Michael Jackson

Michael Jackson
Michael Jackson in 1988
Agtergrondinligting
GeboortenaamMichael Joseph Jackson
Gebore29 Augustus 1958
Gary, Indiana (VSA)
Sterf25 Junie 2009
Los Angeles, Kalifornië (VSA)
GenresPop, R&B, rock
Beroep(e)Sanger, liedjieskrywer, plateprodusent, danser, choreograaf, vermaakpersoonlikheid, akteur, sakeman
InstrumenteStem, verskeie instrumente
Jare aktief1968–2009
EtiketteMotown, Epic
AssosiasiesThe Jackson 5, The Jacksons
Webwerfmichaeljackson.com

Michael Joseph Jackson (29 Augustus 1958, Gary, Indiana (VSA); † 25 Junie 2009, Los Angeles, Kalifornië) was 'n Amerikaanse sanger, liedjieskrywer, danser, vermaakpersoonlikheid, besigheidsman en humanis wat as een van die suksesvolste musiekkunstenaars in die geskiedenis van die popmusiek bekend staan. Sy unieke bydraes tot populêre musiek en dans, tesame met sy hoogs gepubliseerde persoonlike lewe, het hom vir vier dekades 'n sentrale figuur van die popkultuur gemaak. Hy het 13 Grammy-toekennings gewen en na raming sowat 750 miljoen albums verkoop.[1] Tydens sy sololoopbaan het hy dertien nommereen-treffers opgelewer. Ander prestasies sluit in dat hy een van die weinig kunstenaars was om twee keer in die Rock and Roll Hall of Fame vereer te word en vele Guiness-wêreldrekords — insluitende die rekord vir "Most Successful Entertainer of All Time". Sy grootste treffers sluit "Thriller" en "Billie Jean" in.

Huldeblyke aan Michael Jackson in Los Angeles
Michael Jackson het sy laaste rusplek in die Groot Mausoleum van Forest Lawn Memorial Park in Glendale, Kalifornië gevind

Michael Jackson is die sewende kind in die Jackson-gesin en het sy debuut in 1968 as lid van The Jackson 5 gemaak. Hy het sy sololoopbaan in 1971 afgeskop terwyl hy nog lid van dié groep was — 'n loopbaan wat hom die benaming "Koning van Pop" besorg het. Sy album Thriller (1982) is vandag nog die suksesvolste musiekalbum tot dusver, met vier van sy ander soloalbums wat ook onder die topverkoperranglyste gelys word: Off the Wall (1979), Bad (1987), Dangerous (1991), en HIStory: Past, Present and Future, Book I (1995).

In die 1980's het hy 'n dominante figuur in die Amerikaanse popkultuur geword. Hy was die eerste Afro-Amerikaanse vermaakkunstenaar wat 'n sterk crossover-volgelingsbasis op MTV opgebou het, met musiekvideo's soos "Beat It", "Billie Jean", en "Thriller" — wyd geloof vir hul aandeel in die transformering van die musiekvideo, as promosiemiddel, in 'n kunsvorm — wat gewildheid aan die relatiewe nuwe televisiekanaal help bring het. Video's soos "Black or White" en "Scream/Childhood" het hom prominent op MTV gehou tot in die 1990's.

Benewens sy sukses op televisie het hy 'n aantal ingewikkelde danstegnieke met sy ryke verhoogvertonings gepopulariseer, insluitende tegnieke soos die robot-dans en die moonwalk. Sy kenmerkende musikale klank en stemstyl het menige hiphop-, pop- en kontemporêre R&B-kunstenaar oor vele generasies beïnvloed. Jackson het ook 39 liefdadigheidsprojekte ondersteun: hy het miljoene Amerikaanse dollars ingesamel en geskenk deur middel van sy Heal the World Foundation (Afrikaans: Maak-die-wêreld-gesond-stigting), asook deur liefdadigheidstreffers op te voer.

Jackson het aansienlike opspraak gewek as gevolg van sy immer veranderende voorkoms en sy soms eienaardige gedrag. Sedert die 1990's het hy gesondheidsprobleme begin ondervind, en teenstrydige verslae oor die toestand van sy finansies is uitgereik. In 1993 is sy gesondheid en sy reputasie 'n kwaai knou toegedien nadat hy van seksuele kindermishandeling beskuldig is. Weens 'n gebrek aan bewyse is geen aanklagte egter aanhangig gemaak nie. Hy het twee maal in die eg getree en het drie kinders verwek, van wie een deur 'n surrogaatmoeder — optrede wat verdere gissinge oor sy lewe aangevuur het. Hy is in 2005 weens kindermolestering aangekla en op alle aanklagte vrygespreek. Michael Jackson is op 25 Junie 2009 in die ouderdom van 50 aan 'n hartaanval oorlede.

Diskografie

[wysig | wysig bron]
  • Got to Be There (1972)
  • Ben (1972)
  • Music & Me (1973)
  • Forever, Michael (1975)
  • Off the Wall (1979)
  • Thriller (1982)
  • Bad (1987)
  • Dangerous (1991)
  • HIStory (1995)
  • Invincible (2001)

Verwysings

[wysig | wysig bron]
  1. ↑ (en) edition.cnn.com: Michael Jackson announces "curtain call" concerts (6 Maart 2009), laaste besoek op 2 Julie 2009

Eksterne skakels

[wysig | wysig bron]
  • (en) Amptelike webwerf
  • (en) "Michael Jackson". Encyclopædia Britannica. Besoek op 24 Oktober 2024.
  • (en) Michael Jackson in die Internet-rolprentdatabasis