Cumans

Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla.

Representación d'os cumans en a Cronica de Radzivill.

Os cumans estioron un pueblo orichinario d'Asia Central d'a branca quipchak d'os pueblos turquicos. D'alcuerdo con as suyas tradicions tienen o suyo orichen en a tribu Kimek. Han tenito muita importancia en a etnochenesi de muitos pueblos turquicos d'Europa y Asia Central dimpués que a invasión mongola fese que as diferents comunidaz cumanas tenesen historias diferents en cada país. Tamién han tenito importancia en a historia politica d'Hongría, Echipto, Bulgaria y Vlaquia.

Orichens d'os cumans en as divisions tribals turquicas

A tribu "mai" d'os cumans medievals yeran os Bozok, que feban parte d'os oguces. Os Güncan, una branca d'os Bozok, incluiba especificament a os cumans con os clans y tribus adchacents Kayı, Bayat, Alka Evli u Alaüukaevli y Kara Evli ensemble, en os que bels antrologos los incluyen como subdivisions- As atras brancas d'os Bozok yeran Ay Can y Yildiz Can. Os Bozoks yeran una d'as dos grans familias tribals d'os oguces, estando l'atra Uzok. Una d'as brancas d'os Uzok yera a tribu Gök-kan, que incluiba a los pacinacos. Totas estas tribus teneban como totem diferents aus de presa d'as familias Falconidae y Accipiteridae y o totem aviar se convertió en l'heraldico medieval d'a Vlaquia medieval.

Os cronistas bizantins y mes tarde rusos distinguiban entre os cumans salvaches y os cumans pacificos, estos zaguers yeran os que teneban ligallos de cooperación con a Rus de Kiev y con l'Imperio Bizantín. Os cumans pacificos pareix que haberban incluito a os Burci u Burciu, una tribu quipchak con elementos tribals que amaneixen mes tarde en a organización estatal d'os mamelucos de Siria y Echipto con o nombre de Burçoğlu relacionato con o clan de Borcsol en Hongría y talment ligato con o cabo tribal cumán d'o sieglo XIII en Milcov, Borz (Borş), convertitos a lo cristianismo. Atra tribu cumana estió Ulax, mencionata en fuents tamién con o nombre Olaas establita en Hongría, o clan "Itliareva chad" nombrato en fuents rusas tamién como o "o pueblo de Itoglu" u "Itoba", adhibito dimpués a lo estato mameluco como a tribu Ursobici u Urusoba. Atros nombres tribals cumans mencionatos en fuents d'a Rus de Kiev son: Toksobici (Toksoba), Citievici, Kolobici, Etebici, Terterobici. D'o grupo Terterobici provién a dinastía bulgara Terter (u Terterex). Atras tribus cumanas son Olperliueve (Olperlu), Elobici, Emiakovie (Yemek).

Historia medieval

En o sieglo IX os cumans yeran en o territorio entre os ríos Ural y Volga, amán d'os pacinacos. Dimpués d'a migración d'os pacinacos a fins d'o sieglo IX ta l'ueste pa establir-sen entre o río Dniester y os Monts Carpatos (empentando a os hongaros ta Panonia), os cumans prenioron os territorios que antes teneban os pacinacos entre os ríos Don y Dniéper.

En a segunda metat d'o sieglo XI, dimpués que as hordas pacinacas hesen cruzato o Danubio, os cumans prenioron (1057) a tierra d'os pacinacos entre o Dniester y los Carpatos, on restos d'o pueblo pacinaco s'achuntoron con ellos. Dica facioron una incursión ta Transilvania en 1092. Manimenos o suyo centro de poder continó estando entre o Don y Dniéper ("Cumania Blanca") dica a batalla de Kalka (1223), cuan os mongols los derrotoron y encomenzoron a migrar ta l'este. Entre 1239 y 1240 os cumans cruzoron o Dniéster en mayor numero plegando dica o Danubio, en ixos tiempos o conchunto formato por Moldavia y Vlaquia yera conoixito como "Cumania Negra". Os cumans encara yeran os sobirans d'a Cumania Negra en a segunda metat d'o sieglo XI. Dimpués d'a derrota debant d'os mongols bels cumans s'ixemenoron y infiltroron entre os vlacos, atros emigroron ta Hongría con o suyo cabo Kuten (Kuthen y Kotian), en o tiempo que atra parte cruzó o Danubio con Chonas. Ya en o sieglo XI heban tenito luitas contra os bizantins y os hongaros, conflictos que continoron sobretot con os bizantins en o sieglo vinient (os Carpatos feban de muga natural d'o Reino Hongaro y os reis d'Hongría teneban a muga defendita por os siculos). Tamién pa asegurar a muga carpatica contra os cumans, a meyatos d'o sieglo XII os reis d'Hongría dixoron establir-sen en a muga a los saxons transilvanos y en 1211 dixoron que se i estabisen os Caballers Teutons. En tiempos d'a dinastía d'os Asans os cumans yeran aliaus d'os vlacos y os bulgaros en a luita contra os bizantins. En a "Cronica de Morea" parlan d'os comanos:

en la tercera batalla el se fizo capitán de todos los otros Grieguos & de las costeras de los alanos & los Comanos con los arcos

