desiertu d'Atacama, en Chile, ye'l desiertu non polar más secu de la Tierra como resultáu de la solombra orográfica doble de los Andes, asitiaos al este d'elli, que bloqueen l'aire húmedu de la conca del Amazones, y de la Cordelera Costera de Chile, allugada al oeste del desiertu, qu'impide la llegada del aire húmedu del océanu.
• Cuyo y la Patagonia oriental son árides porque la solombra orográfica de los Andes impide la llegada de los vientos predominantes del oeste. L'aridez de les tierres asitiaes al pie de la fastera oriental de la cordelera andina va menguando en sentíu sur a midida que va amenorgando l'altor de la cordelera. De resultes, el desiertu de Patagonia desarróllase más, nes llatitúes más meridionales, na costa atlántica, contribuyendo a dar forma al patrón climáticu conocíu como Diagonal Árida d'América del Sur^[13]. La rexón vinícola de Cuyo y Patagonia del norte, n'Arxentina, ye completamente dependiente del riegu artificial, pal que úsase l'agua de los munchos ríos que desagüen del desxelu de los Andes.
• La península de Guajira, al norte de Colombia, ta na solombra orográfica de la Sierra Nevada de Santa Marta, y pese a la so llatitú tropical ye cuasi árida: malpenes cae lluvia demientres 7-8 meses al añu, y ye imposible sacar alantre cultivu dengún ensin riegu artificial.

Oceanía

Los Alpes del Sur, na islla Sur de Nueva Zelanda, proyecten la so solombra orográfica sobre les tierres asitiaes al este d'ellos.

Australia

• En Nueva Gales del Sur y el Territoriu de la Capital Australiana la rexón de Monaro ta na solombra orográfica doble de los montes Snowy al noroeste y de les cordeleres costeres al sureste. De resultes, parte de la rexón ye tan seca como les tierres cerealeres de Nueva Gales. Cooma, por exemplu, recibe 535 mm de lluvia al añu, mentantu que Batlow, asitiada na fastera occidental de les cordeleres, recibe 1.220 mm. Dafechu, la propia capital, Canberra, ta na solombra orográfica de la cordelera de Brindabella, polo que recibe namái que 580 mm de precipitación media añal. Amás, na estación fría, el Gran Cordal Divisoriu proyecta la so solombra sobre bona parte de la costa suroriental del país (Sydney, la Costa Central, Illawarra, la Costa Sur o el valle del ríu Hunter), protexéndola de los vórtices polares de dirección suroeste que se formen nel océanu Glacial Antárticu^[14][15].
• Na islla de Tasmania la rexón central, los Midlands, sufren una fuerte solombra orográfica que fai que llueva namái una quinta parte de les precipitaciones que caen nes tierres altes del oeste de la islla.
• Les rexones de Wheatbelt y Great Southern, n'Australia occidental, tán a la solombra de los montes Darling, asitiaos al oeste d'elles. Mandurah, cerca la costa, recibe 700 mm de precipitación añal; Dwellingup, 40 km tierra adentro, na metá de los montes, recibe más de 1.000 mm; y Narrogin, 130 km más al este, recibe menos de 500 mm de precipitación añal.

Islles del Pacíficu

• Hawaii tamién tien zones de solombra orográfica, que faen qu'haya desiertos^[16]. La elevación orográfica provoca la segunda mayor precipitación añal del mundu, los 12.700 mm de lluvia recoyíos na islla de Kauai, y la consiguiente solombra na fastera de sotaventu^[1]. Amás, toa la islla de Kahoolawe ta na solombra orográfica del volcán Haleakala.
• Nueva Caledonia asítiase nel trópicu de Capricorniu, ente los 19º y 23º de llatitú sur. El clima de les islles es tropical, y la lluvia llega a ellas de manes de vientos del este. Los montes centrales de la islla proyecten la so solombra sobre la fastera occidental de la Grande Terre, con precipitaciones enforma menores que les de la fastera oriental.
• Na islla Sur de Nueva Zelanda alcuéntrase una de les solombres orográfiques más importantes de la Tierra. Los Alpes del Sur paran la humedá que llega del mar de Tasmania, y reciben el equivalente, en nieve, d'ente 6.300 mm y 8.900 mm de precipitación añal, que forma grandes glaciares na so fastera occidental. Al este de los Alpes, a solo 50 km de los cumales nevaos, la lluvia ye muncho menor: 760 mm de media, con zonas con menos de 380 mm de lluvia al añu.

Referencies

1. Whiteman, C. David (2000). Mountain Meteorology: Fundamentals and Applications. ISBN 0-19-513271-8.
2. Glossary of Meteorology (2009). «trade winds». Glossary of Meteorology. American Meteorological Society. Consultáu'l 4 July 2021.
3. Glossary of Meteorology (2009). «westerlies». Glossary of Meteorology. American Meteorological Society. Consultáu'l 4 July 2021.
4. «Asti weather». weatherbase.com.
5. S.A, Wirtualna Polska Media (2016-02-02). «Kujawy - najsuchsze miejsce w Polsce» (polacu). Consultáu'l 2020-01-31.
6. «UK Rainfall averages».
7. «Spør meteorologen!». Consultáu'l 2019-05-07.
8. «Iberian Climatic Atlas». IPMA, AEMET. Consultáu'l 24 December 2020.
9. «How mountains influence rainfall patterns». USA Today. 2007-11-01. https://www.usatoday.com/weather/tg/wrnshdw/wrnshdw.htm. Consultáu'l 2008-02-29. 
10. Glossary of Meteorology (2009). «Westerlies». American Meteorological Society. Consultáu'l 2009-04-15.
11. Sue Ferguson (2001-09-07). «Climatology of the Interior Columbia River Basin». Interior Columbia Basin Ecosystem Management Project. Archiváu dende l'orixinal, el 2009-05-15. Consultáu'l 2009-09-12.
12. «Canada's only desert is in B.C. But not where you think it is».
13. Bruniard, Enrique D. (1982). «La diagonal árida Argentina: un límite climático real» (en castellanu). Revista Geográfica:  páxs. 5–20. 
14. Rain Shadows by Don White. Australian Weather News. Willy Weather. Retrieved 24 May 2021.
15. And the outlook for winter is … wet by Kate Doyle from The New Daily. Retrieved 24 May 2021.
16. Giambelluca, Tom; Sanderson, Marie (1993) Prevailing Trade Winds: Climate and Weather in Hawaií, páx. 62. ISBN 9780824814915.

Enllaces esternos

• Wikimedia Commons acueye conteníu multimedia sobre Solombra orográfica.