Ian Rank-Broadley

Ian Rank-Broadley

Biografía
Nacemento	setembro de 1952 (72 anos) Walton-on-Thames, Reino Unido ^(pt)
Actividade
Ocupación	escultor, medallista, modeler ^(en)
Premios
(2008)  Marsh Award for Excellence in Public Sculpture ^(en)

Ian Rank-Broadley, nado en Walton-on-Thames, Surrey, en 1952, é un escultor e deseñador de moedas británico, coñecido por unha estatua de Diana de Gales erixida no palacio de Kensington, en Kensington e Chelsea, e pola efixie de Isabel II característica da moeda británica e da Commonwealth, de 1998 a 2015.

Traxectoria

Nado en Walton-on-Thames, Surrey, Ian Rank-Broadley estudou na Epsom School of Art entre 1970 e 1974, e logo na Slade School of Fine Art, da University College London, entre 1974 e 1976, onde acadou a bolsa de estudos Boise Travelling Scholarship. Durante o curso 1976-1977 completou a súa formación artística na Escola Británica de Roma,^[1][2] e visitou Nápoles, Florencia, Venecia e París.^[3][4]

Logo do seu regreso ao Reino Unido iniciouse como escultor profesional e especializouse en escultura de baixorrelevo. Foi axudante dos escultores Reg Butler (1977) e Ralph Brown (1982).^[1]

En 1989 ingresou como membro asociado na Real Sociedade Británica de Escultores, e en 1994 acadou a condición de membro de pleno dereito. En 1990 foi elixido membro da Sociedade de Artistas e Deseñadores Numismáticos.^[3] En 1995 entrou a formar parte do Gremio de Traballadores da Arte.^[2][4]

En 2010 foi nomeado administrador da Prince's School of Traditional Arts. As súas obras forman parte das coleccións permanentes de entidades como o Museo Británico, a Galería Nacional de Retratos de Londres, o Museo Ashmolean, o Museo Fitzwilliam de Cambridge, a Catedral de San Paulo e o Rijksmuseum, entre outros.^[5] Entre as institucións que lle fixeron encargas están a Universidade de Surrey (1977), a Sociedade Británica da Medalla de Arte (1989) e a London Library (1990).^[1]

Rank-Broadley acadou pola súa traxectoria artística diversos recoñecementos; entre eles, foi nomeado en 1996 membro de honra da Worshipful Company of Goldsmiths,^[2] e o mesmo ano concedéronselle as Chaves da Cidade de Londres.^[3][4]

Obra

Escultura

Grupo escultórico de bronce de Ian Rank-Broadley no Memorial das Forzas Armadas, en Alrewas, Staffordshire.^[6]

Parte da obra de Rank-Broadley está caracterizada polo espido masculino, algo que foi sinalado polo crítico de arte británico Jonathan Jones.^[7] O propio Rank-Broadley escribiu ao respecto:^[8]

“

A elección da figura masculina espida como motivo dominante fíxose bastante axiña, cando me decatei de que o espido feminino fora, en gran medida, despoxado do seu poder polo mundo comercial da publicidade, en tanto que o masculino aínda conservaba un poder que podía excitar, chamar a atención e conmover.

”

En 1996, Rank-Broadley gañou o premio pola súa maqueta de bronce para as Portas do Infierno de Dante, na XI Bienal Dantesca de Rávena, en Italia.^[3][9]

En 2007, inaugurouse o Memorial ás Forzas Armadas no National Memorial Arboretum, en Alrewas, preto de Lichfield, Staffordshire, que contén dous grandes grupos de catorce figuras, todas elas de tamaño natural.^[6][10] Por esta obra recibiu o premio Marsh 2008 á Excelencia en Escultura Pública.^[9][11]

En 2010 realizou un monumento a Dean Colet, fundador da St Paul's School de Londres, que se pode ver na catedral de San Paulo.^[12] Outras obras importantes son o San Mateu da igrexa de San Mateu de Northampton;^[13] a raíña Isabel II coa vestimenta da Orde da Xarreteira, no Tribunal Supremo;^[14] a estatua de Charles James Fox en Chertsey;^[15] e a estatua Machine Gunner ("Metralladora"), no Memorial do Royal Anglian Regiment, no Museo Imperial da Guerra de Duxford.^[16]

