HAL Light Combat Helicopter
| HAL Light Combat Helicopter | |
|---|---|
 helicóptero de ataque | |
| Fabricante | Hindustan Aeronautics Limited |
| Primeiro voo | 29 de marzo de 2010 |
| Unidades construídas | 4 |
O HAL Light Combat Helicopter (LCH) é un helicóptero multirol de combate indio desenvolvido e fabricado polo construtor aeronáutico Hindustan Aeronautics Limited (HAL). O aparello foi pedido tanto pola Forza Aérea da India como polo Exército da India. O modelo tamén intenta ser vendido no mercado de exportación e dende 2015 HAL está buscando clientes estranxeiros para o LCH.
O ímpeto polo desenvolvemento do LCH chegou na forma da guerra de Kargil, un conflito loitado entre a India e Paquistán en 1999, que revelou que as forzas armadas indias carecían dun helicóptero armado axeitado capaz de operar sen restricións nun escenario a grande altitude. En consecuencia, tanto HAL como as forzas armadas indias comezaron a explorar esforzos cara a definición dun helicóptero de combate conceptual que realizase ese papel. Durante o ano 2006 a compañía anunciou que lanzara un programa de desenvolvemento para producir ese tipo de helicóptero ao que chamaron simplemente Light Combat Helicopter. Orixinalmente agardábase que o LCH alcanzase a capacidade operativa inicial en decembro de 2010, porén, o desenvolvemento do tipo prolongouse e estivo suxeito a varios atrasos, algúns deles debido aos provedores.
O LCH baseouse amplamente nun helicóptero indio anterior desenvolvido e fabricado por HAL, o Dhruv; usar este aparello como punto de partida reducíu considerablemente o custo do programa. O 29 de marzo de 2010 o primeiro prototipo do LCH realizou o seu voo de estrea. Realizouse un extensivo programa de probas, usando un total de catro prototipos. Durante o transcurso desas probas o LCH gañou a distinción de ser o primeiro helicóptero de ataque en aterrar no glaciar de Siachen, aterrando repetidas veces en helipads a grande altitude, algúns deles a máis de 4 000 metros. A mediados de 2016 o LCH completou as súas probas de rendemento abrindo o camiño para a certificación da súa configuración básica. O 26 de agosto de 2017 inaugurouse formalmente a súa produción a grande escala.