Laura Valenzuela

Laura Valenzuela
L'actriz Laura Valenzuela, en una imachen de l'anyo 2012.
Información personal
Nombre real	Rocío Laura Espinosa López-Cepero
Calendata naiximiento:	18 de febrero de 1931
Puesto naiximiento:	Sevilla (Andalucía, Espanya)
Calendata muerte:	17 de marzo de 2023
Puesto muerte:	Madrit (Comunidat de Madrit, Espanya)
Ocupación:	Actriz Presentadora de televisión Modelo
Conchuche:	José Luis Dibildos (1971-2002)
Fillos:	Lara Dibildos

Laura Valenzuela (nombre artistico de Rocío Laura Espinosa López-Cepero), naixida de Sevilla (Andalucía, Espanya) o 18 de febrero de 1931 y muerta o 17 de marzo de 2023 en Madrit (Comunidat de Madrit, Espanya),^[1] estió una actriz, presentadora de televisión y modelo espanyola activa profesionalment dende meyaus d'os anyos 1950 dica meyaus d'os anyos 2000, con bellos premios recibius mientres a suya vida profesional. Casada con o guionista y productor José Luis Dibildos, estando los pais de l'actriz Lara Dibildos.

La suya cinta de debut en o cine como actriz estió El pescador de coplas (1954, Antonio del Amo), pero actuó en cuantas cintas, y series de televisión, amás d'una faceta como modelo y, especialment como presentadora de televisión, estando una cara muit conoixida en os primers tiempos de Televisión Española, que escomencipió las suyas emisions en l'anyo 1956. Como presentadora, cal destacar que estió la parella profesional d'o presentador Joaquín Prat, con qui compartió muita popularidat en Espanya mientres os anyos 1960. Tanimientres, en 1958 heba conoixiu a su futuro esposo, qui la convenció ta dedicar mas tiempo a la suya carrera cinematografica, en destacando las suyas actuacions en bellas cintas como La violetera (1958, Luis César Amadori), Aquellos tiempos del cuplé (1958, Mateo Cano y José Luis Merino), La Tulipe noire (1964, Christian-Jaque), Las que tienen que servir (1967, José María Forqué), Los subdesarrollados (1968, Fernando Merino), De profesión sus labores (1970, Javier Aguirre Fernández), Pierna creciente, falda menguante (1970, Javier Aguirre Fernández) u Españolas en París (1971, Roberto Bodegas).

Tanimientres, cuan o 27 de marzo de 1971 casó con José Luis Dibildos y bien luego naixió su filla Lara, decidió albandonar a suya carrera profesional, no tornando-ne dica que en 1990, cuan ya bi heba en Espanya cadenas de televisión privadas, treballó ta la cadena Telecinco, encara que en 1996 tornó a treballar en TVE, anque que con presencia discontina, dica que finalment albandonó definitivament a suya carrera profesional en 2006.