Kristin Otto

Kristin Otto
Vida
Nacimientu	Leipzig, 7 de febreru de 1966 (58 años)
Nacionalidá	República Democrática Alemana ; Alemaña
Estudios
Llingües falaes	alemán
Oficiu
Oficiu	nadadora, periodista
	Participante medaya d'oru olímpicoswimming at the 1988 Summer Olympics – women's 50 metre freestyle (en) ; medaya d'oru olímpicoswimming at the 1988 Summer Olympics – women's 100 metre freestyle (en) ; medaya d'oru olímpicoswimming at the 1988 Summer Olympics – women's 100 metre backstroke (en) ; medaya d'oru olímpicoswimming at the 1988 Summer Olympics – women's 100 metre butterfly (en) ; medaya d'oru olímpicoswimming at the 1988 Summer Olympics – women's 4 × 100 metre freestyle relay (en) ; medaya d'oru olímpicoswimming at the 1988 Summer Olympics – women's 4 × 100 metre medley relay (en) ;
Emplegadores	ZDF (es)
Premios	ver Orde de Karl Marx ; Estrella de la Amistad de los Pueblos ; International Swimming Hall of Fame ; Orden Patriótica al Mérito de Oro ; Sportsman of the year (1988) ; Sportsman of the year (1989) ; Osgar (2002) ;
IMDb	nm1763167

Kristin Otto (7 de febreru de 1966, Leipzig) ye una nadadora alemana considerada como una de los meyores de tolos tiempos y que ganó seis medayes d'oru nos Xuegos Olímpicos de Seúl 1988.

Aniciu

Kristin empezó a nadar a los 15 años nuna famosa academia deportiva de les proximidaes de Halle, y llueu demostraría unes cualidaes escepcionales pa esti deporte, ayudada por un físicu portentosu (mide 1,82 m.)

La so irrupción na élite mundial tuvo llugar nos Campeonatos del Mundu de Guayaquil en 1982, onde con solu 16 años ganó trés medayes d'oru, una d'elles nos 100 metros espalda y les otres dos nos relevos 4x100 llibres y 4x100 estilos.

Hasta esi momentu taba principalmente dedicada a nadar en llombu. Sicasí. tres los mundiales de Guayaquil va camudar d'entrenador, que va ser agora Stefan Hetzen, y esti reconviértela a les pruebes de velocidá, onde consiguiría depués los sos mayores ésitos.

Nos Campeonatos d'Europa de Roma 1989 foi segunda nos 100 metros llibres, solo superada pol so compatriota Birgit Meineke, y ganaría dos medayes d'oru nes pruebes de relevos 4x100 m en llibres y n'estilos.

Kristin sería una de les deportistes más perxudicaes pol boicó de los países del Este a los Xuegos Olímpicos de Los Angeles 1984, yá que yera una de les grandes favorites pa ganar delles medayes d'oru, cosa que demostró esi mesmu branu batiendo'l récor del mundu de los 200 metros llibres en Magdeburgu con 1.57.75, superando l'antiguu récor de l'americana Cynthia Woodhead de 1979.

Si 1984 tuvo un sabor agriduz, peor diba ser 1985, yá que pasó l'añu práuticamente en blanco aquexada de fuertes dolores nes vértebres cervicales que la obligaron inclusive a llevar collarín mientres dellos meses. Esto torgó-y participar nos Campeonatos d'Europa de Sofía.

Sicasí toos estos apulmonamientos quedaron tras cuando nos Campeonatos del Mundu de Madrid en 1986 foi la gran estrella de la competición al ganar 4 medayes d'oru (100 llibres, 200 estilos, 4x100 llibres y 4x100 estilos), amás de dos plates (50 llibres y 100 caparina). Llogró amás el récor mundial en 100 m llibres con 54.73, superando'l del so compatriota Barbara Krause de 1980.

La so racha imparable siguió al añu siguiente nos europeos d'Estrasburgu 1987, con cinco medayes d'oru (100 llibres, 100 caparina, 100 llombu, 4x100 llibres y 4x100 estilos), demostrando ser la meyor nadadora del mundu nesi momentu.

Xuegos de Seúl '88

Coles mesmes, tou paecía preparáu pa tomase cumplida revancha de la so ausencia olímpica en Los Angeles. Ganando tou lo que puede ganase na natación, a Kristin faltába-y la gloria olímpica, ensin la cual nunca sería considerada una lleenda del deporte. Los Xuegos Olímpicos de Seúl 1988, a los que llegaba con 22 años, teníen de ser la culminación d'una estraordinaria carrera deportiva.

Y verdaderamente Kristin nun defraudó a naide, y realizó na capital coreana la meyor competición de la so vida: séis medayes d'oru nes seis pruebes qu'apostó, la primer vegada qu'una deportista (non solo nadadora) consiguía asemeyada fazaña nunos Xuegos, y casi igualando la proeza de Mark Spitz cuando ganó siete oros en 1972. En Seúl Kristin Otto apoderó la competición ganando en tolos estilos salvu na braza (50 llibres, 100 llibres, 100 caparina, 100 llombu, 4x100 llibres y 4x100 estilos). Foi ensin dulda la reina d'aquellos Xuegos.

Retirada

ganándolo yá tou, y agora si, convertida nuna lleenda viviente de la natación, al llau de les mítiques Kornelia Ender o Dawn Fraser, la retirada paecía cercana. Kristin Otto apostó la so última competición nos Campeonatos d'Europa de Bonn 1989, y acabó la so carrera como la empezara, ganando. Esta vegada dos medayes d'oru en 100 llombu y 4x100 estilos, que suponíen un broche perfectu pa esta gran deportista.

Kristin Otto foi la postrera de les valquiries na natación femenina, con ella acababa'l dominiu de los nadadores d'Alemaña del Este, qu'empezara a mediaos de los años 1970. La reunificación alemana y los cambeos producíos de siguío, daríen entamu a una nueva dómina, na que países como China, Estaos Xuníos o Australia tomaben el relevu. Con Kristin Otto, la RDA tuvo'l meyor epílogu que podía tener, una despidida pela puerta grande d'un proyeutu que más allá de les medayes olímpiques, representaba una manera novedosa d'entender el deporte, el trabayu y les rellaciones humanes.

Tres la so retirada Kristin empezó a estudiar educación física, y exerció de comentarista deportiva na televisión del so país. Una de les sos principales aficiones ye coleccionar llibros. L'escándalu del dopaxe na RDA a principios de los 90 chiscó, como ye lóxicu, la reputación de Kristin, pos dellos entrenadores confesaron suministrar esteroides a los sos deportistes ensin qu'estos tuvieren conocencia. Esa yera la cara menos atenta de la hestoria. A cuenta de esto Otto declaró:

"Naide puede quitame l'ésitu que llogré en Seúl. Yo fuí como Mark Spitz, cola suerte de recibir un gran don, y les seis medayes fueron la resultancia de bien d'años de duru trabayu"

Referencies

↑ Afirmao en: Internet Movie Database. Identificador IMDb: nm1763167. Data de consulta: 15 ochobre 2015. Llingua de la obra o nome: inglés.
↑ Identificador CONOR.SI: 98635619. Afirmao en: CONOR.SI.

Enllaces esternos

[cee993cb2798953da12b7002f442b6d342dcdcf8-1] Afirmao en: Internet Movie Database. Identificador IMDb: nm1763167. Data de consulta: 15 ochobre 2015. Llingua de la obra o nome: inglés.

[1020341a564e4afba66a9866c0b5923a141b8f88-2] Identificador CONOR.SI: 98635619. Afirmao en: CONOR.SI.

[1]

[2]