Sierra Menera
|
Iste articlo ye en proceso de cambio enta la ortografía oficial de Biquipedia (la Ortografía de l'aragonés de l'Academia Aragonesa d'a Luenga). Puez aduyar a completar este proceso revisando l'articlo, fendo-ie los cambios ortograficos necesarios y sacando dimpués ista plantilla. |
- Iste articlo ye sobre una aliniación montanyosa. Ta o lugar d'o municipio de Uellos Negros se veiga Sierra Menera.
| Sierra Menera | |
|---|---|
 | |
| Cheografía | |
| Cordelera | Sistema Iberico |
| Sector | |
| ' | |
| Maxima altaria | |
| Cimas importants | Pueyo de Sant Chinés |
| Largaria | 29 km |
| Amplaria | 5,3 km |
| Superficie | |
| Vértiz cheodesico | |
| Subsistemas | |
| Administración | |
| Estau | Espanya |
| País |  Aragón Castiella
|
| Comarca | Xiloca Comunidat de Teruel Sierra d'Albarracín sinyoría de Molina-Alto Tajo |
| Cheolochía | |
| Edat | Paleozoico, Triasico |
| Materials | Rocas sedimentarias |
| Tipo | |
  | |
La Sierra Menera ye una aliniación montanyosa de bels 30 km que fa part la branca castellana[1] de lo Sistema Iberico. La suya tuca mes alta ye lo Pueyo de Sant Chinés con 1,603 m d'altaria[2]; un atra important altaria ye Mollón Alto con 1,591 m. Sierra Menera fa part de la unidat morfoestructural dita "Serranía d'Albarracín" chunto con la Sierra d'Albarracín sensu stricto y los Monts Universals[3].
Administrativament la Sierra Menera perteneixe a la Sierra d'Albarracín, a la Comunidat de Teruel y a Xiloca en la versant oriental aragonesa y a la sinyoría de Molina-Alto Tajo en la versant occidental Castiella-La Mancha. En cualques cerros bi ha aerocheneradors.
La dirección predominant de la sierra ye NNW - SSE. No ye tan alta u conspicua como atras sierras de lo Sistema Iberico. Dende lo punto de vista hidrografico la Sierra Menera desparte las versants mediterrania y atlantica. Los chicoz cursos d'augua de la part occidental se recullen en lo río Tacho, los de la part oriental en cualques casos son ramblas y se recullen en lo río Xiloca, y beluns de la part septentrional se recullen en la Laguna de Gallocanta.
Lo puesto conoixiu como Mirador de la Marajosa, con un caixigar de Quercus pyrenaica ofreixe una ampla anvista de lo paisache de la redolada.
Historia
[editar | modificar o codigo]L'arqueolochía documenta nuclios de población en Sierra Menera relacionaus con la metalurchia de lo fierro ya en lo periodo celtiberico pero que no rechistran las fuents escritas romanas contemporanias.
En lo periodo andalusí bi habió extraccions de fierro y puestos habitaus chunto a las menas. Tamién bi heba alquerías y torres ligadas a los treballos metalurchicos que podeban estar fortificadas, encara que las fortificacions serían chicas y yeran a sobén torres-refuchio. Se considera que la Torre Gabasa y lo Castiello de Uellos Negros son mes antigas que Saletas y La Torreta de Peracens.[4] Tamién bi heba poblacions situadas en las grans altarias y por lo menos un hisn documentau en Rodenas por Al-Idrisí.
