Laura Robson
|
C'l artìcul chè 'l è scrit in
Miranduléś |
La Laura Robson (Melbourne, 21 ad Śnar dal 1994, a s lèś [ˈlɔrə ˈrɒbsən]) l'è na tenìsta ingléśa da 'l 2008. Nada in Austràglia, a daśdòt méś l'è andàda a star a Singapōr, prima ad spatinàr insém a i sò genitōr Andrew e Kathy in dal Régn Unî a siē an. Adès la stà a Lóndra.
L'è prufesiunìsta da 'l 2008. La dróa al bras sinìstar e la tira 'l arvèrs a dū maṅ. L'è élta 180 cm e la péśa 67 chilo. La gh'à dū càṅ labrador, Ella e Kiri. La sità ch'a gh piàś da piò l'è New York.
.jpg)
In dla sò caréra l'è rivàda a èsar la nùmar trénta-sèt dal mónd 20 ad Maǵ dal 2013 e l'à vins un tìtul ITF. Insém a Andy Murray l'à mis in bisàca la mdaja 'd argìnt in dal dópi misć a gl'Ulimpìadi dal 2012 pardénd da Maks Mirny e da la Viktoryja Azaranka dla Rùsia biànca par 6–2 3–6 [8–10]. A quatòrd'ś an l'à purtâ a cà al turnèo ad Wimbledon dal śóvni e l'à śugâ anc dū finàli a gl'Australian Open in cla categurìa lè (in dal 2009 e in dal 2010).
L'ingléśa l'è stada bòna ad bàtar la Kim Clijsters, la Venus Williams, l'Agnieszka Radwańska, la Petra Kvitová, la Jelena Dokić, la Na Li e l'Angelique Kerber.
Caréra
La Laura la fà al sò debùt in dal sircùit WTA in Lussembûrg in d'l Utóbar dal 2008 ma la pèrd da l'Iveta Benešová 6-1 2-6 3-6. In Nuvémbar invéci la vins 'l ITF ad Sunderland. 'L an dòp la dasfùta na carta salvàdga par śugàr a Wimbledon ma la pèrd subìt da la Daniela Hantuchová par 6-3 4-6 2-6.
In dal 2010 la pasa 'l qualificasiòṅ a Birmingham ma la pèrd a 'l secónd tùran da la Yanina Wickmayer. A 'S-Hertogenbosch la và fóra subìt ad òpra dla Dominika Cibulková par 3-6 4-6. Stés quèl anc a Wimbledon in dua a vins la nùmar tri dal mónd Jelena Janković cun al puntéǵ ad 6-3 7-6. La finìs 'l an pardénd a Uśàka da la Kimiko Date-Krumm, piasàn-as a 'l 206śum pòst dla clasìfica dal fémni.
In dal 2011 la śōga mâl ma a Wimbledon la bat l'Angelique Kerber a 'l prim tùran prima ad cédar a la Marija Šarapova 6-7 3-6. Dòp soquànt tentatìṿ in di an pasâ andâ mâl, finalmènt la pasa 'l qualificasiòṅ a gl'US Open.
In dal 2012 la riva a 'l secónd tùran a Birmingham (4-6 6-3 4-6 da la Marina Eraković) e a Eastbourne (4-6 5-7 da l'Ekaterina Makarova). A Wimbledon (quìnta carta salvàdga ad fila) la pèrd subìt in tri sét da l'itagliàna Francesca Schiavone. In Luj la và a śugàr in sla tèra rósa ad Palèrum. Chè l'è bòna ad bàtar la Roberta Vinci 6-3 7-5 e la Carla Suárez Navarro 6-4 2-6 6-3, insfilsànd-as acsè in semifinàl in dua la céd par 6-2 5-7 2-6 a la Barbora Záhlavová-Strýcová. Dòp un prim tùran a New Haven (3-6 3-6 da la francéśa Marion Bartoli), la s fà strada a gl'US Open in dua la bat prima la Kim Clijsters e pò la Na Li, prima ad lasàr strada a la Samantha Stosur 4-6 4-6. Al 22 ad Setémbar la śōga la sò prima finàl WTA a Cantón ma la la pèrd da la Hsieh Su-wei par 3-6 7-5 4-6. La sèra 'l an da nùmar sinquànta-tri dal mónd.
In dal Śnar dal 2013 la pèrd par dū vòlti ad fila da la Sloane Stephens a Hobart e a gl'Australian Open ma chè almànc l'è bòna ad mandàr a cà la Petra Kvitová par 2-6 6-3 11-9. In di tri turnèo a vgnir invéci la và sèmpar fóra subìt a Doha (4-6 1-6 da la Daniela Hantuchová), in Dubai (4-6 6-2 6-7 da la Julija Putinceva) e a Indian Wells (6-2 6-7 1-6 da la Sofia Arvidsson). A Miami la bat sōl la Camila Giorgi prima ad cédar in tri sét a l'Alizé Cornet. La tórna a far dascórar incóra ad lē a Madrid (tèrs tùran sćiancànd 6-3 6-1 la nùmar quàtar dal mónd Agnieszka Radwańska) e a Róma (6-3 6-2 a la Venus Williams prima ad cédar a sò surèla Serena 2-6 2-6).