A derrota en a batalla de Kalka fació que os cumans s'acercasen politicament a os hongaros. O rei d'Hongría aceptó una alianza con a condición que se cristianizasen, recibindo o cristianismo enta 1227. Bi heba un bispato cumán pa os cumans cristianizatos, fundato muito antes, (primera mención en 1217), pa estendillar o cristianismo catolico en ixas tierras. Pero este bispato tien una acción d'una traza mes organizata només dende a cristianización formal de grant numero de cumans en 1227 baixo protectorau d'Hongría. Bi habió tamién intentos d'implantar o catolicismo a l'ueste y sud d'os Carpatos. Uno d'estos intentos estió a diocesi de Milcovia, d'os cumans, fundata o 13 de setiembre de 1229 por iniciativa d'o rei Alberto II d'Hongría de d'o papa Gregorio IX, diocesi con base destruita en 1241 por a invasión d'os mongols. Prebatinas ulteriors de refundar a diocesi fracasoron.^[1]

Os reis d'Hongría prenioron dende 1233 tamién o títol de "rei de Cumania" con motivo que a invasión d'os mongols empentó a muitos cumans a fuyir ta l'ueste establindo-sen en Hongría, on o rei Béla IV los establió a man d'o río Tizsa en 1239. En 1290, dimpués d'a muerte d'o rei Ladislau "o cumán", defensor d'os cumans, una parte grant d'os cumans d'Hongría se'n tornoron ta o norte d'a Mar Negra adhibindo-sen con a población local d'o Khanato d'a Orda d'Oro tamién d'orichen cumán y convertindo-se en tartaros.

Os "cumans negros", mencionatos en o sieglo XIII, yeran probablement mesclaus con vlacos de Muntenia, conoixita en ixos tiempos con o nombre de Cumania. En a toponimia moldava y muntena han quedato muitos puestos que conservan denominacions que recuerdan a os cumans como por eixemplo: Comani, Comana, Comanca, Teleorman, Caracal, Horez, Dărmăneşti, Cozia, Ozun etc., y tamién o nombre propio Coman. S'ha conservato un glosario de luenga cumana obra d'un venecián d'o sieglo XIII.

Ixemenatos entre atros pueblos y sozmesos, deixoron d'esistir como pueblo y se convertioron en diferents pueblos de luenga turquica actuals u contribuyoron a la suya formación.

En a Hongría actual bi ha dos rechions ditas "Cumania" en hongaro a los costatos d'o Tizsa meyo. Nagy-Kunsag ("Cumania la Gran", y Kis-Kunsag ("Cumania la chica".

Os cumans en fuents aragonesas

Os cumans son mencionatos en a "Cronica de Morea", pero sobretot en "La Flor de las Ystorias d'Orient", as dos traduccions heredianas, y en o "Libro d'as Marabillas d'o Mundo". As denominacions son comanos, cumanianos y cumans. En La Flor de las Ystorias d'Orient comentan como lis dicen os atros pueblos turquicos en Asia Central:

Et es aquesta nacion de cumans clamada Capchath en las partidas de Orient. Apres pocos dias vn et muchos otros..

Tamién en "La Flor de las Ystorias d'Orient" ya comentan que os cumans u "cumanianos" son sozmesos a los mongols (a los qui dicen tartres):^[2]

El soldan de Egipto huyo faular como los tartres vendian los cumans....

…regno de Cumania, el entro en el regno de Rosia et prisolo et conquisto la tierra gazera et el regno de Vulgaria. Apres caualgo entro al regno de Ongria et aqui trobo algunos cumanianos et prisolos. Apres de aquest…..

Comentan tamien l'orichen cumán d'os soldans mamelucos d'a dinastía Bahri.

Melechsala fizo nodrir los cumans et amaua los mucho et fazia les mostrar a caualgar et deportar armas, et fiaua se mucho en ellos, et tenie los cerca si. En el tiempo que Sant Loys, rey de Francia, passo ultramar et fue preso por los moros, los cumans desuso dichos, qui eran estados vendidos et comprados, mataron su senyor Melechsala...

Cassan vinçio en campo, et encara es soldan de Egipto. Perdonado yo sea si yo fable luengament de los cumans, qui son vendidos et comprados, et de los soldanes de lur linage, qui assi amenudo se matauan los vnos a los otros; car aquesto fago por mostrar que los moros no pueden estar...

car despues que aquel linatge de los cumans començo ha auer senyoria en Egipto, .ix. hi son stados ordenados soldanes et senyores entre ellos. Et de aquellos nueue soldanes qui son estados en Egipto entro al tiempo de agora, los .iiii. son estados muertos de gladio...

En a traducción aragonesa d'o "Libro d'as Marabillas d'o Mundo" os cumans son mencionatos como "cumans" y tamién como cormanos por error:

Et depues su nieto / depues los corm(a)nos qui estauan como sieruos en egipto sentieron lur grant poder / Et esleyeron vn soldan deillos El quoal se fezo clamar Mallechsalla / En su t(iem)po entro enla t(ier)ra el Rey de francia sant loys et combatio a eill et fue preso et empresonado / Et depues fue aqueill soldan muerto de sus s(er)uientes mesmos depues esleyero(n) vn otro qui auja nombre Turqueman por estar soldan / Et aqueill deliuro Sant loys de p(re)son por Rançon / depues vn otro de sus cormanos qui auja nombre cacas mato turqueman por estar soldan & se fezo clamar melechemes por la seynnoria & se clama melchdaer

Referencias

1. Episcopia de Milcovia.
2. Hayton (Frère) La Flor de las Ystorias d'Orient. The University of Chicago press, 1934 [1]