José Antonio Monago

José Antonio Monago

(2012)
Nome orixinal	(es) José Antonio Monago Terraza
Biografía
Nacemento	10 de xaneiro de 1966 (58 anos) Quintana de la Serena, España
Senador de España
Deputado da Asemblea de Estremadura
Circunscrición electoral: Badaxoz
Presidente de Estremadura
Datos persoais
Educación	Universidade de Cádiz Universidade de Salamanca Universidade de Estremadura
Actividade
Lugar de traballo	Madrid
Ocupación	político, bombeiro, avogado
Partido político	Partido Popular

José Antonio Monago Terraza, nado en Quintana de la Serena, Badaxoz, o 10 de xaneiro de 1966, é un político español, presidente do Partido Popular de Estremadura e de 2011 a 2015 Presidente da Xunta de Estremadura.

Traxectoria

Primeiros anos: formación

Nado en Quintana de la Serena, o seu pai, Manuel, natural de Guareña e proveniente dunha familia de labregos, era garda civil;^[1][2] a súa nai, Rosalía, nada en Hornachos e criada en Cordobilla de Lácara, era filla dun carteiro.^[1] Despois de que seu pai fose destinado finalmente a Calzadilla de los Barros, José Antonio Monago medrou alí. Comezou os seus primeiros estudos no Colexio Público Aneja, e rematou a fase preuniversitaria no Instituto Público Bárbara de Braganza, onde cursou COU. Durante esta etapa, Monago chegou a participar na selección estremeña de balonmán como porteiro.^[3]

José Antonio Monago no Foro PP de Madrid.

Ingresou no corpo de bombeiros en 1987, do que na actualidade é Xefe de Sección.^[2] Entre outros servizos, formou parte dos equipos de rescate que actuaron no lume dos Almacenes Arias de Madrid, onde perderon a vida 10 bombeiros, e fundou a ONG SOS Extremadura, que actuou nos terremotos de Alxeria e Marrocos.^[3]

Ó mesmo tempo, completou na Universidade de Estremadura os estudos de Formación do Profesorado de EXB na especialidade de Ciencias Humanas.

Posteriormente cursou os estudos de Experto Universitario en Criminoloxía dependentes da Universidade de Cádiz,^[4] cursou Dereito en Cáceres, realizou dous anos de Prácticas Xurídicas no Colexio de Avogados de Badaxoz (onde se colexiou),^[4] e realizou os cursos de docutoramento en Dereito na Universidade de Salamanca.

Carreira política

O seu paso pola política comezou no Partido Demócrata Popular de Óscar Alzaga en Badaxoz, dende onde pasou, cando se fusionou este partido co Partido Popular, ás Novas Xeracións do Partido Popular. Daquela, foi cofundador do Consello Local da Mocidade de Badaxoz, sendo o seu primeiro vicepresidente. Nas eleccións municipais de 1991 foi elixido concelleiro no concello de Badaxoz polo Partido Popular. Do mesmo xeito, foi deputado autonómico e senador.^[5]

Entre 2000 e 2004 foi Secretario Xeral do PP de Estremadura, de 2004 a 2008 foi Presidente do PP de Badaxoz, e dende o 9 de novembro de 2008 Presidente do PP de Estremadura^[6] así como o seu candidato á Asemblea de Estremadura nas eleccións autonómicas de 2011. Malia que o PP foi a lista máis votada na Xunta de Estremadura, non acadou a maioría absoluta, polo que obtivo a presidencia grazas á abstención dos tres deputados de Esquerda Unida, convirténdose así no primeiro presidente de Estremadura do Partido Popular, tras 28 anos de goberno do PSOE.

«Barón Vermello»

A presidencia de Monago, por mor da necesidade do apoio parlamentario de Esquerda Unida, caracterizouse, segundo as súas propias palabras, por unha «viaxe ó centro»^[7] e o consiguinte pulo de políticas e proxectos de maior sensibilidade social. Así por exemplo, en xuño de 2014 anunciou que, fronte as políticas fiscais contractivas do seu partido, levaría a cabo unha baixada do IRPF ós estremeños, baixada que cifrou nunha media de 292 euros anuais por contribuínte.^[8] Por outra parte, ó longo do seu mandato, realizou numerosas declaracións matizando ou arredándose directamente de posturas máis ou menos oficiais do seu partido en temas tan controvertidos como a reforma do aborto do daquela ministro de Xustiza Alberto Ruiz-Gallardón. Sobre devandita reforma manifestou que «ninguén pode negar a ninguén o seu dereito a ser nai nin tampouco pode obrigala a selo».^[9] Tamén fixo algunhas declaracións sobre os diversos casos de corrupción da época, incluídos os do seu partido, sobre os que afirmou que influíron nos malos resultados electorais obtidos polo Partido Popular nas eleccións ao Parlamento Europeo de 2014.^[10] Estas políticas e declaracións valéronlle, por parte da prensa, o apelativo de «Barón Vermello», en referencia ó nome que reciben os dirixentes autonómicos dos principais partidos (baróns).

Notas

1. Biografía de José Antonio Monago. PPextremadura.com. Consultado o 9-3-2013.
2. De bombero a presidente. ABC.es. Consultado o 9-3-2013.
3. José Antonio Monago Terraza. www.gobex.es. Consultado o 9-3-2013.
4. José Antonio Monago: "Valoro más la lealtad...esta vida se funda sobre intereses y, cuando tú tienes personas leales, sustentas una amistad sincera". Extremaduradehoy.com. Consultado o 9-3-2013.
5. Monago sustituye a Floriano como senador por la región. El Periódico de Extremadura.
6. hoy.es: Monago, nuevo presidente del PP, da un paso al centro y dice que el PER es necesario
7. ""No soy de izquierdas, pero he hecho un giro al centro"" (en castelán). El País. 19 de xuño de 2011. Arquivado dende o orixinal o 26 de outubro de 2015. Consultado o 19 de novembro de 2014. 
8. "Monago anuncia una nueva bajada de impuestos para los extremeños" (en castelán). El Mundo. 15 de setembro de 2014. 
9. "Monago: 'La ley del aborto no puede tener ideología'". El Mundo (en castelán). 31 de decembro de 2012. 
10. "Monago coincide con Feijóo en que la corrupción pudo influir en las europeas" (en castelán). La Información. 30 de maio de 2014. Arquivado dende o orixinal o 29 de novembro de 2014. Consultado o 30 de marzo de 2020. 

Véxase tamén

Wikimedia Commons ten máis contidos multimedia na categoría:  José Antonio Monago