George Gershwin

George Gershwin a oa ur sonaozour ha pianoour stadunanat, bet ganet d'ar 26 a viz Gwengolo 1898 e Brooklyn, New York, ha marvet d'an 11 a viz Gouere 1937 e Hollywood, Los Angeles, Kalifornia.
Yuzevien a-orin eus Sant-Petersbourg e Rusia e oa e dud.

Buhez

E-unan en doa desket Gershwin o seniñ ar piano, ha pianoour laz-seniñ e voe e Broadway. E vreur Ira Gershwin a skrive pozioù evitañ. Kenlabouret o doa an daou vreur, oc'h aozañ sonerezh ha kanaouennoù a zo deuet da vezañ brudet-kenañ, da skouer Summertime bet kanet gant Ella Fitzgerald ha Louis Armstrong, ha kanet goude gant un toullad kanerien all betek an deiz a hiziv.
Bras eo levezon ar jazz war oberennoù George Gershwin. War un tu e oa Gershwin maget gant tonioù hengounel yidek ha rusianek, ha gant sonerezh poblek eus Amerika evel ar ragtime, ar blues hag ar gospel ; war an tu all e oa sod gant sonaozourion klasel e-giz Bach, Mozart, Chopin, Liszt ha Ravel^[1].
Berzh en-doa graet Gershwin gant e ganaouennoù, ha pedet e oa da aozañ sonerezh evit arvestoù seniñ Broadway, hag ivez evit ar sinema.

Oberennoù brudetañ

Rhapsody in Blue, evit piano hag orkestra (1924)
Variations on "I got rhythm", evit piano hag orkestra (1925)
An american in Paris, evit orkestra (1928)
Porgy and Bess, an opera ma klever ar ganaouenn Summertime

Levrlennadur

Mildred Clary, Une rhapsodie américaine, embannadurioù Pygmalion, 2005.(fr)

Liammoù diavaez

Lec'hienn ofisiel ar vreudeur Gershwin (en)

Notennoù

↑ Kelaouenn Classica, niv. 159, miz C'hwevrer 2014 (fr)

[1] Kelaouenn Classica, niv. 159, miz C'hwevrer 2014 (fr)

[1]