O editor Felix Dennis converteuse nun importante mecenas para Rank-Broadley; por encarga súa esculpiu, entre outras, a estatua de Josephine Baker,^[17] ademais da composición Lord Rochester, his Whore and a Monkey ("Lord Rochester, a súa puta e un mono") para o seu Xardín de Heroes e Viláns".^[18]

En 2018, Rank-Broadley completou un busto retrato do poeta galés R. J. Arkhipov. A experiencia de Arkhipov co escultor inspirou o seu poema The Sculptor ("O escultor").^[19]

O 10 de decembro de 2017 anunciouse que Rank-Broadley recibira a encarga dos fillos de Diana, a Princesa de Gales, para executar unha estatua na súa memoria. A súa finalización estaba prevista inicialmente para 2019,^[20] mais a súa inauguración no Xardín Afundido do Palacio de Kensington demorouse ata o 1 de xullo de 2021.^[7][21] Na súa crítica, Jonathan Jones sinalou o seu "horror estético [...] Un realismo plano e cauteloso, suavizado por un vago intento de intimidade, convérteno en algo sen sentido, sen espírito nin carácter".^[22]

• 
  Royal Anglian Regiment Memorial en Duxford, Inglaterra.
• 
  Estatua de Licoricia de Winchester en Winchester.^[23]
• 
  Bustro de Charles James en Chertsey, Surrey.
• 
  Estatua de San Mateu en Northampton, Northamptonshire.

Moedas e medallas

En 1997, Ian Rank-Broadley gañou o concurso convocado pola Royal Mint para a creación dunha nova efixie de Isabel II, en substitución do ata entón vixente, que Raphael Maklouf deseñara en 1985. Esta nova efixie, coñecida como o "cuarto busto" da raíña, estaba destinada a aparecer a partir de 1998 nos anversos das moedas británicas en circulación e conmemorativas, e tamén en moitas das emitidas por outros territorios de soberanía británica e membros da Commonwealth, ata 2015.^[3][24][25]

O retrato de Rank-Broadley contrasta co anterior ao ocupar unha gran parte do campo da moeda —ao estilo de Benedetto Pistrucci, a quen admira— e ao presentar unha figura realista da raíña, que amosa a madureza dos 70 anos que tiña daquela.^[26] Ademais, Isabel II carece de coroa e, no seu lugar, a monarca porta na súa cabeza a coñecida como "tiara das Rapazas da Gran Bretaña",^[27] que a súa avoa, María de Teck, lle entregara como agasallo de casamento.^[2]

Ademais, Rank-Broadley foi o gañador de varios concursos da Royal Mint para o deseño de ambas as faces de varias moedas conmemorativas do Reino Unido:

• 5 libras (2000), conmemorativa do centenario da Raíña Nai.^[28]

• 5 libras (2002), conmemorativa do Xubileu de Ouro de Isabel II.^[29]
• 5 libras (2008), conmemorativa do 60º aniversario do Príncipe de Gales.^[30]
• 5 libras (2012), conmemorativa do Xubileu de Diamante de Isabel II.^[31]
• 10 libras (2012), conmemorativa do Xubileu de Diamante de Isabel II.^[32]
• 500 libras (2012), conmemorativa do Xubileu de Diamante de Isabel II.^[33]
• 5 libras (2007), conmemorativa do 60º aniversario de voda de Isabel II e o Príncipe Filipe.^[34]
• 5 libras (2021), conmemorativa do centenario do nacemento do Príncipe Filipe de Edimburgo.^[35][36]

Todas as moedas creadas por Ian Rank-Broadley amosan as súas iniciais IRB a modo de marca de gravador, normalmente baixo a efixie de Isabel II.^[24][26]

Rank-Broadley foi tamén autor de varias medallas, tanto conmemorativas como de arte.^[37] O busto de Isabel II creado por Rank-Broadley incorporouse tamén no anverso da Medalla do Ébola polo Servizo na África Occidental, cun reverso de John Bergdahl.^[38]

Por outra banda, a Royal Numismatic Sociaty, de Londres, encargoulle en 1993 a confección do seu máximo galardón, a Medalla da Royal Numismatic Society, co motivo clásico de Heracles e o León de Nemea.^[39] Este Deseño estivo vixente ata 2021, cando se cambiou por outro deseñado Robert Elderton.^[40]

• 
  Reino Unido. Medio soberano (2002). A/.^[41]
• 
  Nova Zelandia. 50 cent. (2015). A/.^[42]
• 
  Ghana. (2002). 500 sika. A/.
• 
  Medalla do Ébola polo Servizo na África Occidental.^[38]