Beluns de los nuclios de población actuals se pueden documentar en tiempos de la Reconquiesta y la repoblación medieval. En las zagueras decadas de lo sieglo XII bi habió una arribada de colonos cristianos que dioron prou estabilidat demografica a los nuclios de población que habitoron, y permitioron la formación d'un rete d'aldeyas que ya se documenta a primers de lo sieglo XIII en la versant aragonesa en textos relacionaus con los repartos de las racions que s'adchudicaban a las ilesias de Daroca y Teruel.[5] Las torres-refuchio chicas de lo periodo andalusí (quba) prenioron la denominación romanz de torre en las luengas de los repobladors y s'orichinoron nuevos toponimos basaus en torre u la forma apocopada tor en Sierra Menera y la suya redolada: La Torreta, Torre d'el Buco, Torrillo, Torralba, Torreciella, Torre los Negros, Torre la Cárcel y Torremocha en Aragón y Torredelpalo, Torremochuela, Torrecuadrada de Molina, Tortuera, Tordellego, Tordesilos en la provincia de Guadalachara.[4]
Cuan avanzó la reconquiesta dica lo Reino de Valencia Sierra Menera se convertió en muga entre lo Reino d'Aragón, Reino de Castiella y la sinyoría d'Albarracín. En este territorio de dificil control bi habió almugávars que saqueyaban localidaz tanto en Aragón como en Castiella y que obligoron a las autoridaz a intervenir en diferents ocasions.[5]
En 1903 la Compañía Minera de Sierra Menera S. A. ubrió una linia de ferrocarril de 200 km con la fin de levar lo mineral de fierro (hematites) de Uellos Negros ta lo puerto de Murviedro. En ixos tiempos estió la linia privada de ferrocarril mes luenga d'Europa. Una instalación d'altos fornos tamién perteneixent a esta companyía tamién se troba en Murviedro, a on bi ha una planta de peletización.
L'actividat menera prolongada a traviés de los sieglos ha causau impactos ambientals en Sierra Menera. Bi ha muitas toneladas d'enruna y escoria ixemenadas por toda la sierra, que producen contaminación de lo suelo y de l'augua subterrania. Dende mitat de lo sieglo XX, la menería a cielo ubierto a gran escala causó una severa degradación de la tierra en amplas arias.[6]
Las instalacions de procesamiento de Murviedro, Altos Hornos del Mediterráneo S.A., cerroron en l'anyo 1984 y la companyía menera de Sierra Menera cayó en bancarrota en 1987, cerrando-se dimpués las menas y las instalacions subsidiarias.[7]
Muita chent en Uellos Negros quedó en paro dimpués d'aturar-se l'actividat menera de la sierra, y en consecuencia la población baixó dende 3.000 habitants en lo sieglo XX dica 560 en l'anyo 2010. En los tiempos cuan cerroron las menas no bi heba garra regulación oficial que obligás a la companyía menera a reparar lo impacto ambiental causau por la suya actividat.[8] La lei espanyola de menas vichent en ixos tiempos no incluyiba una provisión mirando-se lo impacto ambiental de l'actividat menera cuan fue promulgada en l'anyo 1973.[9]
Referencias
[editar | modificar o codigo]- ↑ (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995, pp 143-145
- ↑ (es) Eduardo Viñuales Cobos: Red Natural de Aragón. Jiloca nº 18, 2007, pp 106-111.
- ↑ (es) Jose Luís Peña Monne et al. : Geomorfología de la Provincia de Teruel. Instituto de Estudios Turolenses, 1984. p 49.
- ↑ 4,0 4,1 (es) Julián M. Ortega Ortega: Consideraciones sobre la explotación del hierro en la Sierra Menera (Teruel) durante época andalusí, articlo localizau en Minas y metalurgia en al-Andalus y Magreb occidental: explotación y poblamiento 2008, ISBN 978-84-95555-93-9 , pp 95-122.
- ↑ 5,0 5,1 (es) María Teresa Iranzo Muñío, Julián M. Ortega Ortega: Disciplina agraria y reorganización del poblamiento bajomedieval en el territorio de la comunidad de aldeas de Daroca. Aragón en la Edad Media XXII (2011) pp. 67-126. ISSN 0213-2486.
- ↑ (es) Miguel Angel Dobón Pérez: Historia minera y conflicto ambiental. El caso de Sierra Menera (Teruel), 1900-1931, 2004, ISBN 84-7733-698-9
- ↑ (es) La Compañía Minera de Sierra Menera. Breve historia
- ↑ (es) Luis Diego Arribas: Contemporary Art and Opencast Mining, Revista de Humanidades, University of Zaragoza. 2009.
- ↑ (es) Lei de Menas de 21 de chuliol de 1973
Bibliografía
[editar | modificar o codigo]- (es) J. Vilá Valentí, Lluís Solé Sabarís, Manuel Terán: Geografía general de Espanya. Ariel Geografía. 1194.
- (es) Julio Muñoz Jiménez, Concepción Sanz Herráiz: Guía Física de España. 5 Las Montañas. Alianza Editorial, 1995.
Datos: Q7511503
Multimedia: Sierra Menera / Q7511503