Jameson (whisky)

Botellas de Jameson whisky.

Jameson é unha destilería de whisky irandés mesturado. Actualmente é destilado na cidade de Cork, aínda que orixinalmente, en 1780, era destilado en Dublín, onde se segue a realizar a mestura. As súas vendas anuais superan os 22 millóns de botellas, facendo de Jameson o whisky irlandés máis vendido do mundo.^[1]

Historia

Pote histórico de fabricación de whisky no complexo de destilado de Jameson en Midleton, Cork.

A compañía foi fundada polo escocés John Jameson,^[2] emparentado coa familia Haig, destiladores de Whisky escocés. O seu fillo emparentouse coa familia Stein, un dos maiores destiladores de Escocia e propietarios da destilería de Bow Street, en Dublín. Os Haig tamén estaban emparentados cos Stein por medio dun matrimonio anterior. John Jameson adquiriu a destilería de Bow Street en 1780, producindo 30.000 gallons anuais. Contra o século XIX xa era o segundo produtor de whisky en Irlanda e un dos maiores produtores do mundo, con 1 000 000 de galóns anuais. Dublín converteuse no epicentro da produción de whisky a nivel mundial. En 1805 converteuse no maior produtor mundial.

A compañía Cork Distillers uniu forzas cos seus rivais John Jameson e John Powers para formar o Irish Distillers Group en 1966. A nova Midleton Distillery, construída por Irish Distillers, produce actualmente a meirande parte do whisky irlandés que se vende en Irlanda. As novas instalacións lindan coas antigas, convertidas na actualidade nunha atracción turística.

A marca Jameson foi adquirida polo grupo francés Pernod Ricard en 1998, cando os franceses mercaron Irish Distillers.

Variedades de whisky

Ademais do Jameson Original, as reservas de Jameson inclúen:

• Jameson 12 Year Old Special Reserve (antigamente coñecido como Jameson 1780)
• Jameson 12 Year Old Distillery Reserve exclusivo na Old Jameson Distillery en Smithfield, Dublin e na Jameson Single Distillery de Midleton, en Cork.^[3]
• Jameson Gold Reserve (a única variedade de Jameson que emprega o carballo americano).
• Jameson 18 Year Old Limited Reserve.
• Jameson Rarest Vintage Reserve
• Jameson Signature Reserve (exclusivo nos Travel Retail & Duty Free de todo o mundo)
• Jameson Crested Ten Year Old

Notas

1. "Irish Distillers". Arquivado dende o orixinal o 18 de novembro de 2007. Consultado o 22 de xuño de 2011. 
2. "Copia arquivada". Arquivado dende o orixinal o 20 de marzo de 2009. Consultado o 22 de xuño de 2011. 
3. Jameson Visitor Center

Véxase tamén

Wikimedia Commons ten máis contidos multimedia na categoría:  Jameson

Ligazóns externas

• Sitio web oficial de Jameson (en inglés)