Notas

1. "Ian Rank-Broadley. b.1952". Art.org
2. Hopkin, A. (2020). "Ian Rank-Broadley Engraver of Queen Elizabeth II Fourth Portrait". Cgards.co.uk. 9 de xaneiro.
3. "Ian Rank-Broadley". The British Museum (Britishmuseum.org).
4. "Curriculuim Vitae". Ianrank-broadley.co.uk
5. "Collections". Ianrank-broadley.co.uk
6. "Armed Forces Memorial. The Stretcher Bearers". Ianrank-broadley.co.uk
7. Davies, C. ( 2021). "Diana Statue to Stand in Redesigned Garden at Kensington Palace". En The Guardian. 1 de xullo.
8. "About Ian Rank-Broadley". Ianrank-broadley.co.uk
9. "Awards". Ianrank-broadley.co.uk
10. Williams, R. (2007). "National Armed Forces Memorial Unveiled". En The Guardian. 13 de outubro.
11. "Marsh Award for Excellence in Public Sculpture". Marsh Charitable Trust (marshcharitabletrust.org).
12. "Dean Colet - St Paul's Cathedral". Ianrank-broadley.co.uk
13. "St Mathew". Ianrank-broadley.co.uk
14. "HM Queen - The Supreme Court". Ianrank-broadley.co.uk
15. "Charles James Fox". Ianrank-broadley.co.uk
16. "Machine Gunner". Ianrank-broadley.co.uk
17. "Josephine Baker". Ianrank-broadley.co.uk
18. "Lord Rochester, his whore and a monkey". Ianrank-broadley.co.uk
19. "RJ Arkhipov". Ianrank-broadley.co.uk
20. "Princes Announce Ian Rank-Broadley Will Sculpt New Diana Statue". The Guardian. 10 de decembro de 2017.
21. Henni, J. (2021). "Who Is Ian Rank-Broadley, the Sculptor Behind Princess Diana's Kensington Palace Statue?". En People (People.com). 1 de xullo.
22. Jones, J. (2021). "An Awkward, Lifeless Shrine. The Diana Statue is a Spiritless Hunk of Nonsense". En The Guardian. 1 de xullo.
23. "Licoricia of Winchester (d.1277) and Asser". Art.uk
24. "Royal Efigy". Ianrank-broadley.co.uk
25. "Rank-Broadley". Numista.com
26. "The Coinage Portraits of Her Late Majesty Queen Elizabeth II – the Artists’ Stories". Royal Mint (Royalmint.com).
27. "Queen Mary's Girls of Great Britain and Ireland Tiara". Royal Collection Trust (RCT.uk).
28. "5 Pounds - Elizabeth II Queen Mother 100th Birthday". Numista.com
29. "5 Pounds - Elizabeth II Golden Jubilee". Numista.com
30. "5 Pounds - Elizabeth II Prince Charles 60th Birthday". Numista.com.
31. "5 Pounds - Elizabeth II Diamond Jubilee". Numista.com
32. "10 Pounds - Elizabeth II Diamond Jubilee". Numista.com
33. "500 Pounds - Elizabeth II Diamond Jubilee". Numista.com
34. "5 Pounds - Elizabeth II 60th Wedding Anniversary". Numista.com
35. "5 Pounds - Elizabeth II 5th portrait; Prince Philip". Numista.com
36. "Behind the Design with Ian Rank-Broadley FRBS Arquivado 03 de marzo de 2024 en Wayback Machine.". Royal Mint (Royalmint.com).
37. "Medals & Coins". Ianrank-broadley.co.uk
38. "The Ebola Medal for Service in West Africa". National Archives. ISBN 9781474119146
39. "Royal Numismatic Society Medal". En Ian Rank-Broadley
40. Bland, Roger. (2022). "New Royal Numismatic Society Medal". En Coins Weekly. 19 de maio.
41. "½ Sovereign - Elizabeth II 4th portrait". Numista.com
42. "50 Cents - Elizabeth II 4th Portrait; Spirit of ANZAC". Numista.com

Véxase tamén

Wikimedia Commons ten máis contidos multimedia na categoría:  Ian Rank-Broadley

Ligazóns externas

• Sitio web de Ian Rank-Broadley

Predecesor: Raphael Maklouf

Moedas da libra esterlina Autores dos anversos 1998-2015

Sucesor: Jody Clark